គ្រាប់ស្វាយចន្ទីភាគច្រើនត្រូវបានទទួលទានជាប្រភេទអាហារសម្រន់ បន្ទាប់ពីយកទៅលីង ឬដុត។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ទោះបីគ្រាប់ស្វាយចន្ទីមានជាតិសសៃទាបក៏ដោយ ក៏ប៉ុន្តែវាមានផ្ទុកនូវវីតាមីន, ជាតិរ៉ែ និងសារធាតុប្រឆាំងអុកស៊ីតកម្មចាំបាច់សម្រាប់សុខភាពរាងកាយគួរអោយភ្ញាក់ផ្អើល។ ថ្ងៃនេះវេបសាយសុខភាព Health.com.kh នឹងបង្ហាញឲ្យដឹងពីអត្ថប្រយោជន៍មិនគួរឲ្យជឿមួយចំនួននៃគ្រាប់ស្វាយចន្ទីសម្រាប់រក្សាមុខងារនៃរាងកាយប្រយុទ្ធប្រឆាំងជំងឺ ៖
១. សុខភាពបេះដូង
គ្រាប់ស្វាយចន្ទីអាចជួយពង្រឹងសុខភាពបេះដូងបានយ៉ាងប្រសើរតាមរយៈជាតិអាស៊ីត oleic ដែលវាមានផ្ទុក។ អាស៊ីត oleic ជួយកាត់បន្ថយកម្រិតជាតិខ្លាញ់គ្លីសេរីដ ដែលជាតិខ្លាញ់នេះច្រើនផ្សារភ្ជាប់ជាមួយការចាប់ផ្ដើមកើតមានជំងឺបេះដូង។ លើសពីនេះទៅទៀត គ្រាប់ស្វាយចន្ទី ជាប្រភេទគ្រាប់ធញ្ញជាតិគ្មានផ្ទុកជាតិកូឡេស្តេរ៉ូល ប៉ុន្តែមានផ្ទុកសារធាតុប្រឆាំងអុកស៊ីតកម្មដែលជួយទប់ស្កាត់ហានិភ័យនៃជំងឺបេះដូងគួរអោយកត់សម្គាល់។
២. ទប់ស្កាត់ជំងឺមហារីក
គ្រាប់ស្វាយចន្ទី ជាប្រភពដ៏ប្រសើរនៃសារធាតុ proanthocyanidins ដែលជួយរឹតបន្តឹងបញ្ឈប់ការរីកលូតលាស់នៃកោសិកាមហារីក និងដុំសាច់។ គ្រាប់ស្វាយចន្ទី ក៏មានផ្ទុកសម្បូរទៅដោយជាតិទង់ដែងខ្ពស់ដែលជួយកម្ចាត់រ៉ាឌីកាល់សេរីទប់ស្កាត់កោសិកាមហារីក និងប្រយុទ្ធប្រឆាំងជាមួយជំងឺមហារីកពោះវៀនធំ។
៣. សុខភាពឈាម
ជាតិទង់ដែក និងជាតិដែក ដែលមានផ្ទុកនៅក្នុងគ្រាប់ស្វាយចន្ទីធ្វើការរួមគ្នាជួយរាងកាយបង្កើត និងប្រើប្រាស់កោសិកាឈាមក្រហម។ ដំណើរការនេះជួយសសៃឈាម, សសៃប្រសាទ, ប្រព័ន្ធភាពស៊ាំ និងឆ្អឹង ឲ្យរក្សាបាននូវសុខភាពល្អរឹងមាំ ក៏ដូចជាដំណើរការមុខងារបានត្រឹមត្រូវ។
៤. សុខភាពឆ្អឹង
គ្រាប់ស្ទាយចន្ទី ជាប្រភពដ៏ល្អបំផុតមួយនៃជាតិម៉ាញ៉េស្យូម, ប៉ូតាស្យូម និងកាល់ស្យូមដែលចាំបាច់ក្នុងការរក្សាសុខភាពឆ្អឹងប្រសើររឹងមាំ។
៥. ជួយអោយស្រកទម្ងន់
ទោះបីជាគ្រាប់ស្វាយចន្ទីមានផ្ទុកជាតិខ្លាញ់ខ្ពស់ ប៉ុន្តែជាតិខ្លាញ់ដែលវាមានផ្ទុក គឺជាប្រភេទនៃជាតិខ្លាញ់ល្អ។ ការសិក្សាស្រាវជ្រាវជាច្រើនបង្ហាញឲ្យដឹងថា អ្នកដែលទទួលទានគ្រាប់ធញ្ញជាតិយ៉ាងហោចណាស់ ២ ដង ក្នុងមួយសប្តាហ៍ ហាក់ដូចជាមិនឡើងទម្ងន់ឡើយ បើធៀបទៅនឹងអ្នកដែលមិនទទួលទាន។ ដូច្នេះចូរបន្ថែមគ្រាប់ស្វាយចន្ទីចូលក្នុងរបបអាហារប្រចាំថ្ងៃរបស់អ្នក។ ទោះជាយ៉ាងណា អ្នកគួរបរិភោគវាក្នុងកម្រិតមធ្យមបែបជាអាហារសម្រន់។
៦. សុខភាពភ្នែក
តើអ្នកធ្លាប់ដឹងទេថា គ្រាប់ស្វាយចន្ទី ក៏ល្អសម្រាប់ភ្នែកដែរ? វាមានផ្ទុកសម្បូរទៅដោយសារធាតុ zeaxanthin និង lutein ដែលដើរតួជាសារធាតុប្រឆាំងអុកស៊ីតកម្មនៅពេលទទួលទានទៀតទាត់។ សមាសធាតុទាំងនេះជួយការពារភ្នែកពីការបំផ្លាញនៃពន្លឺ និងអាចសូម្បីតែកាត់បន្ថយហានិភ័យនៃជំងឺភ្នែកឡើងបាយ។
ចំណាំ ៖ ការទទួលទានគ្រាប់ស្វាយចន្ទីពី ៥ ទៅ ១០ គ្រាប់ក្នុងមួយថ្ងៃជាប្រចាំ គឺគ្រប់គ្រាន់ហើយ៕