ការផ្លាស់ប្ដូររបៀបរស់នៅអាចជួយកាត់បន្ថយហានិភ័យនៃជំងឺមហារីកមាត់ស្បូនបានគួរឱ្យកត់សម្គាល់។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ក្រៅពីការចាក់វ៉ាក់សាំងការពារ, ការឈប់ជក់បារី, រួមភេទដោយសុវត្ថិភាព, គ្មានដៃគូរួមភេទច្រើន, ធ្វើលំហាត់ប្រាណជាប្រចាំហើយនោះ ការជ្រើសយករបបអាហារត្រឹមត្រូវមួយ គឺចាំបាច់ណាស់ ប្រសិនបើអ្នកចង់ជៀសផុតពីជំងឺមហារីកមាត់ស្បូន។ ថ្ងៃនេះវេបសាយសុខភាព Health.com.kh នឹងបង្ហាញឱ្យដឹងពីអាហារដែលអ្នកគួររួមបញ្ចូលក្នុងរបបអាហារប្រចាំថ្ងៃដើម្បីទប់ស្កាត់ហានិភ័យនៃជំងឺមហារីកមាត់ស្បូន ៖

១. ម្ស៉ៅរមៀត

ការទទួលទានអាហារលាយជាមួយម្ស៉ៅរមៀតអាចទប់ស្កាត់ជំងឺមហារីកមាត់ស្បូនគួរឱ្យកត់សម្គាល់។ នោះក៏ព្រោះតែរមៀតជាប្រភពដ៏ប្រសើរនៃសារធាតុ curcumin ដែលជួយការពារកោសិកាសុខភាពល្អមិនឱ្យក្លាយទៅជាកោសិកាមហារីក។

២. បឺរី និងគ្រាប់ធញ្ញជាតិ

ជាប្រភពដ៏ប្រសើរនៃអាស៊ីត ellagic ដែលជួយបង្កើនភាពសកម្មនៃអង់ស៊ីមសំខាន់ៗក្នុងរាងកាយឱ្យធ្វើសកម្មភាពកម្ចាត់ និងទប់ស្កាត់ជាតិពុលដែលបង្កជំងឺមហារីកមាត់ស្បូន។

៣. អាហារមានផ្ទុកសម្បូរទៅដោយវីតាមីន C

វីតាមីន C មានលក្ខណៈសម្បត្តិជាសារធាតុប្រឆាំងអុកស៊ីតកម្មដែលជួយទប់ស្កាត់ការរីកលូតលាស់នៃកោសិកាមហារីក។ ការទទួលទានបន្លែផ្លែឈើ ឬអាហារមានផ្ទុកសម្បូរទៅដោយវីតាមីន C ក៏ជួយពង្រឹងភាពស៊ាំនៃរាងកាយជៀសផុតពីជំងឺផ្សេងៗជាច្រើនផងដែរ។

៤. អាហារមានផ្ទុកសម្បូរទៅដោយជាតិស័ង្កសី

ជាតិស័ង្កសីជួយរាងកាយបង្កើនការផលិតអង់ស៊ីមដែលកម្ចាត់ជាតិពុលបង្កជំងឺមហារីក។ ដូច្នេះដើម្បីជាការប្រសើរ ចូរព្យាយាមទទួលទានអាហារសម្បូរទៅដោយជាតិស័ង្កសី រួមមានសាច់គោ, គ្រឿងសមុទ្រ, បន្លែបៃតង, ល្ពៅ, គ្រាប់ពូជ, គ្រាប់ធញ្ញជាតិ និងសូកូឡាជាដើម។

៥. តែបៃតង

ជាប្រភពដ៏ប្រសើរនៃសារធាតុប្រឆាំងអុកស៊ីតកម្មដែលប្រយុទ្ធប្រឆាំងនឹងកោសិកាមហារីក។ តែបៃតងក៏មានប្រសិទ្ធិភាពកម្ចាត់ការរលាកក្នុងរាងកាយដែលជាអ្វីមួយផ្សារភ្ជាប់ទៅនឹងជំងឺជាច្រើនផងដែរ រួមទាំងជំងឺមហារីក។

៦. អាហារមានផ្ទុកសារធាតុ beta-carotene

Beta-carotene ជាសារធាតុប្រឆាំងអុកស៊ីតកម្មដ៏មានឥទ្ធិពលបំផុតមួយជួយកាត់បន្ថយហានិភ័យនៃជំងឺមហារីក។ ក្រៅពីការ៉ុត ប្រភពដ៏ប្រសើរផ្សេងទៀតនៃសារធាតុនេះ រួមមានដំឡូងផ្អែម, ម្ទេសផ្លោក និងបន្លែបៃតងជាដើម៕