ការឈឺទ្រូង ឬមិនស្រួលក្នុងទ្រូងគឺជាអាការៈច្បាស់មួយនៃការគាំងបេះដូង។ ប៉ុន្តែយកល្អគួរតែសម្គាល់ថា ដោយសារតែអ្នកកំពុងតែឈឺ ឬមិនស្រួលក្នុងទ្រូង វាមិនប្រាកដទាំងអស់ថា បេះដូងអ្នកមានបញ្ហាឡើយ។ (អាន:ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?)មានករណីច្រើនណាស់ដែលនិយាយថា ការឈឺទ្រូងក៏ដោយសារតែមូលហេតុអ្វីផ្សេងក្រៅពីបេះដូងដែរ ដូចជា ការថប់អារម្មណ៍ ការភ័យខ្លាច ការច្រាលទឹកអាស៊ីតក្រពះ និងរលាកសន្លាក់ឆ្អឹងជំនីជាដើម។ ទោះបីជាយ៉ាងណាក៏ដោយ តើអ្នកមានដឹងទេថា មានអាការៈមួយចំនួនដែលអាចបញ្ជាក់ថា បេះដូងអ្នកមានបញ្ហាដែរ ទោះបីជាមិនមានការឈឺ ឬមិនស្រួលក្នុងទ្រូងក៏ដោយ។
អស់កម្លាំងខ្លាំង
អ្នកជំនាញខាងជំងឺបេះដូងបានឲ្យដឹងថា ការអស់កម្លាំងខ្លាំងក្លាពេលខ្លះគឺជាសញ្ញាមួយបញ្ជាក់ថា បេះដូងកំពុងតែខ្សោយដែរ។ នេះដោយសារតែបេះដូងមិនអាចធ្វើការងាររបស់វាក្នុងការច្របាច់ឈាមទៅចិញ្ចឹមរាងកាយទាំងមូលបាន។ ដោយសារតែសាច់ដុំ និងសរីរាង្គសំខាន់ៗមួយចំនួនមិនទទួលបានអុកស៊ីសែនគ្រប់គ្រាន់ ដូច្នេះវាពិតជាងាយនឹងធ្វើឲ្យអស់កម្លាំងគ្រប់ពេលណាស់។
ក្អក
ជាធម្មតា ការក្អក គឺជារ៉េផ្លិចរបស់រាងកាយក្នុងការបញ្ចេញអ្វីដែលជាប់ស្ទះក្នុងបំពង់ករ ឬជាអាការៈនៃការបង្ករោគនៅផ្លូវដង្ហើមខាងលើ។ ប៉ុន្តែការខ្សោយបេះដូង ក៏អាចជាមូលហេតុនាំឲ្យក្អកបានដែរ។ នេះដោយសារតែបេះដូងមិនអាចច្របាច់ឈាមបានល្អ នោះវានឹងធ្វើឲ្យចាលជាតិទឹកក្នុងសួត ហើយក៏រ៉េផ្លិតជាការក្អកតែម្តងទៅ។ អាការៈផ្សេងៗទៀតអាចមានដូចជា ពិបាកដកដង្ហើម បេះដូងលោតញ៉ាប់ និងមិនអាចហាត់ប្រាណបាន។
ហើមកែងជើង
ការហើមកែងជើង ក៏ត្រូវបានគេចាត់ទុកថា ជាសញ្ញាមួយនៃការខ្សោយបេះដូងដែរ ដោយសារតែវានឹងធ្វើឲ្យចាលជាតិទឹកនៅជើង ដោយសារតែបេះដូងមិនអាចច្របាច់ឈាមបានយ៉ាងល្អ។ ប៉ុន្តែវាមិនមែនមានន័យថា ឲ្យតែហើមជើងដឹងតែខ្សោយបេះដូងទាំងអស់ឡើយ។ យកល្អគួរតែសម្គាល់ថា ការហើមកែងជើង អាចដោយសារតែរឿងច្រើនដូចជា ការឈរ ឬអង្គុរយរយៈពេលយូរ ការស្លៀកខោតឹងៗ ធាត់ជ្រុល និងគ្រិចកែងជើងជាដើម។ (អាន:ថ្នាំងងុយគេង ពេលអ្នកគួរប្រើ)
ក្រពះមិនកិន
ពិតណាស់ ក្រពះមិនកិនច្រើនតែអាចគិតថា ដោយសារតែអ្នកញ៉ាំអាហារច្រើនជ្រុល ឬញ៉ាំអាហារខុស ប៉ុន្តែការគាំងបេះដូង ក៏អាចស្តែងអាការៈនេះចេញបានដែរ ជាពិសេសស្រ្តីតែម្តង។ ពេលខ្លះ ការក្អួតក៏អាចកើតឡើងជាមួយគ្នាដែរ៕
