ពាក្យសម្ដី និងសកម្មភាពមួយចំនួនដែលយើងបានជ្រុលជ្រួសនៅពេលដែលមិនសប្បាយចិត្ត ឬកំពុងមានជម្លោះ គឺវាងាយនឹងធ្វើឱ្យប៉ះពាល់ដល់ភាគីមា្ខងទៀតបំផុត ហើយភាពឈឺចាប់ក៏អាចដិតដាមជាប់ក្នុងចិត្តយូរថែមទៀតផង។  (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ថាតើទង្វើអ្វីខ្លះទៅដែលអ្នកគួរជៀសវាងនៅពេលឈ្លោះប្រកែកគ្នាជាមួយមនុស្សជាទីស្រឡាញ់? ថ្ងៃនេះវេបសាយសុខភាព Health.com.kh នឹងបង្ហាញឱ្យដឹងពីសកម្មភាពដែលអ្នកមិនគួរប្រពឹត្តក្នុងកំឡុងពេលមានជម្លោះ ប្រសិនបើចង់ក្សាទំនាក់ទំនងស្នេហាបានយូរ ៖

១. កុំទាញសមាជិកដ៏ទៃទៀតក្នុងគ្រួសារមកពាក់ព័ន្ធ

ពិតណាស់ជម្លោះដែលកើតឡើង គឺរវាងអ្នកទាំងពីរ ហើយមិនពាក់ព័ន្ធជាមួយអ្នកផ្សេងឡើយ។ ប្រសិនបើអ្នកទាញឪពុកម្តាយចូលមកក្នុងរឿងនេះដែរ គឺវាអាចនឹងធ្វើឱ្យស្ថានភាពគ្រួសារកាន់ តែយ៉ាប់យ៊ឺនជាងមុន។ លើសពីនេះទៅទៀត ទោះបីជាបញ្ហាជម្លោះនោះត្រូវបានដោះស្រាយរួចក៏ដោយ ក៏សមាជិកដទៃទៀតក្នុងគ្រួសារនៅតែមានអារម្មណ៍ដិតដាមចំពោះសកម្មភាពនោះ ហើយអាចនឹងយកវាមកវាយប្រហារអ្នក ឫដៃគូររបស់អ្នកនៅពេលក្រោយក៏ថាបាន។

២. ជៀសវាងដាច់ខាតនូវការប្រើប្រាស់ហឹង្សា

នៅពេលឈ្លោះគ្នា ភាគីម្ខាង ឬទាំងសងខាងអាចនឹងបញ្ចេញអាកប្បកិរិយាមិនគប្បីមួយចំនួន ដោយព្យាយាមធ្វើយ៉ាងណាឱ្យតែខ្លួនឯងត្រូវ ហើយពេលខ្លះឈានដល់ការប្រើហឹង្សា។ ដើម្បីជាការប្រសើរទោះជាយ៉ាងណាក៏ដោយ អ្នកគួរព្យាយាមទប់អារម្មណ៍ខ្លួនឯង ក៏ដូចជាដៃគូរកុំអោយឈានដល់ការប្រើហឹង្សា។ របួសរូបរាងកាយ ដែលបង្កឡើងដោយមនុស្សដែលអ្នកស្រលាញ់ គឺឈឺចាប់ខ្លាំងបំផុត ហើយអាចនឹងបំផ្លាញអារម្មណ៍ល្អៗទាំងឡាយដែលអ្នកមានជាមួយគ្នា ឬធា្លប់សាងកន្លងមក។

៣. កុំលាយឡំរឿងដែលមិនពាក់ព័ន្ធចូលគ្នា

ប្រសិនបើជម្លោះកើតមានដោយសារតែរឿងបន្តិចបន្តួចដូចជា  ត្រឹមការមិនលាងចាន អ្នកគួរនិយាយគ្នាត្រឹមរឿងនេះ ដោយមិនទាញបញ្ហាដែលហួសហើយចូលថែម។ អ្នកក៏មិនគួររំលឹកពីរឿងដែលចាស់ៗឥតប្រយោជន៍ពីមុនៗសារឡើងវិញដែរ ក៏ព្រោះវាអាចធ្វើឱ្យរឿងតូចក្លាយជាធំរញ៉េរញ៉ៃភ្លាម។ ចុងក្រោយដៃគូរបស់អ្នកអាចនឹងលើកសំនួរដ៏សមហេតុផលមួយថា “តើគេគួរតែបន្តនូវទំនាក់ទំនងដែលចេះតែមានការទាមទារមិនចេះចប់មិនចេះហើយនេះទៀត ឫអត់?” ជាមិនខាន។

៤. កុំរំលឹកឱ្យសោះពីរឿងលែងលះ

នៅពេលអ្នកនិយាយពាក្យលែងលះកំឡុងពេលមានជម្លោះ គឺវាអាចក្លាយជាសម្ដីបញ្ឈឺដ៏ខ្លាំងបំផុតមួយ។ ពាក្យនេះ គឺធ្ងន់ធ្ងរណាស់ដោយធ្វើឱ្យប៉ះទង្គិចដល់អារម្មណ៍មនុស្សជាទីស្រឡាញ់របស់អ្នកគួរអោយបារម្ភ និងអាចឈានដល់ការលែងលះគ្នាពិតមែនជាមិនខាន។ ប្រសិនបើអ្នកទាំងពីរពិតជាស្រលាញ់គ្នា ចូរកុំនិយាយពីរឿងលែងលះនៅពេលមានកំហឹង​​​ ឬកំពុងឈ្លោះគ្នា។

៥. កុំចាកចេញពីផ្ទះនៅពាក់កណ្ដាលជម្លោះ

ការចាកចេញពីផ្ទះនៅពេលជម្លោះមិនទាន់ដោះស្រាយចប់ គឺវាហាក់ដូចជាបង្ហាញថាអ្នកគ្មានអារម្មណ៍កក់ក្តៅ ឬសប្បាយចិត្តអ្វីបន្តិចក្នុងការរស់នៅក្រោមដំបូលតែមួយនឹងដៃគូរបស់អ្នកឡើយ។ ការគេចចេញទៅក្រៅទាំងដែលបញ្ហានៃជម្លោះមិនទាន់បានដោះស្រាយចប់សព្វគ្រប់ គឺជាសកម្មភាពដែលអាចនឹងធ្វើឱ្យដៃគូគិតឡើងវិញទ្វេដងអំពីកម្រិតនៃភាពចាស់ទុំរបស់អ្នក។ ដើម្បីជាការប្រសើរ ចូររងចាំរហូតដល់អ្នកទាំងពីរស្ងប់អារម្មណ៍ជាងមុន សឹមចាប់ផ្ដើមពិភាក្សាដោះស្រាយរឿងគ្រប់យ៉ាងតាមរបៀបមនុស្សធំ ឬចាស់ទុំ។

 ៦. កុំគេងបែកគ្រែគ្នា

ការគេងគ្រែផ្សេងគ្នាអាចជាសញ្ញាមួយបង្ហាញថា អ្នកមិនទាន់ត្រៀមខ្លួនរួចក្នុងការស្តារស្ថានការណ៍ឡើងវិញ។ ទម្លាប់ប្រចាំថ្ងៃ ដូចជាការគេងលើគ្រែតែមួយ ឬគេងជិតគ្នាដូចធម្មតានឹងជួយកែប្រែស្ថានការណ៍អោយល្អវិញបានយ៉ាងឆាប់រហ័ស។ ពិតណាស់ ដំបូងអ្នកអាចនឹងគេងបែរខ្នងដាក់គ្នា ប៉ុន្តែនៅពេលក្រោកឡើង អ្នកនឹងនៅក្នុងរង្វង់ដៃមនុស្សជាទីស្រលាញ់ទាំងមិនដឹងខ្លួនផងក៏ថាបាន ហើយអារម្មណ៍មិនល្អដាក់គ្នាកាលពីយប់ក៏អាចនឹងបាត់អស់តាមនោះដែរ។

៧. កុំឈ្លោះគ្នានៅទីសាធារណៈ

ប្រសិនបើអ្នកចេះតែបណ្តោយខ្លួនឯង និងគូស្នេហ៍ឈ្លោះប្រកែកគ្នានៅទីសាធារណៈ នោះ ពិតណាស់វាអាចជាសកម្មភាពមួយបង្ហាញថា អ្នកគ្មានការគោរពអោយតម្លៃចំពោះដៃគូ រួមទាំងអ្នកដទៃដែលនៅជុំវិញខ្លួនផងដែរ។ យកល្អអ្នកគួរគប្បីកុំហែកកេរ្តិ៍ខ្លួនឯងជាមួយដៃគូ ឬបញ្ហាគ្រួសាររនៅតាមទីសាធារណៈឱ្យអ្នកផ្សេងបានដឹង ដោយព្យាយាមដោះស្រាយបញ្ហាជម្លោះ នៅផ្ទះវិញទើបប្រសើរជាង៕