ផ្លែឈើ គឺប្រសើរណាស់ចំពោះសុខភាព។ ប៉ុន្តែថាតើពេលវេលាណាទៅដែលល្អបំផុតដើម្បីទទួលទានផ្លែឈើ? (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) សម្រាប់មនុស្សភាគច្រើន ការទទួលទានផ្លែឈើ គឺសុទ្ធតែផ្ដល់ផលល្អមិនថាពេលណាក៏ដោយ។ ទោះជាយ៉ាងណាសម្រាប់អ្នកដែលចង់ស្រកទម្ងន់ និងអ្នកជំងឺទឹកនោមផ្អែម គឺត្រូវតែប្រុងប្រយ័ត្នអំពីពេលវេលានៃការទទួលទានផ្លែឈើ។ ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីពេលដ៏ល្អបំផុតដើម្បីទទួលទានផ្លែឈើ ៖

១. សម្រាប់អ្នកជំងឺទឹកនោមផ្អែមប្រភេទទី ២ 

ការទទួលទានផ្លែឈើជាមួយអាហារផ្សេងទៀត គឺប្រសើរបំផុតសម្រាប់អ្នកជំងឺទឹកនោមផ្អែម។ ការទទួលទានផ្លែឈើជាមួយអាហារដែលមានផ្ទុកសម្បូរទៅដោយជាតិសសៃ, ខ្លាញ់ល្អ ឬប្រូតេអ៊ីន ធ្វើឱ្យជាតិស្ករនៃផ្លែឈើជ្រាបទៅក្នុងពោះវៀនកាន់តែយឺតជាងមុន។ ជាលទ្ធផលជាតិស្ករក្នុងឈាម គឺកើនក្នុងកម្រិតតិចតួចបំផុត បើប្រៀបទៅនឹងការទទួលទានផ្លែឈើសុទ្ធឡើយ។

២. សម្រាប់ស្ត្រីមានផ្ទៃពោះដែលកើតជំងឺទឹកនោមផ្អែម

ក៏ដូចទៅនឹងអ្នកដែលមានជំងឺទឹកនោមផ្អែមប្រភេទទី ២ ដែរ ការទទួលទានផ្លែឈើជាមួយអាហារ គឺជាជម្រើសដ៏ប្រសើរបំផុត។ ប៉ុន្តែប្រសិនបើអ្នកមានបញ្ហាពិបាកនឹងគ្រប់គ្រងកម្រិតនៃជាតិស្ករក្នុងឈាម ចូរជៀសវាងទទួលទានផ្លែឈើនៅពេលព្រឹក។

៣. សម្រាប់អ្នកដែលចង់ស្រកទម្ងន់

ក៏ព្រោះតែបរិមាណនៃជាតិសសៃក្នុងផ្លែឈើ ការទទួលទានវាជួយឱ្យអ្នកមានអារម្មណ៍ឆ្អែតបានយូរ។ ជាលទ្ធផលអ្នកនឹងទទួលទានអាហារជាតិកាឡូរីតិចដែលជួយឱ្យស្រកទម្ងន់ ប៉ុន្តែអ្នកគួរទទួលទានផ្លែឈើជាមួយ ឬមុនពេលអាហារ។ ប្រសិនបើអ្នកចង់ស្រកទម្ងន់បានឆាប់ អ្នកគួរព្យាយាមទទួលទានផ្លែឈើមុនពេលអាហារតែម្ដង ក៏ព្រោះជាតិទឹក រួមទាំងជាតិសសៃនៃផ្លែឈើនឹងធ្វើឱ្យអ្នកឆ្អែតមិនទទួលទានអាហារច្រើនលើស៕