គួរអាន! ប្រសិនបើអ្នកឈប់ហាត់ប្រាណ បញ្ហាសុខភាពទាំងនេះនឹងកើតឡើង

ភាគច្រើននៃពួកយើងសុទ្ធតែធ្លាប់ដឹងថា ការធ្វើលំហាត់ប្រាណជាប្រចាំសំខាន់ណាស់ដើម្បីរក្សាបាននូវសុខភាពល្អប្រសើរជៀផុតពីបញ្ហាផ្សេងៗ។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ប៉ុន្តែថាតើនឹងមានអ្វីកើតឡើងទៅ ប្រសិនបើអ្នកឈប់ធ្វើលំហាត់ប្រាណ? ថ្ងៃនេះវេបសាយសុខភាព Health.com.kh ​​នឹងបង្ហាញឱ្យដឹងពីអ្វីដែលនឹងកើតឡើង ​ប្រសិនបើអ្នកឈប់ធ្វើលំហាត់ប្រាណដែលធ្លាប់តែអនុវត្តជាប្រចាំនោះ ៖

១. សម្ពាធឈាមនឹងឡើងខ្ពស់

ការសិក្សាស្រាវជ្រាវជាច្រើនបានបង្ហាញថា សសៃឈាមនៃអត្តពលិក និងអ្នកធ្វើលំហាត់ប្រាណដែលបោះបង់ ឬឈប់ហ្វឹកហាត់នឹងប្រែជារឹងដែលធ្វើឱ្យសម្ពាធឈាមឡើងខ្ពស់គួរឱ្យកត់សម្គាល់។ ហើយបញ្ហាសម្ពាធឈាមឡើងខ្ពស់នេះជាកត្តាចម្បងបំផុតមួយនៃជំងឺបេះដូង។ ការធ្វើលំហាត់ប្រាណទៀងទាត់អាចជួយរក្សាសម្ពាធឈាមមិនឱ្យឡើងខ្ពស់។ នេះហើយជាមូលហេតុដែលវេជ្ជបណ្ឌិតជាច្រើនណែនាំឱ្យអ្នកជំងឺលើសឈាមព្យាយាមធ្វើលំហាត់ប្រាណ។

២. រឹងសន្លាក់

ការធ្វើសកម្មភាពរាងកាយគ្រប់គ្រាន់ ឬការធ្វើលំហាត់ប្រាណត្រូវបានណែនាំជាពិសេសសម្រាប់អ្នកដែលមានបញ្ហាសន្លាក់ដើម្បីកាត់បន្ថយការឈឺចាប់, ការរលាក និងឡើងរឹង។ ដូច្នេះវាច្បាស់ណាស់ថា ការឈប់ធ្វើលំហាត់ប្រាណនឹងបណ្ដាលឱ្យអ្នកជួបប្រទះបញ្ហាឈឺសន្លាក់ ក៏ដូចជារលាកគួរ​ឱ្យព្រួយបារម្ភ។ ហើយមិនត្រឹមតែសន្លាក់ប៉ុណ្ណោះទេដែលទទួលបានអត្ថប្រយោជន៍ពីការធ្វើលំហាត់ប្រាណ ប៉ុន្តែឆ្អឹងក៏ដូចគ្នា គឺជៀសផុតពីហានិភ័យនៃជំងឺពុកឆ្អឹង។

៣. កម្រិតជាតិស្ករក្នុងឈាមនឹងឡើងខ្ពស់

អ្នកជំងឺទឹកនោមផ្អែមតែងទទួលបានការណែនាំ​​ឱ្យធ្វើលំហាត់ប្រាណជាប្រចាំ និងប្រយ័ត្នចំពោះអ្វីដែលពួកគេទទួលទាន ដើម្បីរក្សាកម្រិតត្រឹមត្រូវនៃជាតិស្ករក្នុងឈាម។ ជាពិសេសចំពោះអ្នកធាត់ជ្រុល និងមានបញ្ហាសម្ពាធ ការធ្វើលំហាត់ប្រាណ គឺសំខាន់ណាស់ដោយវាជួយកាត់បន្ថយហានិភ័យនៃជំងឺ។

៤. កើនទម្ងន់

ការធ្វើលំហាត់ប្រាណជួយឱ្យអ្នកស្រកទម្ងន់ ហើយក៏អាចធ្វើឱ្យអ្នកឡើងទម្ងន់ដូចគ្នា! កង្វះនៃការធ្វើលំហាត់ប្រាណ រួមជាមួយទម្លាប់នៃការទទួលទានមិនត្រឹមត្រូវ និងភាពតានតឹងក្នុងអារម្មណ៍អ្នកនឹងកើនទម្ងន់យ៉ាងឆាប់រហ័ស។ ហើយភាពធាត់ជ្រុល ឬលើសទម្ងន់ក៏អាចបង្កហានិភ័យនៃបញ្ហាសុខភាពធ្ងន់ធ្ងរជាច្រើន។

៥. ពិបាកក្នុងការគេង

គ្រប់គ្នាសុទ្ធតែដឹងហើយថា ការគេងឱ្យបានពី ៧ ទៅ ៩ ម៉ោង ក្នុងមួយយប់ គឺចាំបាច់ណាស់សម្រាប់សុខភាព។ ប្រសិនបើអ្នកឈប់ធ្វើលំហាត់ប្រាណទៀងទាត់ អ្នកនឹងពិបាកគេងបានស្កប់ហើយ។ លើសពីនេះទៅទៀត ការធ្វើលំហាត់ប្រាណជាប្រចាំជួយបំបាត់ស្ត្រេស ឬភាពតានតឹងក្នុងអារម្មណ៍ដែលជាមូលហេតុចម្បងមួយនៃការគេងមិនលក់។

៦. មានអារម្មណ៍បាក់ទឹកចិត្ត

អ្នកឯកទេសខាងសុខភាពផ្លូវចិត្តជាច្រើនបានបញ្ជាក់ថា ការធ្វើលំហាត់ប្រាណទៀងទាត់ជួយធ្វើឱ្យកម្រិតនៃអ័រម៉ូនរីករាយក្នុងខួរក្បាលកើនឡើង។ ជាពិសេសប្រសិនបើអ្នកធ្វើលំហាត់ប្រាណនៅខាងក្រៅក្រោមព្រះអាទិត្យ ដោយរាងកាយនឹងត្រូវទទួលបាននូវវីតាមីន D គ្រប់គ្រាន់។ ហើយវីតាមីន D ជាសារធាតុចិញ្ចឹមដែលជួយលើកកម្ពស់អារម្មណ៍ល្អប្រសើរ។ នោះហើយជាមូលហេតុដែលធ្វើឱ្យអ្នកអាចនឹងមានអារម្មណ៍បាក់ទឹកចិត្ត ប្រសិនបើអ្នកឈប់ធ្វើលំហាត់ប្រាណ៕