មុនទ្រូង ជាបញ្ហាគួរឱ្យរំខានបំផុតមួយដែលមនុស្សភាគច្រើនជួបប្រទះ! បញ្ហានេះកើតឡើងដោយសារស្បែកផលិតជាតិប្រេង ឬខ្លាញ់ច្រើនលើសដែលអាចធ្វើឱ្យស្ទះរន្ធញើស និងឆ្លងមេរោគ។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ហើយក៏នៅមានមូលហេតុច្រើនផ្សេងទៀតដែលបណ្ដាលឱ្យរោគមុនលេចឡើងនៅលើទ្រូងរបស់អ្នកផងដែរ។ ប៉ុន្តែកុំបារម្ភ! អ្នកអាចកម្ចាត់មុនទ្រូងបានយ៉ាងឆាប់រហ័សជាមួយរូបមន្តបែបធម្មជាតិ។ ថាតើរូបមន្តទាំងនោះមានអ្វីខ្លះទៅ? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីរូបមន្តងាយៗ តែមានប្រសិទ្ធិភាពខ្ពស់ជួយកម្ចាត់មុនទ្រូង ៖
១. ទឹកខ្មេះផ្លែប៉ោម
អ្វីដែលអ្នកត្រូវធ្វើ គឺគ្រាន់តែលាយទឹកខ្មេះផ្លែប៉ោមជាមួយទឹកធម្មតាក្នុងបរិមាណស្មើគ្នា។ កូរឱ្យសព្វ សឹមប្រើសំឡីជ្រលក់លាបលើមុនទ្រូងរបស់អ្នកជាការស្រេច។ អនុវត្តឱ្យបានយ៉ាងហោចណាស់ ២ ដងក្នុងមួយថ្ងៃ។
២. ម្ស៉ៅធញ្ញជាតិ
អ្វីដែលអ្នកត្រូវធ្វើ គឺគ្រាន់តែចម្អិនម្ស៉ៅធញ្ញជាតិ រួចលាយទឹកក្រូចឆ្មារស្រស់ និងទឹកឃ្មុំចំនួន ១ ស្លាបព្រាកាហ្វេចូល រួចកូរឱ្យសព្វ សឹមលាបល្បាយលើទ្រូង។ ទុកចោលសម្រាប់រយៈពេលប្រហែល ៣០ នាទី សឹមលាងចេញជាមួយទឹកក្ដៅឧណ្ហៗជាការស្រេច។
៣. ស្ករស
អ្វីដែលអ្នកត្រូវធ្វើ គឺគ្រាន់តែលាយទឹកក្រូចឆ្មារស្រស់ចំនួន ម្ខាង ជាមួយស្ករសចំនួន កន្លះពែង និងទឹកឃ្មុំឆៅ ១ ស្លាបព្រាបាយចូលគ្នា រួចកូរឱ្យសព្វ។ បន្ទាប់មកលាបម៉ាស្សាល្បាយថ្នមៗលើទ្រូងកន្លែងកើតមុន ហើយទុកចោលសម្រាប់រយៈពេលប្រហែល ៥ នាទី សឹមលាងសម្អាតចេញជាការស្រេច។ អនុវត្តរូបមន្តនេះឱ្យបានយ៉ាងហោចណាស់ពី ១ ទៅ ២ ដងក្នុងមួយសប្តាហ៍៕