ការលេចឡើងនូវសសៃឈាមក្រហមលើផ្នែកពណ៌សនៃភ្នែកបណ្ដាលមកពីមូលហេតុជាច្រើនផ្សេងៗពីគ្នាដូចជា កង្វះនៃការគេង, ភាពអស់កម្លាំង, ភាពស្ងួតនៃភ្នែក, ការប៉ះនឹងជាតិពុល ក៏ដូចជាការរលាក, អាឡែកស៊ី, ឆ្លងមេរោគ និងការប៉ះទង្គិចខ្លាំងណាមួយ។ អ្នកជំនាញផ្នែកភ្នែកជាច្រើននិយាយថា សសៃឈាមក្រហមនៅក្នុងភ្នែកអាចលេចឡើងដោយសារបញ្ហាវេជ្ជសាស្ត្រមួយចំនួនផងដែរ ហើយប៉ុន្មានក្នុងចំណោមនោះ គឺជំងឺភ្នែកក្រហម, ជំងឺភ្នែក blepharitis, ជំងឺដំបៅកញ្ចក់ភ្នែក, ជំងឺទឹកដក់ក្នុងភ្នែក, ជំងឺភ្នែក iritis និង Grave’s disease។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ប្រសិនបើការឡើងសសៃឈាមក្រហមក្នុងភ្នែករបស់អ្នកបណ្ដាលមកពីជំងឺនេះ ការព្យាបាលជាមួយគ្រូពេទ្យជំនាញទើបមានប្រសិទ្ធិភាព។ ប៉ុន្តែប្រសិនបើគ្រូពេទ្យភ្នែកនិយាយថា បញ្ហានៃការឡើងសសៃឈាមក្រហមក្នុងភ្នែករបស់អ្នកមិនមែនបណ្ដាលមកពីជំងឺណាមួយដូចបានរៀបរាប់ទេនោះ កុំបារម្ភ! ក៏ព្រោះសសៃឈាមទាំងនោះអាចដោះស្រាយបានយ៉ាងងាយជាមួយរូបមន្តបែបធម្មជាតិមួយចំនួន។ ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីរូបមន្តបែបធម្មជាតិព្យាបាលអាការៈឡើងសសៃឈាមក្រហមក្នុងភ្នែក ៖
១. ស្អំត្រជាក់
អ្វីដែលអ្នកត្រូវធ្វើ គឺគ្រាន់តែជ្រលក់កន្សែងស្អាតតូចមួយក្នុងទឹកត្រជាក់ រួមពូតទឹកចេញ ហើយបត់ដាក់ស្អំលើភ្នែកជាការស្រេច។ អនុវត្តម្ដងទៀត ប្រសិនបើចាំបាច់។ អ្នកក៏អាចបិតបន្ទះត្រសក់លើភ្នែកទាំងសងខាងផងដែរ។ ការស្អំស្លាបព្រាត្រជាក់ក៏មានប្រសិទ្ធិភាពខ្ពស់ដូចគ្នា ដោយអ្នកគ្រាន់តែយកស្លាបព្រាចំនួន ៤ ក្នុងទឹកកកត្រជាក់ ១ កែវ ឬក្នុងទូរទឹកកក ហើយរងចាំសម្រាប់រយៈពេលប៉ុន្មាននាទី រហូតដល់ស្លាបព្រាត្រជាក់សិន សឹមយកស្លាបព្រាមួយគូមកដាក់ភ្នែកដែលកំពុងបិទ។ នៅពេលស្លាបព្រាអស់ភាពត្រជាក់ហើយនោះ ចូរប្ដូរយកមួយគូទៀតមកដាក់ជាការស្រេច។
២. កញ្ចប់តែតូចៗ
អ្វីដែលអ្នកត្រូវធ្វើ គឺគ្រាន់តែយកកញ្ចប់តែតូចៗចំនួន ២ ទៅឆុងក្នុងទឹកក្ដៅឧណ្ហៗចំនួនកន្លះពែងសម្រាប់រយៈពេល ២ ទៅ ៣ នាទី បន្ទាប់មកយកពែងតែទៅដាក់ក្នុងទូរទឹកកកឱ្យត្រជាក់។ នៅពេលត្រជាក់ហើយនោះ ចូរគេងបិទភ្នែកហើយដាក់កញ្ចប់តែពីលើជាការស្រេច។ រូបមន្តនេះសាកសមបំផុតសម្រាប់ភ្នែកអាឡែកស៊ី ឬឆ្លងមេរោគ។
៣. ទឹកប្រទាលកន្ទុយក្រពើស្រស់
អ្វីដែលអ្នកត្រូវធ្វើ គឺគ្រាន់តែលាយទឹកប្រទាលកន្ទុយក្រពើស្រស់ជាមួយទឹកឆ្អិនក្នុងបរិមាណស្មើគ្នា។ កូរឱ្យសព្វ សឹមជ្រលក់បន្ទះសំឡីមួយគូក្នុងទឹកល្បាយ រួចយកមកស្អំលើភ្នែកទាំងសងខាងសម្រាប់រយៈពេលប៉ុន្មាននាទីជាការស្រេច។
៤. ទឹកខ្មេះផ្លែប៉ោម
អ្វីដែលអ្នកត្រូវធ្វើ គឺគ្រាន់តែលាយទឹកខ្មេះផ្លែប៉ោម ១ ស្លាបព្រាកាហ្វេជាមួយទឹកឆ្អិន ១ពែង។ កូរឱ្យសព្វសឹមប្រើវាជាទឹកលាងសម្អាតភ្នែក។ ចូរអនុវត្តឱ្យបាន ៣ ដងក្នុងមួយថ្ងៃដើម្បីទទួលបានលទ្ធផលឆាប់រហ័ស។
៥. ស្អំដំឡូងបារាំង
អ្វីដែលអ្នកត្រូវធ្វើ គឺដាក់ដំឡូងបារាំងក្នុងទូរទឹកកកឱ្យត្រជាក់ ហើយកោសដំឡូងបារាំងជាចំណិតតូចៗ រួចសឹមដាក់ស្អំភ្លាមលើភ្នែក។ លាងសម្អាតចេញជាមួយទឹកធម្មតាក្រោយរយៈពេលប្រមាណពី ២ ទៅ ៣ នាទី។ រូបមន្តនេះសាកសមបំផុតសម្រាប់បញ្ហាឡើងសសៃក្រហមក្នុងភ្នែក ដោយសារការគេងមិនគ្រប់។
ចំណុចគួរប្រុងប្រយ័ត្ន ៖ ប្រសិនបើបញ្ហាមិនព្រមបាត់ទៅវិញក្នុងរយៈពេលប៉ុន្មានម៉ោង ឬពី ២ ទៅ ៣ ថ្ងៃ ក្រោយអនុវត្តរូបមន្តធម្មជាតិណាមួយដូចបានណែនាំខាងលើ ហើយជាពិសេសប្រសិនបើមានភាពមិនប្រក្រតីពាក់ព័ន្ធនឹងការមើលឃើញ ចូរប្រញាប់ទៅជួបពិនិត្យជាមួយពេទ្យភ្នែកភ្លាម!