ចេះតែឈឺសន្លាក់មិនឈប់ មានដឹងថា វាបង្កឡើងដោយសារជំងឺអ្វីខ្លះទេ?

ការមានរបួស ការប្រើប្រាស់ច្រើនជ្រុលនិងកង្វះសកម្មភាពរាងកាយសុទ្ធតែជាដើមហេតុដែលអាចធ្វើឲ្យសន្លាក់ឈឺចាប់បានទាំងអស់។ ប៉ុន្តែតើអ្នកមានដឹងទេថា វាក៏មានជំងឺជាច្រើនដែលអាចធ្វើឲ្យសន្លាក់អ្នកឈឺដែរទេ? ខាងក្រោមនេះអ្នកនឹងបានដឹងថាជំងឺខ្លះធ្វើឲ្យអ្នកស្ទើរមិនជឿថា អាចធ្វើឲ្យឈឺសន្លាក់បានសោះផង។ 

ជំងឺរលាកឆ្អឹងខ្ចីក្នុងសន្លាក់

ការឈឺសន្លាក់មានរាប់រយប្រភេទ ហើយការរលាកឆ្អឹងខ្ចីក្នុងសន្លាក់គឺជាជំងឺដែលកើតឡើងញឹកញាប់បំផុតតែម្តង។ នៅពេលការខូចខាតរបស់ឆ្អឹងខ្ចីកើតឡើង ឆ្អឹងនៅពីក្រោមនោះនឹងកកិតគ្នា និងបង្កជាការឈឺចាប់ និងរលាកបាន។ កត្តានៃការរលាកឆ្អឹងខ្ចីក្នុងសន្លាក់ខ្លះមានដូចជា ប្រវត្តិគ្រួសារ អាយុ ធាត់ ឬធាត់ជ្រុល ធ្លាប់មានរបួសនៅសន្លាក់ពីមុន និងការប្រើប្រាស់សន្លាក់ច្រើនជ្រុល។ 

ជំងឺរលាកសន្លាក់ប្រភេទ Rheumatoid Arthritis 

ប្រភេទរលាកសន្លាក់ញឹកញាប់បំផុតមួយនេះច្រើនតែកើតឡើងលើសន្លាក់តូចៗដូចជាប្រអប់ដៃ និងករដៃ។ វាទំនងជាកើតឡើងលើអ្នកជំងឺជាទម្រងដុំៗនៅក្រោមស្បែកផង។ បញ្ហានេះអាចមានឥទ្ធិពលច្រើនទៅលើផ្នែកជាច្រើននៃរាងកាយដូចជា សួត និងសរសៃឈាម។ អ្នកជំនាញជាច្រើននិយាយថា ការរលាកសន្លាក់ប្រភេទ Rheumatoid Arthritis អាចបង្កើនការប្រឈមនឹងជំងឺបេះដូងបាន។ 

ជំងឺរលាកសន្លាក់ហ្គោដ

ទម្រងនៃការរលាកសន្លាក់ប្រភេទនេះគឺឈឺចាប់ខ្លាំងណាស់ ជាពិសេសនៅពេលភ្ញាក់ពីគេងនៅកណ្តាលយប់តែម្តង។ ការឈឺចាប់ច្រើនតែកើតឡើងនៅម្រាមមេជើង។ ម្រាមមេជើងក៏អាចមានលក្ខណៈជាពណ៌ក្រហម និងហើម ហើយក៏មានអារម្មណ៍ក្តៅៗដែរនៅពេលស្ទាប់ប៉ះ។ 

ជំងឺ Lupus 

Lupus គឺជាជំងឺប្រព័ន្ធភាពស៊ាំ ដែលមានន័យថា វាកើតឡើងដោយសារតែប្រព័ន្ធភាពស៊ាំធ្វើការខុសប្រក្រតីដោយខ្លួនឯង។ ជំងឺនេះធ្វើឲ្យខូចខាតដល់សរីរាង្គ និងសន្លាក់ជាច្រើន ហេតុដូច្នេះហើយការឈឺចាប់គឺជារឿងមួយនៃរោគសញ្ញារបស់វា។ 

ជំងឺប្រមេះទឹកបាយ

បើសិនជាអ្នកគិតថា ជំងឺប្រមេះទឹកបាយគឺជាជំងឺកាមរោគ ដែលប៉ះពាល់តែលើប្រដាប់ភេទទេ យកល្អគួរតែគិតឡើងវិញ។ យោងទៅតាមអ្នកជំនាញបានឲ្យដឹងថា វាគឺជារឿងដែលអាចធ្វើឲ្យសន្លាក់អ្នកឈឺដែរ។ ការឈឺសន្លាក់គឺជាផលវិបាកមួយនៃជំងឺប្រមេះទឹកបាយ ហើយវាក៏ជារឿងមួយដែលធ្វើឲ្យឈឺចាប់ខ្លាំង និងហើមសន្លាក់ថែមទៀត៕