មកទល់សព្វថ្ងៃនេះជំងឺសសៃឈាមបេះដូងកើនឡើងជាលំដាប់គួរអោយព្រួយបារម្ភ ហើយកត្តាហានិភ័យចម្បងបំផុតមួយនៃជំងឺនេះបណ្ដាលមកពីកម្រិតកូឡេស្តេរ៉ូលខ្ពស់ក្នុងឈាម។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ប៉ុន្តែថាតើកត្តាដែលបង្កបញ្ហាកូឡេស្តេរ៉ូលឡើងខ្ពស់មានអ្វីខ្លះទៅ? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីមូលហេតុចម្បងនៃបញ្ហាកម្រិតកូឡេស្តេរ៉ូលមិនល្អឡើងខ្ពស់ដែលគ្រប់គ្នាចាំបាច់គួរដឹង ៖
១. ការជក់បារី
វាគ្មានអ្វីគួរអោយភ្ញាក់ផ្អើលឡើងដែលការជក់បារី គឺអាក្រក់ចំពោះសុខភាព។ ប៉ុន្តែតើអ្នកធ្លាប់ដឹងទេថា ការជក់បារីក៏កាត់បន្ថយកម្រិតនៃកូឡេស្តេរ៉ូលល្អ ឬប្រូតេអ៊ីន HDL ហើយបង្កើនកម្រិតកូឡេស្តេរ៉ូលមិនល្អខ្ពស់ ដែលនឹងបង្កអោយមានគ្រោះថ្នាក់ចំពោះសសៃឈាម? ជាលទ្ធផលបញ្ហានៃការធ្លាក់ចុះនូវកម្រិតកូឡេស្តេរ៉ូលល្អបង្កើនហានិភ័យនៃជំងឺស្ទះសសៃឈាមបេះដូងគួរអោយព្រួយបារម្ភ។
២. របបអាហារ
ការទទួលទានអាហារមានផ្ទុកជាតិខ្លាញ់ឆ្អែតច្រើនពេក ក៏បង្កបញ្ហាកម្រិតកូឡេស្តេរ៉ូលមិនល្អឡើងខ្ពស់គួរអោយកត់សម្គាល់ផងដែរ។ ដើម្បីជៀសផុតពីបញ្ហាកូឡេស្តេរ៉ូលមិនល្អឡើងខ្ពស់ ចូរកាត់បន្ថយការទទួលទានអាហារមានផ្ទុកសម្បូរទៅដោយជាតិខ្លាញ់ឆ្អែត ដោយជំនួសមកវិញនូវបន្ថែផ្លែឈើស្រស់, ត្រីសម្បូរខ្លាញ់ ព្រមទាំងធញ្ញជាតិគ្រាប់ពេញដែលមានផ្ទុកសម្បូរទៅដោយអាស៊ីតខ្លាញ់អូមេហ្គា ៣ និងជាតិសសៃដែលល្អសម្រាប់សុខភាពបេះដូង។
៣. អាយុ
អាយុកាន់តែកើន អ្នកក៏រឹតតែងាយនឹងប្រឈមមុខជាមួយបញ្ហានៃកម្រិតកូឡេស្តេរ៉ូលមិនល្អឡើងខ្ពស់។ ហើយកម្រិតនៃកូឡេស្តេរ៉ូលចាប់ផ្ដើមកើនឡើង ក្រោយពីឈានចូលដល់វ័យ ២០ ឆ្នាំ។ សម្រាប់បុរសកម្រិតនៃកូឡេស្តេរ៉ូលនឹងធ្លាក់ចុះ ឬឈប់កើនឡើង ក្រោយវ័យ ៥០ឆ្នាំ។ ខណៈដែលស្ត្រីរក្សាភាពថេរទាបរហូតដល់អស់រដូវ ប៉ុន្តែក្រោយអស់រដូវកម្រិតកូឡេស្តេរ៉ូលនៃស្ត្រីនឹងកើនឡើងប្រហែលជាមួយកម្រិតកូឡេស្តេរ៉ូលរបស់បុរស ឬខ្ពស់ជាងវិញ។
៤. លើសទម្ងន់
ការធាត់លើសទម្ងន់ គឺជាកត្តាចម្បងបំផុតមួយទៀតនៃការកើនឡើងនូវកម្រិតកូឡេស្តេរ៉ូលមិនល្អ។ នោះក៏ព្រោះតែការលើសទម្ងន់បង្កើនជាតិខ្លាញ់ទ្រីគ្លីសេរីដ និងកាត់បន្ថយកូឡេស្តេរ៉ូលល្អ ឬប្រូតេអ៊ីន HDL។
៥. កង្វះសកម្មភាពរាងកាយ
អ្នកប្រហែលជាមិនធ្លាប់ដឹងទេថា កង្វះសកម្មភាពរាងកាយអាចបង្កើនកម្រិតនៃកូឡេស្តេរ៉ូលមិនល្អគួរអោយព្រួយបារម្ភ។ ដូច្នេះដើម្បីជៀសផុតពីបញ្ហាណាមួយដែលបង្កឡើងដោយសារកម្រិតនៃកូឡេស្តេរ៉ូលមិនល្អឡើងខ្ពស់ ចូរព្យាយាមធ្វើសកម្មភាពរាងកាយ ឬហាត់ប្រាណអោយបានទៀងទាត់។
៦. ប្រវត្តិគ្រួសារ
ក្នុងករណីខ្លះ មូលហេតុនៃបញ្ហាកូឡេស្តេរ៉ូលមិនល្អឡើងខ្ពស់ គឺដោយសារប្រវត្តិគ្រួសារ ឬតំណពូជ។ ហើយករណីបែបនេះអាចបណ្ដាលអោយអ្នកប្រឈមមុខនឹងហានិភ័យខ្ពស់នៃជំងឺសសៃឈាមបេះដូង ឬការគាំងបេះដូងទាំងវ័យក្មេង៕
