ម្នាស់ ជាផ្លែឈើមួយប្រភេទដែលមានរសជាតិជូរអែម ហើយសម្បូរ និងពេញនិយមណាស់ដែរក្នុងប្រទេសកម្ពុជា។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ទោះជាចូលចិត្ត ឬឧស្សាហ៍ទទួលទានញឹកញាប់ក៏ដោយ ក៏អ្នកប្រហែលជាមិនធ្លាប់បានចាប់អារម្មណ៍ដឹងទេថា ផ្លែឈើត្រូពិចនេះមានផ្ទុកសម្បូរទៅដោយអង់ស៊ីម, វីតាមីន និងសារធាតុប្រឆាំងអុកស៊ីតកម្មដែលជួយទប់ស្កាត់ជំងឺមហារីក, ការរលាកក្នុងរាងកាយ ព្រមទាំងដោះស្រាយបញ្ហាសុខភាពជាច្រើនផ្សេងទៀត។ ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីឥទ្ធិពលវិជ្ជមានដ៏ប្រសើរនៃការទទួលទានផ្លែម្នាស់ ៖
១. ទប់ស្កាត់កាត់បន្ថយហានិភ័យនៃជំងឺមហារីក
ម្នាស់ ជាប្រភពដ៏ប្រសើរនៃសារធាតុប្រឆាំងអុកស៊ីតកម្មដ៏មានឥទ្ធិពលបំផុតមួយ គឺវីតាមីន C។ សារធាតុប្រឆាំងអុកសីតកម្មនេះជួយកម្ចាត់រ៉ាឌីកាល់សេរីដែលបង្កជំងឺមហារីក។ លើសពីនេះទៅទៀត ម្នាស់ មានផ្ទុកសម្បូរទៅដោយសារធាតុ bromelain អាចរារាំងទប់ស្កាត់ការលូតលាស់នៃកោសិកាមហារីក និងថែមទាំងធ្វើឱ្យកោសិកាមហារីកងាប់ផងដែរ ជាពិសេសជំងឺមហារីកពោះវៀនធំ។
២. ទប់ស្កាត់ជំងឺរលាកសន្លាក់
បរិមាណនៃវីតាមីន C និងសារធាតុ bromelain ក៏ជួយដោះស្រាយបញ្ហារលាកសន្លាក់បានយ៉ាងប្រសើរតាមរយៈការកាត់បន្ថយអាការៈហើមឈឺសន្លាក់។ ប្រសិនបើអ្នកមានការឈឺចាប់ខ្លាំង បន្ទាប់ពីធ្វើលំហាត់ប្រាណ អ្នកអាចទទួលទានទឹកផ្លែម្នាស់ស្រស់ ១ កែវ ដើម្បីកាត់បន្ថយការឈឺចាប់។ ដើម្បីទទួលបានលទ្ធផលល្អប្រសើរ ចូរជ្រើសរើសទទួលទានផ្លែម្នាស់ ឬទឹកម្នាស់ដែលស្រស់។
៣. ទប់ស្កាត់បញ្ហាទល់លាមក
ម្នាស់ មានផ្ទុកសម្បូរទៅដោយជាតិសសៃ dietary ដែលជួយទប់ស្កាត់ និងដោះស្រាយអាការៈទល់លាមកប្រកបដោយប្រសិទ្ធិភាពខ្ពស់។ ព្យាយាមទទួលទានផ្លែម្នាស់យ៉ាងហោចណាស់ ១ ចានពេញ ៣ ដងក្នុងមួយថ្ងៃ នោះអ្នកនឹងសម្គាល់ឃើញថាបញ្ហាទល់លាមក ឬពិបាកបត់ជើងធំ ប្រែជាល្អប្រសើរជាងមុន។ លើសពីនេះទៅទៀត សារធាតុ bromelain ក្នុងម្នាស់ក៏ជួយបំបែកប្រូតេអ៊ីន និងមានប្រយោជន៍ក្នុងការរំលាយអាហារបានត្រឹមត្រូវផងដែរ។
៤. ព្យាបាលទប់ស្កាត់ជំងឺទឹកនោមផ្អែម
ម្នាស់ ជាជម្រើសនៃផ្លែឈើដ៏ល្អបំផុតមួយសម្រាប់អ្នកជំងឺទឹកនោមផ្អែម ក៏ព្រោះវាមានផ្ទុកសម្បូរទៅដោយជាតិសសៃខ្ពស់ដែលជួយបញ្ចុះកម្រិតជាតិស្ករក្នុងឈាម និងធ្វើឱ្យកម្រិតនៃអាំងស៊ុយលីនកាន់តែប្រសើរឡើង។ ប៉ុន្តែទោះជាយ៉ាងណា កុំទទួលទានច្រើនលើសពេក។
៥. ពង្រឹងប្រព័ន្ធភាពស៊ាំរាងកាយ
ផ្លែម្នាស់ មានផ្ទុកសម្បូរទៅដោយវីតាមីន C ជួយប្រយុទ្ធប្រឆាំងរាល់ការខូចខាតដែលកើតឡើងក្នុងកោសិកា។ ដូច្នេះហើយទើបវីតាមីននេះ គឺជាអ្នកជួយជម្រុញពង្រឹងប្រព័ន្ធភាពស៊ាំ និងអាចសូម្បីតែកម្ចាត់ទប់ស្កាត់ជំងឺជាច្រើនទៀតដូចជា ឈឺចាប់ក្នុងសន្លាក់ និងជំងឺបេះដូង។ វីតាមីន C ក៏ជួយទប់ស្កាត់ជំងឺផ្ដាសាយ ឬគ្រុនផ្ដាសាយបានយ៉ាងប្រសើរផងដែរ៕