ចង់អោយស្បែកស្រស់ស្អាតក្មេងជាងវ័យបានយូរដោយមិនចាំបាច់ចំណាយប្រាក់អស់ច្រើនមែនទេ? (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ងាយណាស់! អ្វីដែលអ្នកត្រូវធ្វើ គឺគ្រាន់តែយកចិត្តទុកដាក់ខ្ពស់លើរបបអាហារប្រចាំថ្ងៃ។ នោះក៏ព្រោះតែ អ្វីដែលយើងទទួលទានជះឥទ្ធិពលចំពោះសុខភាពរាងកាយទាំងមូលតែម្ដង រួមទាំងស្បែកផងដែរ។ ថាតើអាហារអ្វីខ្លះទៅដែលអ្នកគួរទទួលទានដើម្បីរក្សាបាននូវស្បែកក្មេងជាងវ័យគួរអោយទាក់ទាញ? ខាងក្រោមវេបសាយ Health.com.kh នឹងបង្ហាញឱ្យដឹង
ពីអាហារទាំងនោះ ៖
១. ផ្លែបឺរ
មានផ្ទុកសម្បូរទៅដោយជាតិខ្លាញ់ល្អ monounsaturated ដែលជួយរក្សាជាតិសំណើមនៃស្បែកបានយ៉ាងប្រសើរ ខណៈដែលស្នាមជ្រីវជ្រួញងាយនឹងលេចឡើងចំពោះស្បែកស្ងួត។ លើសពីនេះទៅទៀត ជាតិខ្លាញ់ monounsaturated ក៏ជួយអោយរាងកាយអាចស្រូបសារធាតុចិញ្ចឹម និងវីតាមីនផ្សេងៗដែលស្បែកត្រូវការបានពេញលេញផងដែរ។
២. ប្រូខូលី ឬផ្កាខាត់ណាខៀវ
ជាប្រភពដ៏ប្រសើរនៃវីតាមីន C វីតាមីន K ជាតិសសៃ សារធាតុប្រឆាំងអុកស៊ីតកម្ម សារធាតុ folate កាល់ស្យូម និង lutein ដែលមានប្រសិទ្ធិភាពខ្ពស់ជួយប្រយុទ្ធប្រឆាំងភាពចាស់តាមវ័យ និងការរលាកគួរអោយកត់សម្គាល់។ រាងកាយត្រូវការវីតាមីន C ដើម្បីបង្កើនការផលិតកូឡាជែនដែលរក្សាភាពបត់បែន និងរឹងមាំនៃស្បែក។
៣. តែបៃតង
មានផ្ទុកសារធាតុ catechins និង polyphenols ដែលមានប្រសិទ្ធិភាពខ្ពស់បំផុតជួយការពារស្បែកមិនអោយទទួលរងការបំផ្លាញពីសំណាក់ពន្លឺព្រះអាទិត្យ ព្រមទាំងទប់ស្កាត់ភាពចាស់តាមវ័យនៃស្បែកបានយ៉ាងប្រសើរផងដែរ។ ដូច្នេះកុំភ្លេចទទួលទានតែបៃតង ១ ពែងជាប្រចាំ។
៤. ត្រីសាលម៉ុន
ជាប្រភពដ៏ប្រសើរនៃអាស៊ីតខ្លាញ់អូមេហ្គា ៣ ដែលជួយកាត់បន្ថយការរលាកក្នុងរាងកាយ។ ក្រៅពីនេះត្រីសាលម៉ុនក៏មានផ្ទុក dimethylaminoethanol ខ្ពស់ដែលជួយការពារកោសិកាស្បែកឱ្យរក្សាបាននូវសុខភាពល្អជានិច្ច។ តាមរយៈការពង្រឹងភាពរឹងមាំនៃកោសិកា នោះមានន័យថា អ្នកកំពុងតែទប់ស្កាត់ភាពចាស់មុនអាយុហើយ។ ដើម្បីទទួលបានលទ្ធផលកាន់តែប្រសើរចំពោះសុខភាព និងសម្រស់ ចូរព្យាយាមទទួលទានឱ្យបានយ៉ាងហោចណាស់ ៣ ដងក្នុងមួយសប្តាហ៍។
៥. ការ៉ុត
ជាប្រភពដ៏ប្រសើរនៃវីតាមីន A ដែលមិនត្រឹមតែល្អសម្រាប់សុខភាពភ្នែកប៉ុណ្ណោះទេ ប៉ុន្តែក៏ជួយកម្ចាត់មុន និងការរលាកលើស្បែកផងដែរ។ វីតាមីន A ឬ beta-carotene កាត់បន្ថយការផលិតហួសកម្រិតនៃកោសិកាស្បែកក្នុងស្រទាប់ខាងក្រៅនៃស្បែក។ ហើយវាក៏ជួយកាត់បន្ថយការប្រមូលផ្ដុំនៃកោសិកាស្បែកងាប់ៗដែលអាចបង្កការរាំងស្ទះដល់រន្ធញើសផងដែរ៕