ម្នាស់ ជាផ្លែឈើមួយប្រភេទដែលមានរសជាតិជូរអែម និងពេញនិយមណាស់ដែរក្នុងប្រទេសកម្ពុជា។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ភាគច្រើននៃពួកយើងសុទ្ធតែធ្លាប់ទទួលទានផ្លែឈើនេះ ប៉ុន្តែប្រហែលជាមិនបានចាប់អារម្មណ៍អំពីអត្ថប្រយោជន៍ដ៏អស្ចារ្យ របស់វាចំពោះសុខភាពឡើយ។ ហើយតើអ្នកដឹងទេថាគ្រាន់តែបន្ថែមម្នាស់មួយចំណិត ឬច្រើនជាងនេះក្នុងទឹកធម្មតារាល់ព្រឹកអាចផ្ដល់នូវផលល្អៗគួរឱ្យភ្ញាក់ផ្អើលទ្វេដងចំពោះសុខភាពរាងកាយ? ថ្ងៃនេះវេបសាយសុខភាព Health.com.kh នឹងបង្ហាញឱ្យដឹងនូវអត្ថប្រយោជន៍នៃការបន្ថែមផ្លែម្នាស់ក្នុងទឹកធម្មតា រួចទទួលទាន ៖
១. តុល្យភាពនៃអេឡិចត្រូលីត្រ
ម្នាស់ ជាប្រភពដ៏ប្រសើរនៃជាតិប៉ូតាស្យូមដែលជួយធ្វើឱ្យរាងកាយកាន់តែរឹងមាំឡើង។ លើសពីនេះទៅទៀត វាក៏ជួយរក្សាតុល្យភាពត្រឹមត្រូវនៃជាតិអេឡិចត្រូលីត្រក្នុងរាងកាយទប់ស្កាត់របួសផ្សេងៗ, ស្ពឹកស្រពន់, ចង្វាក់បេះដូងលោតខុសប្រក្រតី, អស់កម្លាំង និងអាការៈរមួលក្រពើផងដែរ។
២. លាងសម្អាតក្នុងរាងកាយ
សាច់ម្នាស់ មានផ្ទុកនូវអង់ស៊ីមដែលជួយកម្ចាត់នូវរាល់ជាតិពុល និងពពួកប៉ារ៉ាសិត។ ការទទួលទានទឹកផ្លែម្នាស់ ១ កែវជាប្រចាំអាចធ្វើឱ្យរាងកាយមានសុខភាពល្អជៀសផុតពីជាតិពុល និងពពួកប៉ារ៉ាសិត។
៣. ជួយឱ្យស្រកទម្ងន់
ម្នាស់ មានផ្ទុកសម្បូរទៅដោយជាតិសសៃដែលត្រូវការពេលយូរដើម្បីរំលាយធ្វើឱ្យអ្នកមានអារម្មណ៍ឆ្អែតបានយូរ។ ការទទួលទានទឹកលាយផ្លែម្នាស់នៅពេលព្រឹកជួយរារាំងការឃ្លានអាហារខ្លាញ់ និងផ្អែម។ សារធាតុ Thiamine នៃផ្លែម្នាស់ក៏ជួយបង្កើនការដុតរំលាយអាហារក្នុងរាងកាយដោយបំលែងជាតិកាបូអ៊ីដ្រាតទៅជាថាមពល។
៤. បង្កើនសុខភាពភ្នែក
ម្នាស់ ជាប្រភពដ៏ប្រសើរនៃវីតាមីន A និង beta-carotene ដែលល្អសម្រាប់ភ្នែកជួយឱ្យមើលឃើញបានច្បាស់។ ការទទួលទានម្នាស់ជាប្រចាំជួយកាត់បន្ថយហានិភ័យនៃជំងឺខ្សោយភ្នែកពាក់ព័ន្ធនឹងអាយុ។
៥. បង្កើនអនាម័យក្នុងមាត់
ផ្លែម្នាស់ ជាប្រភពដ៏ប្រសើរនៃសារធាតុ bromelin ដែលជួយកម្ចាត់កំណកកំបោរ និងស្នាមប្រឡាក់ផ្សេងៗចេញពីធ្មេញធ្វើឱ្យសុខភាពក្នុងមាត់កាន់តែប្រសើរឡើង។
៦. ប្រយុទ្ធប្រឆាំងការរលាក
សារធាតុ bromelin នៅក្នុងផ្លែម្នាស់ គឺជាអង់ស៊ីមដែលមានលក្ខណៈសម្បត្តិប្រឆាំងការរលាកក្នុងរាងកាយ។ វាជួយឱ្យរាងកាយជៀសផុតពីជាតិពុលផ្សេងៗដោយការប្រយុទ្ធប្រឆាំងនឹងការរលាកដែលបង្កផលប៉ះពាល់ដល់សរីរាង្គ និងជាលិកាទាំងអស់ក្នុងរាងកាយ។ ការទទួលទានម្នាស់ជាប្រចាំអាចជួយព្យាបាលជំងឺរលាកសន្លាក់កម្រិតស្រាលដោយកាត់បន្ថយការរលាក និងការឈឺចាប់៕