បញ្ហាគួរឲ្យព្រួយបារម្ភបំផុតមួយនៃសម្ពាធឈាមឡើងខ្ពស់ គឺវាអាចធ្វើឲ្យអ្នកប្រឈមមុខនឹងជំងឺសាហាវៗជាច្រើន រួមទាំងជំងឺសសៃឈាមបេះដូង, ខ្សោយតម្រងនោម, ដាច់សសៃឈាមខួរក្បាល និងគាំងបេះដូង។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ជំងឺទាក់ទឹងនឹងក្រពេញលើតម្រងនោម, ជំងឺតម្រងនោម, ថ្នាំបំបាត់ការឈឺចាប់, ថ្នាំពន្យារកំណើត, ស្ត្រេស, មិនសូវហាត់ប្រាណ, ទទួលទានអាហារមានជាតិប្រៃ ឬអំបិលច្រើន, ទទួលទានគ្រឿងស្រវឹងច្រើនលើសពេក, កត្តាហ្សែន និងជំងឺធាត់ជ្រុល សុទ្ធតែជាមូលហេតុដែលបង្កឲ្យកើតមានបញ្ហាសម្ពាធឈាមឡើងខ្ពស់។ ដើម្បីរក្សាសុខភាព និងជៀសផុតពីផលវិបាកសុខភាពធ្ងន់ធ្ងរ វាជារឿងសំខាន់ណាស់ដែលយើងត្រូវរក្សាសម្ពាធឈាមក្នុងកម្រិតត្រឹមត្រូវតាមរយៈការទទួល
ទានថ្នាំ និងជៀសវាងអាហារ ក៏ដូចជាភេសជ្ជៈមួយចំនួន។ ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីអាហារ រួមទាំងភេសជ្ជៈដែលអ្នកគួរជៀសវាងដើម្បីទប់ស្កាត់ដោះស្រាយបញ្ហាសម្ពាធឈាមឡើងខ្ពស់ ឬលើសសម្ពាធឈាម ៖

១. ភេសជ្ជៈកំប៉ុង 

ក្រៅពីអំបិលហើយនោះ ស្ករក៏ជាមូលហេតុចម្បងក្នុងការវិវត្តន៍ទៅជាជំងឺលើសសម្ពាធឈាម និងជំងឺសសៃឈាមបេះដូងផងដែរ។ ភេសជ្ជៈកំប៉ុងភាគច្រើនមានផ្ទុកជាតិស្ករខ្ពស់ដែលមិនល្អសម្រាប់សុខភាពដែលអាចធ្វើឱ្យអ្នកប្រឈមមុខនឹងហានិភ័យនៃបញ្ហាសម្ពាធឈាមឡើងខ្ពស់ដល់ទៅ ៣០ភាគរយឯណោះ។

២. សាច់កែច្នៃ

សាច់កែច្នៃមានផ្ទុកសម្បូរទៅដោយជាតិសូដ្យូម ឬអំបិលដែលបង្កើនហានិភ័យនៃបញ្ហាលើសសម្ពាធឈាមនៅពេលទទួលទានច្រើន ហើយជាប្រចាំ។ អ្នកជំងឺលើសសម្ពាធឈាមមិនគួរទទួលទានអាហារមានជាតិសូដ្យូមលើសពី ១៥០០មីលីក្រាមក្នុងមួយថ្ងៃឡើយ ប្រសិនបើមិនចង់ឱ្យស្ថានភាពនៃជំងឺកាន់តែអាក្រក់ឡើង។

៣. អាហារត្រាំ

អាហារត្រាំភាគច្រើន គឺមានផ្ទុកជាតិសូដ្យូម ឬអំបិលខ្ពស់ដែលមិនល្អសោះឡើងចំពោះសម្ពាធឈាម។ ដូច្នេះមុននឹងទទួលទានអាហារត្រាំណាមួយដូចជា ត្រសក់ត្រាំ ចូរលាងវាជាមួយទឹកធម្មតាសិន ដើម្បីជម្រះជាតិប្រៃ ឬអំបិលចេញខ្លះ។

៤. ផលិតផលអាហារផ្សំឡើងពីប៉េងប៉ោះ

អាហារកែច្នៃផ្សំឡើងពីប៉េងប៉ោះដូចជា ទឹកជ្រលក់ប៉េងប៉ោះ, ទឹកប៉េងប៉ោះស្រស់ និងប៉េង
ប៉ោះកំប៉ុងដែលដាក់លក់លើទីផ្សារភាគច្រើនមានផ្ទុកជាតិសូដ្យូមខ្ពស់គួរឱ្យកត់សម្គាល់។ ដូច្នេះដើម្បីជាការប្រសើរ អ្នកគួរជៀសវាងទទួលទានអាហារប្រភេទនេះច្រើន ឬសាកល្បងធ្វើទឹកជ្រលក់ និងទឹកផ្លែប៉េងប៉ោះស្រស់ដោយខ្លួនឯង។

៥. គ្រឿងស្រវឹង

ការទទួលទានគ្រឿងស្រវឹងក្នុងកម្រិតមធ្យម ២ កែវក្នុងមួយថ្ងៃសម្រាប់បុរស និង ១ កែវក្នុងមួយថ្ងៃសម្រាប់នារីពិតជាអាចជួយបញ្ចុះសម្ពាធឈាមរបស់អ្នកបាន ប៉ុន្តែការទទួលទានច្រើនលើសវិញនឹងបង្កទៅជាបញ្ហាសម្ពាធឈាមឡើងខ្ពស់គួរឱ្យព្រួយបារម្ភ។ ជៀសវាងការទទួលទានគ្រឿងស្រវឹង ប្រសិនបើអ្នកមានជំងឺលើសឈាម។

៦. កាហ្វេ

ជាតិកាហ្វេអ៊ីនអាចរារាំងអ័រម៉ូនដែលជួយរក្សាសសៃឈាមរីកធំដែលធ្វើឱ្យអ្នកមានបញ្ហាលើស
សម្ពាធឈាម។ សសៃឈាមរួមតូចក៏បង្កទៅជាបញ្ហាសុខភាពគួរឱ្យព្រួយបារម្ភច្រើនផ្សេងទៀតផងដែរ។ ដូច្នេះប្រសិនបើអ្នកមានជំងឺលើសឈាម ចូរបញ្ឈប់ទម្លាប់ទទួលទានកាហ្វេ ឬភេសជ្ជៈមានផ្ទុកជាតិកាហ្វេអ៊ីនផ្សេងៗទៀតភ្លាម!