នរណាម្នាក់ក៏ធ្លាប់ជួបប្រទះនូវបញ្ហាសក់ផ្សេងៗដែរ ជាពិសេសនោះ គឺបញ្ហាសក់ជ្រុះ បើទោះជាខំប្រើប្រាស់ផលិតផលថែរក្សាការពារយ៉ាងណាក៏ដោយ។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) មកទល់នឹងពេលបច្ចុប្បន្នផលិតផលថែររក្សាសក់ព្យាបាលសក់ជ្រុះស្ដើងមានមិនខ្វះឡើយ តែវាមានតម្លៃថ្លៃ ហើយមួយចំនួនមានផ្ទុកសារធាតុគីមីប៉ះពាល់ដល់សុខភាព។ ប៉ុន្តែកុំបារម្ភ! មានរូបមន្តបែបធម្មជាតិច្រើនណាស់ដែលអាចជួយដោះស្រាយបញ្ហាសក់ផ្សេងៗ រួមទាំងបញ្ឈប់សក់ជ្រុះប្រកបដោយប្រសិទ្ធិភាពខ្ពស់។ ហើយការប្រើប្រាស់ទឹកខ្ទឹមបារាំងស្រស់ជារូបមន្តធម្មជាតិល្អបំផុតមួយក្នុងចំណោមនោះ ក៏ព្រោះវាមានផ្ទុកសម្បូរទៅដោយជាតិស្ពាន់ធ័រផ្ដល់សារធាតុចិញ្ចឹមគ្រប់គ្រាន់ដល់ឬសសក់, លក្ខណៈសម្បត្តិប្រឆាំងអុកស៊ីតកម្មរក្សាសុខភាពស្បែកក្បាលពីការឆ្លងមេរោគដែលបណ្ដាលឱ្យជ្រុះសក់ រួមទាំងបញ្ហាផ្សេងៗទៀត និងអង់ស៊ីម Catalase ដែលជួយទប់ស្កាត់បញ្ហាសក់ស្កូវ! ថ្ងៃនេះវេបសាយសុខភាព Health.com.kh នឹងបង្ហាញឱ្យដឹងពីវិធីងាយៗក្នុងការប្រើប្រាស់ទឹកខ្ទឹមបារាំងស្រស់ដោះស្រាយបញ្ហាសក់ផ្សេងៗ ៖
១. ដើម្បីបង្កើនការលូតលាស់នៃសក់
អ្វីដែលអ្នកត្រូវធ្វើ គឺគ្រាន់តែចាក់ទឹកខ្ទឹមបារាំងស្រស់ចំនួន ២ ស្លាបព្រាបាយក្នុងចានគោមមួយ។ បន្ទាប់មកយកដុំសំឡីជ្រលក់ចូលក្នុងទឹកខ្ទឹមនេះ រួចលាបឱ្យសព្វស្បែកក្បាល។ ទុកចោលសម្រាប់រយៈពេលយ៉ាងហោចណាស់ពី ១៥ ទៅ ៣០ នាទីសិន សឹមលាងសម្អាតចេញជាមួយសាប៊ូកក់សក់កម្រិតស្រាលមិនមានសារធាតុគីមីជាការស្រេច។ អនុវត្តជាប្រចាំរហូតទទួលបានលទ្ធផលគាប់ចិត្ត។
២. ដើម្បីកម្ចាត់អង្កែ
អ្វីដែលអ្នកត្រូវធ្វើ គឺគ្រាន់តែលាយទឹកខ្ទឹមបារាំងស្រស់ចំនួន ៣ ស្លាបព្រាបាយ ជាមួយប្រេងអូលីវចំនួន កន្លះស្លាបព្រាបាយ។ កូរឱ្យសព្វ សឹមម៉ាស្សាល្បាយលើស្បែកក្បាលថ្នមៗ។ ទុកចោលសម្រាប់រយៈពេល ២ ម៉ោង សឹមលាងសម្អាតចេញជាមួយសាប៊ូកម្រិតស្រាលគ្មានសារធាតុគីមី។អនុវត្តរូបមន្តនេះឱ្យបានទៀងទាត់ ដើម្បីរក្សាបាននូវសុខភាពសក់ល្អរឹងមាំស្បែកក្បាលគ្មានអង្កែ។
៣. ដើម្បីផ្ដល់សារធាតុចិញ្ចឹមដល់សក់
អ្វីដែលអ្នកត្រូវធ្វើ គឺគ្រាន់តែលាយទឹកខ្ទឹមបារាំងស្រស់ ជាមួយស៊ុត ១ គ្រាប់។ កូរឱ្យសព្វ សឹម
លាបល្បាយឱ្យពេញសក់ពីគល់ដល់ចុង។ ទុកចោលសម្រាប់រយៈពេល ៣០ នាទី ដោយពាក់មួកផ្លាស្ទិកងូតទឹកគ្របសក់ឱ្យជិត រួចសឹមលាងសម្អាតចេញជាមួយទឹកត្រជាក់ជាការស្រេច៕
