មកទល់នាពេលបច្ចុប្បន្ន ផ្កាខាត់ណា ជាបន្លែដែលកំពុងទទួលបានការពេញនិយមគួរអោយកត់សម្គាល់ ដោយសារវាមានរសជាតិឆ្ងាញ់ ហើយអាចយកមកធ្វើម្ហូបបានច្រើនមុខ រួមទាំងអាហារសាឡាដផងដែរ។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) បើទោះជាភាគច្រើននៃពួកយើងសុទ្ធតែស្គាល់ និងធ្លាប់ទទួលទានបន្លែនេះញឹកញាប់យ៉ាងណាក៏ដោយ ក៏ប្រហែលជាមិនបានចាប់អារម្មណ៍អំពីអត្ថប្រយោជន៍នៃការទទួលទានផ្កាខាត់ណាចំពោះសុខភាពរាងកាយឡើយ! ថ្ងៃនេះវេបសាយសុខភាព Health.com.kh នឹងបង្ហាញឲ្យដឹងពីផលវិជ្ជមានគួរឲ្យភ្ញាក់ផ្អើលនៃការទទួលទានផ្កាខាត់ណាចំពោះសុខភាពទប់ស្កាត់ជំងឺផ្សេងៗ ៖

១. សុខភាពប្រព័ន្ធរំលាយអាហារ

ផ្កាខាត់ណាមានផ្ទុកសម្បូរទៅដោយជាតិសសៃដែលគាំទ្រដល់មុខងារប្រព័ន្ធរំលាយអាហារបានយ៉ាងប្រសើរ។ លើសពីនេះទៅទៀត ផ្កាខាត់ណា ក៏ជាប្រភពដ៏ល្អបំផុតមួយនៃសារធាតុ glucoraphanin ដែលមានប្រសិទ្ធិភាពជួយការពារស្រទាប់ក្រពះពីបញ្ហាផ្សេងៗ រួមបញ្ចូលទាំងការរលាក និងដំបៅក្រពះផងដែរ។

២. ទប់ស្កាត់ជំងឺមហារីក

ផ្កាខាត់ណា ជាប្រភពដ៏ប្រសើរនៃសារធាតុ sulforaphane ជួយប្រយុទ្ធប្រឆាំងកោសិកាមហារីកពន្យឺត និងរារាំងការរីកលូតលាស់ដុំសាច់។ លើសពីនេះទៅទៀត ផ្កាខាត់ណា ក៏មានផ្ទុកសារធាតុដែលជួយកាត់បន្ថយអ័រម៉ូន estrogens ហើយជាធម្មតាអ័រម៉ូននេះនឹងបង្កជាជំងឺមហារីកក្នុងរាងកាយនៅពេលកើនច្រើនលើស។ យោងតាមការសិក្សាស្រាវជ្រាវជាច្រើនបានបង្ហាញថា ផ្កាខាត់ណា គឺជាជម្រើសនៃអាហារដ៏សាកសមបំផុតសម្រាប់ទប់ស្កាត់ជំងឺមហារីកសុដន់, មហារីកក្រពេញប្រូស្តាត និងមហារីកស្បូន។

៣. សុខភាពបេះដូង

លក្ខណៈសម្បត្តិប្រឆាំងការរលាកនៃសារធាតុ sulforaphane ក្នុងផ្កាខាត់ណាអាចជួយទប់ស្កាត់ការខូចខាតនៃសសៃឈាមដែលបង្កមកពីការរលាកដោយសារតែបញ្ហាជាតិស្ករក្នុងឈាមរ៉ាំរ៉ៃ។ ផ្កាខាត់ណា គឺប្រសើរបំផុតសម្រាប់សុខភាពបេះដូងរឹងមាំជៀសផុតពីបញ្ហាផ្សេងៗ រួមទាំងជំងឹសសៃឈាមបេះដូង ខណៈដែលវាមានផ្ទុកសម្បូរទៅដោយជាតិសសៃអាស៊ីតខ្លាញ់ល្អ និងវីតាមីន ជួយគ្រប់គ្រងសម្ពាធឈាមក្នុងរាងកាយ ព្រមទាំងកាត់បន្ថយកម្រិតកូឡេស្តេរ៉ូលមិនល្អ។

៤. បន្សាបជាតិពុលក្នុងរាងកាយ

ផ្កាខាត់ណា ជាប្រភពដ៏សម្បូរបែបនៃជាតិសសៃដែលជួយកម្ចាត់ជាតិពុលចេញពីរាងកាយតាមរយៈបំពង់រំលាយអាហារ។ ផ្កាខាត់ណាក៏មានផ្ទុកសម្បូរទៅដោយសារធាតុប្រឆាំងអុកស៊ីតកម្ម ជាពិសេស phytonutrients ដែលជួយក្នុងដំណើរការបន្សាបជាតិពុលនៃរាងកាយឲ្យកាន់តែមានលក្ខណៈសកម្មប្រសើរឡើងគួរអោយកត់សម្គាល់។ លើសពីនេះទៅទៀត សារធាតុ thiocyanates និង glucosinolates នៃផ្កាខាត់ណាក៏ជួយបង្កើនសមត្ថភាពមុខងាររបស់ថ្លើមក្នុងការបន្សាបសារធាតុពុលផ្សេងៗដែលបង្កជំងឺមហារីកចេញពីរាងកាយផងដែរ។

៥. កាត់បន្ថយប្រតិកម្មអាឡែកស៊ី និងការរលាកក្នុងរាងកាយ

ផ្កាខាត់ណា មានផ្ទុកសម្បូរទៅដោយអាស៊ីតខ្លាញ់អូមេហ្គា ៣ ជួយប្រយុទ្ធប្រឆាំងនឹងការរលាកផ្សេងៗក្នុងរាងកាយ។ បន្លែនេះជាជម្រើសនៃអាហារដ៏ប្រសើរសម្រាប់អ្នកជំងឺរលាកសន្លាក់ ក៏ព្រោះវាមានផ្ទុកសារធាតុ sulforaphane ជួយទប់ស្កាត់អង់ស៊ីមដែលបង្កការរលាកដល់សន្លាក់។  ក្រៅជំងឺរលាកសន្លាក់ហើយនោះ លក្ខណៈសម្បត្តិប្រឆាំងការរលាកនៃផ្កាខាត់ណាក៏ទប់ស្កាត់កាត់បន្ថយហានិភ័យនៃជំងឺផ្សេងៗដែលបង្កឡើងដោយសារការរលាកក្នុងរាងកាយ ដូចជាជំងឺធាត់ជ្រុល និងជំងឺទឹកនោមផ្អែមផងដែរ។ លើសពីនេះទៅទៀត ផ្កាខាត់ណាក៏ជាប្រភពនៃសារធាតុ kaempferol ដែលជួយកាត់បន្ថយផលប៉ះពាល់បណ្ដាលមកពីប្រតិកម្មអាឡែកស៊ីគួរអោយកត់សម្គាល់។

៦. សុខភាពខួរក្បាល

ផ្កាខាត់ណា ជាប្រភពដ៏ប្រសើរនៃសារធាតុ choline ដែលដើរតួនាទីយ៉ាងសំខាន់បំផុតមួយក្នុងការអភិវឌ្ឍខួរក្បាល និងរក្សាការចងចាំ។ ការទទួលទានផ្កាខាត់ណាអាចសូម្បីតែទប់ស្កាត់បញ្ហាថយចុះការចងចាំទាក់ទងនឹងអាយុទៀតផង៕