អ្នកដែលមិនធ្លាប់ជិះយន្តហោះ ឬទើបតែជិះយន្តហោះលើកដំបូងតែងព្រួយបារម្ភទៅបញ្ហាផ្សេងៗ ជាពិសេសបញ្ហាសុខភាពផ្ទាល់ខ្លួន។ ជាការពិតណាស់ នៅពេលដែលអ្នកជិះយន្តហោះតែងមានអាការៈវិលមុខ ចង់ក្អួតចង្អោរ ឬមានអារម្មណ៍មិនល្អកំពុងពេលហោះហើរ ដែលបណ្ដាលមកពីមូលហេតុជាច្រើន។ ខាងក្រោមនេះ ជាគន្លឹះសំខាន់ៗ ចែករំលែកពីអ្នកបើកបរយន្តហោះរបស់កម្ពុជាមួយរូបសុំមិនបញ្ចេញឈ្មោះ សម្រាប់អ្នកដែលមិនធ្លាប់ជិះយន្តហោះ ឬអ្នកដែលតែងតែពុលពេលជិះយន្តហោះ គួរតែដឹង ដើម្បីកាត់បន្ថយបញ្ហាផ្សេងៗ។
១. ញ៉ាំថ្នាំកុំឱ្យក្អួត
សម្រាប់អ្នកមិនដែលជិះយន្តហោះ ហើយគិតថាសុខភាពមិនសូវរឹងមាំ គួរលេបថ្នាំការពារកុំឱ្យក្អួត។ អាការៈពុលយន្តហោះ មិនខុសពីពុលរថយន្តនោះទេ ប៉ុន្តែមានថ្នាំសម្រាប់ការពារបាន។ ដូច្នេះហើយគួររកទិញថ្នាំការពារពុលយន្តហោះ មុនហោះហើរដើម្បីការពារបញ្ហាពុល។ ថ្នាំការពារបញ្ហាពុលយន្តហោះនេះ អ្នកអាចរកទិញបាននៅតាមបណ្ដាឱសថស្ថាននានា។
២. អង្គុយជិតបង្អួចយន្តហោះសម្រាប់អ្នកជិះដំបូង
ចំណុចសំខាន់គួរដឹង ចំពោះអ្នកដែលជិះយន្តហោះលើកដំបូង គួរតែអង្គុយនៅជិតបង្អួចយន្តហោះ។ មូលហេតុនេះដោយសារតែនៅពេលអ្នកអង្គុយក្បែរបង្អួចយន្តហោះ ធ្វើឱ្យអ្នកមានអារម្មណ៍ថាខ្លួនមានលំនឹង និងមានអ្វីដើម្បីទប់ខ្លួន។ ដូច្នេះហើយ សម្រាប់ប្រិយមិត្តដែលមិនធ្លាប់ជិះយន្តហោះកន្លងមក មិនគួរអង្គុយតំបន់កណ្ដាលនោះទេ។
៣. សម្លឹងតាមបង្អួចយន្តហោះមើលអ្វីដែលនឹង
ត្រង់ចំណុចនេះពិតជាសំខាន់ខ្លាំងណាស់ សម្រាប់អ្នកដែលមានអាការៈពុលយន្តហោះ អំឡុងពេលហោះហើរ។ ប្រសិនបើអ្នកពុល ពេលកំពុងហោះហើរ អ្នកអាចមើលទៅផ្នែកខាងក្រៅតាមបង្អួចយន្តហោះ ហើយសម្លឹងទៅមើលអ្វីដែលនឹងតាមកញ្ចក់។ មូលហេតុដែលបណ្ដាលឱ្យអ្នកពុល ព្រោះអារម្មណ៍ និងខ្លួនរបស់អ្នកមិននៅជាមួយគ្នា មិនដឹងថាខ្លួនឯងកំពុងមានចលនាអ្វី ហើយអារម្មណ៍កំពុងគិតពីអ្វី។ ដូច្នេះនៅពេលអ្នកមើលអ្វីដែលមានលំនឹង ដូចជាពពកជាដើម ធ្វើឱ្យអ្នកដឹងថាយន្តហោះកំពុងមានចលនា ហើយអ្នកកំពុងតែជិះយន្តហោះ គឺអាចកាត់បន្ថយអាការៈពុលបាន។
៤. កុំញ៉ាំច្រើនពេកមុនពេលហោះហើរ
មូលហេតុមួយទៀតដែលបណ្ដាលឱ្យអ្នកពុលយន្តហោះនោះ គឺការញ៉ាំអាហារច្រើនពេកមុនពេលពេលហោះហើរ។ ដូច្នេះហើយមុនពេលឡើងយន្តហោះ គួរញ៉ាំអីបន្តិចបន្តួចបានហើយ កុំញ៉ាំរហូតដល់ឆ្អែតខ្លាំង ព្រោះអាចធ្វើឱ្យអ្នកពុលអំឡុងពេលយន្តហោះកំពុងហោះហើរ។
៥. កុំគិតទៅលើបញ្ហាអ្វីដែលមិនល្អ
មុនពេលឡើងយន្តហោះ ឬអំឡុងពេលជិះយន្តហោះ ដើម្បីកុំឱ្យពុល ឬមានអារម្មណ៍មិនល្អ អ្នកមិនត្រូវគិតអ្វីផ្ដេសផ្ដាសនោះទេ។ អ្នកជិះយន្តហោះដែលបណ្ដាលឱ្យពុល ឬនៅមិនសុខក្នុងអារម្មណ៍ មកពីគិតទៅលើសុវត្ថិភាពខ្លាំង ដូចជាគិតថា ខ្លាចយន្តហោះមានបញ្ហា ព្រួយបារម្ភទៅលើអ្នកបើកយន្តហោះ ឬភ័យក្នុងចិត្តជាដើម។ ដូច្នេះហើយដើម្បីឱ្យមានអារម្មណ៍ល្អ ឬផាសុកភាពក្នុងពេលហោះហើរ អ្នកត្រូវធ្វើអារម្មណ៍ល្អ គិតអ្វីដែលវិជ្ជមាន៕
៦. ត្រូវដឹងខ្លះៗពីប្រព័ន្ធការពាររបស់យន្តហោះ
មុននឹងជ្រើសរើសជើងហោះហើរណាមួយ ដើម្បីធ្វើដំណើរ អ្នកគួរតែសិក្សាខ្លះៗ ពីលក្ខណៈបច្ចេកទេស របស់យន្តហោះនោះ។ អ្នកត្រូវដឹងថា តើយន្តហោះនោះមានប្រព័ន្ធការពារដែរឬទេ? នៅពេលដែលយន្តហោះមានបញ្ហា។ ជាទូទៅយន្តហោះតែងមានប្រព័ន្ធជាច្រើន ដើម្បីអាចហោះហើរបានតែនៅពេលដែលប្រព័ន្ធមួយមានបញ្ហា គឺមានប្រព័ន្ធមួយទៀតដើម្បីជំនួស។ ដូច្នេះហើយនៅពេលដែលអ្នកបើកយន្តហោះដឹងថា ប្រព័ន្ធណាមួយបញ្ចេញសញ្ញាណមិនល្អ គេតែងចុះចតជាបន្ទាន់ដើម្បីធ្វើការដោះដូរ៕
ប្រភព៖ saby.com.kh