បញ្ហាគួរឲ្យព្រួយបារម្ភបំផុតមួយនៃសម្ពាធឈាមឡើងខ្ពស់ គឺវាអាចធ្វើឲ្យអ្នកប្រឈមមុខនឹងជំងឺសាហាវៗជាច្រើន រួមទាំងជំងឺខ្សោយតម្រងនោម, ដាច់សសៃឈាមខួរក្បាល និងគាំងបេះដូង។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ជំងឺទាក់ទឹងនឹងក្រពេញលើតម្រងនោម, ជំងឺតម្រងនោម, ថ្នាំបំបាត់ការឈឺចាប់, ថ្នាំពន្យារកំណើត, ស្ត្រេស, មិនសូវហាត់ប្រាណ, ទទួលទានអាហារមានជាតិប្រៃ ឬអំបិលច្រើន, ទទួលទានគ្រឿងស្រវឹងច្រើនលើសពេក, កត្តាហ្សែន និងជំងឺធាត់ជ្រុល សុទ្ធតែជាមូលហេតុដែលបង្កឲ្យកើតមានបញ្ហាសម្ពាធឈាមឡើងខ្ពស់។ ដើម្បីរក្សាសុខភាព និងជៀសផុតពីផលវិបាកសុខភាពធ្ងន់ធ្ងរ វាជារឿងសំខាន់ណាស់ដែលយើងត្រូវរក្សាសម្ពាធឈាមក្នុងកម្រិតត្រឹមត្រូវ។ ថ្ងៃនេះវេបសាយសុខភាព Health.com.kh នឹងបង្ហាញឱ្យដឹងពីភេសជ្ជៈដែលមានប្រសិទ្ធិភាពខ្ពស់ជួយបញ្ចុះសម្ពាធឈាមបានយ៉ាងប្រសើរ ៖

១. ទឹកផ្លែម្នាស់ស្រស់

ជាប្រភពដ៏ល្អនៃជាតិប៉ូតាស្យូមជួយបញ្ចុះសម្ពាធឈាមដោយកម្ចាត់នូវជាតិសូដ្យូមដែលលើសក្នុងឈាម និងសម្រួលដល់សសៃឈាម។ ទឹកផ្លែម្នាស់ស្រស់ក៏ជួយទប់ស្កាត់ដោះស្រាយបញ្ហាកូឡេស្តេរ៉ូលមិនល្អឡើងខ្ពស់ផងដែរ។

២. ទឹកមើមឆៃថាវក្រហម

ចូរបន្ថែមទឹកមើមឆៃថាវក្រហមក្នុងរបបអាហារប្រចាំថ្ងៃ ប្រសិនបើអ្នកចង់បញ្ចុះសម្ពាធឈាមតាមបែបធម្មជាតិ។ ក្រុមអ្នកវិទ្យសាស្ត្រនិយាយថា ប្រសិទ្ធភាព​នេះ​បាន​មក​ដោយសារ​មើម​ឆៃថាវ​ក្រហម​មាន​កម្រិត​សារធាតុ​នីត្រាត​ខ្ពស់។ ការ​ទទួលទាន​អាហារ​ដែល​សម្បូរ​ដោយសារ​ធាតុ​នីត្រាត​អាច​នាំ​ឱ្យ​មាន​ប្រតិកម្ម​គីមី​ជា​បន្តបន្ទាប់​ក្នុង​ឈាម ដែល​បញ្ហា​នេះ​អាច​បង្កើន​បរិមាណ​អុក​ស៊ី​សែន​នៅ​កន្លែង​ដែល​រាង​កាយ​ខ្វះ។ លើសពីនេះទៅទៀត ទឹកឆៃថាវក្រហមក៏ជួយធ្វើអោយសសៃឈាមរីកធំ ហើយសម្ពាធឈាមនឹងថយចុះ។

៣. ទឹកខ្មេះផ្លែប៉ោម 

ការទទួលទានទឹកធម្មតា ១ កែវលាយជាមួយទឹកខ្មេះផ្លែប៉ោមសរីរាង្គត្រឹមពី ១ ទៅ ២ ស្លាបព្រាបាយក្នុងមួយថ្ងៃជួយបញ្ចុះសម្ពាធឈាមបានយ៉ាងប្រសើរ នោះក៏ព្រោះតែវាមានប្រសិទ្ធភាពកាត់បន្ថយការរលាកក្នុងរាងកាយ។

៤. តែខ្ញី

ក្រៅពីផ្ទុកលក្ខណៈសម្បត្តិប្រឆាំងការរលាកជួយដោះស្រាយបញ្ហាចង្អោរចង់ក្អួត, ពិបាករំលាយអាហារ, ក្អួត និងច្រាលទឹកអាស៊ីតក្រពះបានយ៉ាងប្រសើរហើយនោះ តែខ្ញីក៏មានប្រសិទ្ធិភាពខ្ពស់ទប់ស្កាត់ដោះស្រាយបញ្ហាសម្ពាធឈាមឡើងខ្ពស់ផងដែរ។

៥. តែបៃតង

មានផ្ទុកសម្បូរទៅដោយសារធាតុប្រឆាំងអុកស៊ីតកម្មដែលជួយរក្សាសុខភាពសសៃឈាមល្អប្រសើរ។ វាក៏មានលក្ខណៈសម្បត្តិកាត់បន្ថយភាពតានតឹងក្នុងអារម្មណ៍ផងដែរ។ ហើយស្ត្រេស ឬភាពតានតឹងក្នុងអារម្មណ៍ គឺអ្វីមួយដែលអាចបង្កឱ្យសម្ពាធឈាមឡើងខ្ពស់៕

ទោះជាយ៉ាងណា ភេសជ្ជៈមួយចំនួនខាងលើអាចបញ្ចុះសម្ពាធឈាមប្រកបដោយប្រសិទ្ធិភាពបានលុះត្រាតែអ្នកមានរបបអាហារត្រឹមត្រូវ និងតែងធ្វើលំហាត់ប្រាណជាប្រចាំផងដែរ។ ហើយដើម្បីជាការប្រសើរក៏កុំភ្លេចពិគ្រោះយោបល់ជាមួយវេជ្ជបណ្ឌិតជាមុន ប្រសិនបើអ្នកចង់ទទួលទានភេសជ្ជៈណាមួយ ខណៈពេលកំពុងប្រើប្រាស់ថ្នាំបញ្ចុះសម្ពាធឈាម ក៏ព្រោះប្រសិនបើសម្ពាធឈាមធ្លាក់ចុះទាបពេក នោះវាក៏អាចបង្កគ្រោះថ្នាក់ចំពោះសុខភាពគួរឱ្យព្រួយបារម្ភដែរ!