ស្គាល់ “ផ្លែគីវី” អត់? ផ្លែឈើនេះល្អណាស់ចំពោះសុខភាព ទប់ស្កាត់ជំងឺជាច្រើន

គីវី ជាផ្លែឈើមួយប្រភេទដែលមានរសជាតិជូរអែម ហើយមានផ្ទុកសម្បូរទៅដោយសារធាតុចិញ្ចឹមចាំបាច់សម្រាប់រក្សាសុខភាពរាងកាយល្អប្រសើរ។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) បើទោះជាភាគច្រើននៃពួកយើងស្គាល់ និងធ្លាប់ទទួលទានផ្លែនេះ ប៉ុន្តែប្រហែលជាមិនបាច់ចាប់អារម្មណ៍ពីអត្ថប្រយោជន៍នៃផ្លែគីវីចំពោះសុខភាពជួយទប់ស្កាត់ជំងឺផ្សេងៗឡើយ។ ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីមូលហេតុដែលអ្នកគួរទទួលទានផ្លែគីវីជាប្រចាំ ៖

១. ស្បែកស្រស់ស្អាត

គីវី ជាប្រភពដ៏ប្រសើរបំផុតមួយនៃវីតាមីន C ដែលមានប្រសិទ្ធិភាពក្នុងការរក្សា និងបង្កើនការផលិតកូឡាជែននៃស្បែក។ វីតាមីន C ក៏ជាសារធាតុប្រឆាំងអុកស៊ីតកម្មដ៏មានឥទ្ធិពលជួយទប់ស្កាត់ការបំផ្លាញស្បែកដោយសារជាតិពុល និងពន្លឺព្រះអាទិត្យផងដែរ។ ការទទួលទានផ្លែគីវីនឹងផ្ដល់ឱ្យអ្នកនូវស្បែកដែលមានសុខភាពល្អ ព្រមទាំងគ្មានស្នាមជ្រីវជ្រួញទៀតផង។

២. សុខភាពភ្នែក

ផ្លែគីវីក៏មានផ្ទុកសម្បូរទៅដោយសារធាតុ phytochemical lutein ដែលជួយទប់ស្កាត់បញ្ហាងងឹតភ្នែកទាក់ទងនឹងកត្តាអាយុ។ វាក៏ជួយការពារភ្នែកមិនឱ្យទទួលរងការបំផ្លាញពីសំណាក់រ៉ាឌីកាល់សេរីបានយ៉ាងប្រសើរផងដែរ។

៣. បញ្ចុះសម្ពាធឈាម

គីវី ជាប្រសើរបំផុតមួយនៃជាតិប៉ូតាស្យូមដែលជួយកាត់បន្ថយឥទ្ធិពលនៃជាតិសូដ្យូមក្នុងរាងកាយទប់ស្កាត់ហានិភ័យនៃបញ្ហាសម្ពាធឈាមឡើងខ្ពស់។ ហើយសម្ពាធឈាមប្រក្រតីនឹងធ្វើឱ្យអ្នកជៀសផុតពីបញ្ហានៃជំងឺបេះដូង, ជំងឺដាច់សសៃឈាមខួរក្បាល ព្រមទាំងជំងឺលើសឈាម។

៤. សុខភាពបេះដូង

ក្រៅពីជាតិប៉ូតាស្យូម ផ្លែគីវីក៏មានផ្ទុកសម្បូរទៅដោយជាតិសសៃដែលជួយរក្សាពង្រឹងសុខភាពបេះដូងតាមរយៈការកាត់បន្ថយកម្រិតកូឡេស្តេរ៉ូល និងសម្ពាធឈាម។ ដូច្នេះប្រសិនបើអ្នកចង់ជៀសផុតពីបញ្ហាផ្សេងៗទាក់ទងនឹងបេះដូង ចូរព្យាយាមទទួលទានផ្លែគីវីឱ្យបានទៀងទាត់។

៥. ទប់ស្កាត់អាការៈទល់លាមក

ផ្លែគីវីមិនត្រឹមតែមានផ្ទុកសម្បូរទៅដោយជាតិសរសៃប៉ុណ្ណោះទេ ប៉ុន្តែក៏ជាប្រភពដ៏ប្រសើរនៃ អង់ស៊ីមមួយឈ្មោះថា Actinidain ដែលជួយផ្តល់ភាពវិជ្ជមានដល់ចលនាពោះវៀន និងទម្លាប់នៃការបន្ទោរបង់ទៀងទាត់ ព្រមទាំងបង្កើនភាពជ្រាយនៃលាមកគួរឱ្យកត់សម្គាល់។

៦. ទប់ស្កាត់ជំងឺហឺត

បរិមាណខ្ពស់នៃវីតាមីន C ក្នុងផ្លែគីវីក៏មានប្រសិទ្ធិភាពសម្រួលដល់ផ្លូវដង្ហើមដែលប្រសើរសម្រាប់អ្នកជំងឺហឺតដែលពិបាកដកដង្ហើមផងដែរ៕