គួរអាន! ចូលចិត្តទទួលទានស្ករ ឬអាហារផ្អែមច្រើន ប្រយ័ត្នប្រឈមមុខនឹងបញ្ហាសុខភាពទាំងនេះ

ភាគច្រើននៃពួកយើងប្រហែលជាមិនធ្លាប់ដឹងទេថា ការទទួលទានផ្អែម ឬអាហារមានផ្ទុកជាតិស្ករច្រើនអាចបង្កបញ្ហាសុខភាពគួរឱ្យព្រួយបារម្ភចំពោះសុខភាព។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ដូច្នេះដើម្បីជាការប្រសើរ ចូរកាត់បន្ថយការទទួលទានអាហារ ក៏ដូចជាភេសជ្ជៈផ្អែម។ ប៉ុន្តែថាតើស្ករអាចបង្កបញ្ហាអ្វីខ្លះទៅ? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីបញ្ហាសុខភាពដែលអាចនឹងកើតឡើងដោយសារការទទួលទានជាតិស្ករច្រើន ៖

១. កើនទម្ងន់

នរណាក៏ដឹងដែរថា ការទទួលទានអាហារផ្អែម ឬជាតិស្ករច្រើននឹងធ្វើអោយអ្នកកើនទម្ងន់យ៉ាងឆាប់រហ័ស។ ហើយការកើនទម្ងន់ហួសប្រមាណអាចបង្កបញ្ហាគ្រោះថ្នាក់ធ្ងន់ធ្ងរជាច្រើនចំពោះសុខភាពរាងកាយ រួមទាំងជំងឺធាត់ជ្រុល, ជំងឺទឹកនោមផ្អែម និងជំងឺបេះដូង ជាដើម។

២. ជំងឺបេះដូង

ភាគច្រើននៃពួកយើងសុទ្ធតែដឹងថា របបអាហារដែលមានផ្ទុកសម្បូរទៅដោយជាតិខ្លាញ់ឆ្អែត saturated  និង កូឡេស្តេរ៉ូលខ្ពស់អាចបង្កហានិភ័យនៃជំងឺបេះដូង។ ប៉ុន្តែប្រហែលជាមិនបានចាប់អារម្មណ៍ទេថា ការទទួលទានអាហារសម្បូរទៅដោយជាតិស្ករច្រើនអាចបង្កើនហានិភ័យនៃបញ្ហាបេះដូងគួរអោយព្រួយបារម្ភដែរ។ វេជ្ជបណ្ឌិតជាច្រើននិយាយថា ការរលាក គឺជាអ្វីមួយដែលអាចបង្កជំងឺបេះដូង ហើយជាតិស្ករជាមូលហេតុបង្កើនការរលាកក្នុងរាងកាយ។

៣. ជំងឺធ្លាក់ទឹកចិត្ត Depression

ការស្រាវជ្រាវជាច្រើនបង្ហាញថា ការទទួលទានអាហារមានផ្ទុកសម្បូរទៅដោយជាតិស្ករខ្ពស់អាចបង្កើនហានិភ័យនៃជំងឺធ្លាក់ទឹកចិត្ត។ នោះក៏ព្រោះតែការរលាកដែលជាតិស្ករនាំមកបង្កបញ្ហាអតុល្យភាពនៃអ័រម៉ូន dopamine និង serotonin ក្នុងខួរក្បាល។

៤. ប្រព័ន្ធភាពស៊ាំចុះខ្សោយ

ក្រៅពីសុខភាពបេះដូង និងខួរក្បាល ការរលាកក៏ជះឥទ្ធិពលដល់ប្រព័ន្ធភាពស៊ាំរាងកាយគួរអោយព្រួយបារម្ភផងដែរ។ ហើយនៅពេលប្រព័ន្ធភាពស៊ាំចុះខ្សោយ នោះរាងកាយនឹងឆាប់ឆ្លងជំងឺផ្សេងៗដែលបង្កមកពីបាក់តេរី និងវីរុសជាក់ជាមិនខាន។

៥. មហារីក

បញ្ហាដ៏គួរអោយព្រួយបារម្ភខ្លាំងមួយទៀតនៃការរលាកក្នុងរាងកាយដែលបណ្ដាលមកពីការទទួលទានអាហារផ្អែម ឬជាតិស្ករច្រើន គឺហានិភ័យនៃជំងឺមហារីក។ នេះមានន័យថា ការទទួលទានអាហារផ្អែមច្រើនពេកយូរទៅនឹងបណ្ដាលអោយអ្នកប្រឈមមុខនឹងជំងឺមហារីកនៅថ្ងៃណាមួយ។ ជាតិផ្អែមនឹងបង្កើនទម្ងន់ ហើយកោសិកាខ្លាញ់ហួសប្រមាណក្នុងរាងកាយនាំអោយមានការបញ្ចេញអ័រម៉ូនបង្កជំងឺមហារីក។

៦. ជំងឺទឹកនោមផ្អែម​ប្រភេទទី ២

ការកើនឡើងនូវកម្រិតជាតិស្ករខ្ពស់នៅក្នុងឈាម គឺជាកត្តាចម្បងដែលបង្កហានិភ័យនៃជំងឺទឹកនោមផ្អែមប្រភេទទី ២។ ហើយការទទួលទានអាហារមានផ្ទុកសម្បូរទៅដោយជាតិស្ករច្រើន គឺជាមូលហេតុទូទៅបំផុតមួយដែលបង្កបញ្ហាជាតិស្ករក្នុងឈាមឡើងខ្ពស់៕