ម្លិះ ជាផ្កាមួយប្រភេទដែលមានក្លិនក្រអូបឈ្ងុយ និងសម្បូរណាស់ដែរក្នុងប្រទេសកម្ពុជា។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) បើទោះបីជាភាគច្រើននៃពួកយើងសុទ្ធតែធ្លាប់ស្គាល់ផ្កានេះ ប៉ុន្តែប្រហែលជាមិនបានចាប់អារម្មណ៍ដឹងទេថា ផ្កាម្លិះ អាចផ្ដល់អត្ថប្រយោជន៍ចំពោះសុខភាព ក៏ដូចជាសម្រស់បានយ៉ាងប្រសើរ។ ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីអត្ថប្រយោជន៍ដ៏គួរឱ្យភ្ញាក់ផ្អើលនៃផ្កាម្លិះចំពោះសុខភាព និងសម្រស់ ៖
១. កាត់បន្ថយស្ត្រេស
ក្លិននៃផ្កាម្លិះ គឺជួយសម្រួលប្រព័ន្ធសសៃប្រសាទបានយ៉ាងប្រសើរ ដូច្នេះហើយទើបការស្រងក្លិនផ្កានេះជួយកាត់បន្ថយកម្រិតនៃភាពតានតឹងក្នុងអារម្មណ៍បានឆាប់រហ័ស។
២. កាត់បន្ថយបញ្ហាថប់បារម្ភ និងជំងឺធ្លាក់ទឹកចិត្ត
អ្នកក៏អាចហិតក្លិនផ្កាម្លិះ ដើម្បីសម្រាលអាការៈថប់បារម្ភផងដែរ។ តាមរយៈការដកដ្ហើមស្រងក្លិនចេញចូលមួយៗវែងៗ ក្លិននៃផ្កាម្លិះអាចជួយឱ្យអ្នកស្រាលអារម្មណ៍ឈប់គិតច្រើនហួសបាន។ ហើយក៏ព្រោះតែផ្កាម្លិះមាននូវលក្ខណៈសម្បត្តិជួយលើកកម្ពស់អារម្មណ៍ល្អប្រសើរនោះវាក្លាយជាមានប្រយោជន៍ណាស់កំឡុងពេលអ្នកមានអារម្មណ៍ធ្លាក់ទឹកចិត្ត។ ចូរប្រើប្រាស់ប្រេងផ្កាម្លិះ ប្រសិនបើកំពុងទទួលទានបញ្ហានៃជំងឺធ្លាក់ទឹកចិត្តកម្រិតស្រាល។
៣. វាជួយកាត់បន្ថយការឈឺចាប់ផ្សេងៗ
មិនថាអ្នកកំពុងទទួលរងការឈឺចាប់ក្នុងទម្រង់បែបណានោះទេ អ្នកអាចដោះស្រាយបញ្ហាបានយ៉ាងប្រសើរតាមរយៈការប្រើប្រាស់ប្រេងផ្កាម្លិះ។ ការហិតក្លិនផ្កាម្លិះ ឬប្រើប្រាស់ប្រេងផ្កាម្លិះលាបម៉ាស្សាសៀតផ្កាក៏អាចជួយបំបាត់អាការៈឈឺក្បាលបានឆាប់រហ័សផងដែរ។ អ្នកអាចប្រើប្រាស់ប្រេងផ្កាម្លិះលាបលើពោះនៅពេលឈឺពោះ ឬរោគសញ្ញាមុនពេលអស់រដូវ។ ហើយអ្នកក៏អាចលាបម៉ាស្សាប្រេងម្លិះដើម្បីបំបាត់ការឈឺសន្លាក់ផងដែរ។
៤. គ្រប់គ្រងជាតិស្ករក្នុងឈាម
ក្រៅពីផ្កាហើយនោះ ស្លឹកនៃផ្កាម្លិះក៏ផ្ដល់អត្ថប្រយោជន៍អស្ចារ្យផងដែរ។ អ្នកអាចប្រើប្រាស់ស្លឹកនៃផ្កាម្លិះទៅឆុងជាតែ ហើយទទួលទានដើម្បីគ្រប់គ្រងកម្រិតនៃជាតិស្ករក្នុងឈាម។ តែស្លឹកផ្កាម្លិះថែមទាំងមានប្រសិទ្ធិភាពជួយទប់ស្កាត់បញ្ហាសម្ពាធឈាមឡើងខ្ពស់ទៀតផង។ ប៉ុន្តែទោះជាយ៉ាងណាដើម្បីជាការប្រសើរ នៅមុនពេលទទួលទានឱសថបែបធម្មជាតិណាមួយកំឡុងពេលមានជំងឺ ឬប្រើប្រាស់ថ្នាំព្យាបាលអ្វីផ្សេងដែរ ចូរពិគ្រោះជាមួយគ្រូពេទ្យសិន។
៥. ពន្យឺតភាពចាស់មុនវ័យនៃស្បែក
ផ្កាម្លិះ ជាប្រភពដ៏ប្រសើរនៃសារធាតុប្រឆាំងអុកស៊ីតកម្មដែលជួយការពារកោសិកាស្បែកទប់ស្កាត់ភាពចាស់មុនវ័យ។ គ្រាន់តែបន្ថែមប្រេងផ្កាម្លិះត្រឹមប៉ុន្មានដំណក់ក្នុងសាប៊ូលាងមុខ, ទឹកជូតសម្អាតមុខ ឬផលិតផលផ្ដល់សំណើមដល់ស្បែកអាចជួយពន្យឺតការលេចឡើងនៃស្នាមជ្រីវជ្រួញ និងកាត់បន្ថយស្នាមជ្រួញដែលលេចឡើងរួចហើយ។ អ្នកអាចលាយប្រេងផ្កាម្លិះជាមួយទឹកផ្កាកុលាប ហើយលាបទៅលើមុខ ដើម្បីដោះស្រាយបញ្ហារន្ធញើសធំ និងបញ្ហស្បែកខ្លាញ់។
៦. ពង្រឹងសុខភាពសក់
គ្រាប់តែបន្ថែមប្រេងផ្កាម្លិះប៉ុន្មានដំណក់ក្នុងសាប៊ូកក់សក់ ឬក្រែមបន្ទន់ អាចជួយធ្វើឱ្យសុខភាពរឹងមាំ និងទន់រលោងស្រស់ស្អាតមានពន្លឺគួរឱ្យកត់សម្គាល់។ ប្រសិនបើអ្នកកំពុងទទួលទានបញ្ហាអង្គែ ឬកើតចៃ អ្នកអាចប្រើប្រាស់ផ្កាម្លិះស្រស់មកដោះស្រាយបញ្ហា។ អ្វីដែលអ្នកត្រូវធ្វើ គឺគ្រាន់តែបុកកំទេចផ្កាម្លិះមួយចំនួន ហើយដាក់កូរលាយវាក្នុងប្រេងដូងក្ដៅឧណ្ហៗ។ រងចាំដល់ប្រេងដូងចុះត្រជាក់បន្តិច សឹមចាប់ផ្ដើមលាបម៉ាស្សាលើស្បែកក្បាល។ ធ្វើបែបនេះពី ៤៥ ទៅ ៦០ នាទី មុនពេលអ្នកកក់សក់៕