ជួយចែករំលែក! លំហាត់ប្រាណដ៏ល្អបំផុតសម្រា​ប់អ្នកជំងឺទឹកនោមផ្អែម

ការធ្វើលំហាត់ប្រាណអាចផ្ដល់នូវអត្ថប្រយោជន៍ស្មានមិនដល់ជាច្រើនសម្រាប់អ្នកជំងឺទឹកនោមផ្អែម រួមបញ្ចូលទាំងជួយបញ្ចុះកម្រិតនៃជាតិស្ករក្នុងឈាម និងស្ត្រេស។ (អាន ៖ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ប៉ុន្តែថាតើការធ្វើលំហាត់ប្រាណប៉ុន្មានទៅទើបត្រឹមត្រូវ​? មជ្ឈមណ្ឌលស្រាវជ្រាវផ្នែកវេជ្ជសាស្ត្រដ៏សំខាន់បំផុតមួយនៅលើពិភពលោក NIH បាននែនាំឱ្យធ្វើលំហាត់ប្រាណយ៉ាងហោចណាស់ ១៥០ នាទីរាល់សប្តាហ៍។ ហើយចំពោះអ្នកជំងឺទឹកនោមផ្អែមត្រូវហាត់ប្រាណជាប្រចាំមិនគួរផ្អាក ឬរំលងលើសពី ២ ថ្ងៃជាប់គ្នាឡើយ។ ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីលំហាត់ប្រាណដ៏ល្អសាកសមបំផុតសម្រាប់អ្នកជំងឺទឹកនោមផ្អែម ៖

១. ហែលទឹក

ការហែលទឹក គឺជាទម្រង់នៃលំហាត់ប្រាណបែបងាយៗ និងសាកសមបំផុតសម្រាប់អ្នកជំងឺទឹកនោមផ្អែមប្រភេទទី ២។ នោះក៏ព្រោះតែការហែលទឹកមិនផ្ដល់សម្ពាធណាមួយលើសន្លាក់ដែលល្អសម្រាប់អ្នកជំងឺ។ ហើយវាក៏ជួយសម្រួល និងពង្រឹងសាច់ដុំបានយ៉ាងប្រសើរផងដែរ។ ការសិក្សាស្រាវជ្រាវជាច្រើបានបង្ហាញឱ្យដឹងថា ការហែលទឹកអាចជួយកាត់បន្ថយកម្រិតកូឡេស្តេរ៉ូល រួមទាំងភាពតានតឹងក្នុងអារម្មណ៍ និងបង្កើនការដុតកាឡូរី។ ដើម្បីជាការប្រសើរអ្នកគួរហែលទឹកឱ្យបានយ៉ាងហោចណាស់ ៣ ដងក្នុងមួយសប្តាហ៍សម្រាប់រយៈពេលតិចបំផុត ១០ នាទី។

២. ដើរ

ការដើរ គឺជាលំហាត់ប្រាណដ៏ពេញនិយម និងងាយបំផុតសម្រាប់អ្នកជំងឺទឹកនោមផ្អែមអនុវត្តជាប្រចាំ។ ការដើរយ៉ាងហោចណាស់ពី ៣០ នាទី ទៅ ១ ម៉ោងក្នុងមួយថ្ងៃមានប្រសិទ្ធិភាពបញ្ចុះសម្ពាធឈាម ក៏ដូចជាជាតិស្ករក្នុងឈាម ព្រមទាំងទប់ស្កាត់ហានិភ័យនៃជំងឺបេះដូង និងជំងឺទឹកនោមផ្អែមបានយ៉ាងប្រសើរ។

៣. យូហ្កា

ការសិក្សាស្រាវជ្រាវជាច្រើនបានបង្ហាញថា ការហាត់យូហ្កាអាចផ្ដល់ឥទ្ធិពលវិជ្ជមានគួរឱ្យភ្ញាក់ផ្អើលចំពោះអ្នកជំងឺទឹកនោមផ្អែម រួមបញ្ចូលទាំងការប្រយុទ្ធប្រឆាំងជាមួយភាពធន់នឹងអាំងស៊ុយលីន, ការបញ្ចុះជាតិខ្លាញ់នៃរាងកាយ និងការបង្កើនមុខងារសសៃប្រសាទ។ យូហ្កាក៏ជួយកាត់បន្ថយភាពតានតឹងក្នុងអារម្មណ៍នៃអ្នកជំងឺផងដែរ។

៤. ជិះកង់

ការជិះកង់មិនត្រឹមតែល្អសម្រាប់អ្នកជំងឺបេះដូងប៉ុណ្ណោះទេ ប៉ុន្តែក៏ប្រសើរសម្រាប់អ្នកជំងឺទឹកនោមផ្អែមផងដែរ។ នោះក៏ព្រោះតែលំហាត់ប្រាណនេះអាចដុតបំផ្លាញកាឡូរីក្នុងរាងកាយបានច្រើន ហើយជួយបង្កើនលំហូរឈាមទៅជើង។

 ៥. រាំ

ក្រៅពីជួយឱ្យអារម្មណ៍ស្រស់ស្រាយ និងរីករាយហើយនោះ ការរាំក៏ជួយឱ្យស្រកទម្ងន់, កាត់បន្ថយស្ត្រេស, បង្កើនភាពសកម្មនៃរាងកាយ និងបញ្ចុះកម្រិតជាតិស្ករក្នុងឈាមបានឆាប់រហ័សគួរឱ្យកត់សម្គាល់។ ការរាំអាចដុតបំផ្លាញកាឡូរីបានដល់ទៅ ១៥០ កាឡូរីក្នុងរយៈពេលត្រឹមតែ ៣០ នាទីដែលធ្វើឱ្យវាក្លាយជាលំហាត់ប្រាណដ៏ល្អបំផុតសម្រាប់អ្នកជំងឺទឹកនោមផ្អែម។

ចំណុចគួរកត់សម្គាល់ 

– កុំភ្លេចតាមដានកម្រិតនៃជាតិស្ករមុន និងក្រោយពេលធ្វើលំហាត់ប្រាណ ដើម្បីអាចដឹងបានថាតើលទ្ធផលល្អប្រសើរ ឬយ៉ាងណា។

– កម្ដៅសាច់ដុំ ៥ នាទីសិន សឹមធ្វើលំហាត់ប្រាណផ្សេងៗ និងកុំភ្លេចសម្រាកក្រោយហាត់រួច។

– ទទួលទានទានឱ្យច្រើននៅមុនពេល, កំឡុងពេល និងក្រោយពេលធ្វើលំហាត់ប្រាណណាមួយ ដើម្បីទប់ស្កាត់បញ្ហាខ្សោះជាតិទឹកក្នុងរាងកាយ។

– អ្នកក៏គួរធ្វើការពិភាក្សាជាមួយគ្រូពេទ្យក្នុងការជ្រើសរើសលំហាត់ប្រាណណាមួយខាងលើមកអនុវត្ត ដើម្បីប្រាកដថាវាមានសុវត្ថិភាព និងសាកសមជាមួយប្រភេទនៃជំងឺទឹកនោមផ្អែមរបស់អ្នក៕