ជំងឺដាច់សសៃឈាមក្នុងខួរក្បាល គឺជាជំងឺដ៏កាចសាហាវបំផុតមួយដែលបានឆក់យកអាយុជីវិតមនុស្សរាប់លានអ្នករាល់ឆ្នាំ។  (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?)  ប៉ុន្តែកុំបារម្ភ! ការសិក្សាស្រាវជ្រាវជាច្រើនបានបង្ហាញថា អ្នកអាចជៀសផុតពីជំងឺដាច់សសៃឈាមខួរក្បាលបាន ប្រសិនបើជ្រើសរើសទទួលទានអាហារត្រឹមត្រូវ និងទប់ស្កាត់បាននូវកត្តាហានិភ័យចម្បង ២ រួមមាន បញ្ហាសម្ពាធឈាម និងកូឡេស្តេរ៉ូលឡើងខ្ពស់។ ហើយក៏កុំភ្លេចធ្វើលំហាត់ប្រាណជាប្រចាំ, ឈប់ជក់បារី, កាត់បន្ថយស្ត្រេស និងការទទួលទានគ្រឿងស្រវឹងផង។ ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីអាហារដែលអ្នកគួរទទួលទានដើម្បីទប់ស្កាត់ហានិភ័យនៃជំងឺដាច់សសៃឈាមខួរក្បាល ៖

១. ផ្លែក្រូច

ចូរបន្ថែមផ្លែក្រូចក្នុងរបបអាហារប្រចាំថ្ងៃ ក៏ព្រោះវាមានផ្ទុកសម្បូរទៅដោយសារធាតុប្រឆាំងអុកស៊ីតកម្មដែលជួយទប់ស្កាត់កាត់បន្ថយហានិភ័យនៃជំងឺដាច់សសៃឈាមខួរក្បាល។ ហើយដើម្បីទទួលបានអត្ថប្រយោជន៍កាន់តែប្រសើរ ចូរទទួលទានទឹកក្រូចស្រស់ដែលច្របាច់ដោយខ្លួនឯងនៅផ្ទះ។

២. ដំឡូងផ្អែម

ជាប្រភពដ៏ប្រសើរនៃជាតិសសៃដែលជួយបញ្ចុះទាំងសម្ពាធឈាម និងកូឡេស្តេរ៉ូលមិនល្អ។ លើសពីនេះទៅទៀត ដំឡូងផ្អែមមានផ្ទុកសម្បូរទៅដោយប៉ូតាស្យូមជួយបញ្ចុះសម្ពាធឈាមបានយ៉ាងប្រសើរ។

៣. គ្រាប់ធញ្ញជាតិ និងគ្រាប់ពូជ

អ្នកឯកទេសខាងសុខភាពជាច្រើនបានណែនាំឱ្យទទួលទានគ្រាប់ធញ្ញជាតិ ឬគ្រាប់ពូជ ១ ក្ដាប់ដៃជាប្រចាំ ក៏ព្រោះវាមានផ្ទុកសម្បូរទៅដោយជាតិសសៃ និងអាស៊ីតខ្លាញ់អូមេហ្គា ៣ ដែលជួយកាត់បន្ថយហានិភ័យនៃជំងឺដាច់សសៃឈាមខួរក្បាល និងបញ្ចុះកម្រិតកូឡេស្តេរ៉ូលមិនល្អ។

៤. ត្រីសម្បូរខ្លាញ់

ត្រីសម្បូរខ្លាញ់គ្រប់ប្រភេទ រួមទាំងត្រីសាលម៉ុន, ត្រីធូណា, ត្រីសាឌីន, ត្រី herring, ត្រី
mackerel និងត្រី trout ជាប្រភពដ៏ប្រសើរនៃអាស៊ីតខ្លាញ់អូមេហ្គា ៣ ជួយទប់ស្កាត់ហានិភ័យនៃជំងឺដាច់សសៃឈាមខួរក្បាល ក៏ដូចជាបញ្ហាសុខភាពផ្សេងៗទៀត។ ដូច្នេះអ្នកគួរទទួលទានត្រីសម្បូរខ្លាញ់ឱ្យបានទៀងទាត់។

៥. ខ្ទឹមស

ខ្ទឹមស មានលក្ខណៈសម្បត្តិអស្ចារ្យក្នុងការទប់ស្កាត់បញ្ហាឈាមកកដែលជាអ្វីមួយបង្កជំងឺដាច់សសៃឈាមខួរក្បាល។

៦. សូកូឡាខ្មៅ

ការទទួលទានសូកូឡាខ្មៅដែលផ្សំឡើងពីជាតិកាកាវយ៉ាងហោចណាស់ ៧០ ភាគរយ មិនលើសពី ១០០ ក្រាមក្នុងមួយថ្ងៃជួយទប់ស្កាត់ហានិភ័យនៃជំងឺដាច់សសៃឈាមខួរក្បាលគួរឱ្យកត់សម្គាល់។

៧. កាហ្វេ

ការទទួលទានកាហ្វេក្នុងកម្រិតមធ្យមចន្លោះពី ២ ទៅ ៤ ពែងក្នុងមួយថ្ងៃអាចជួយកាត់បន្ថយហានិភ័យនៃជំងឺដាច់សសៃឈាមខួរក្បាលបានយ៉ាងប្រសើរ។ ប្រសិនបើអ្នកមិនចូលចិត្តទទួលទានកាហ្វេ អ្នកអាចទទួលទានតែបៃតងជំនួសក៏បាន ដោយវាក៏មានផ្ទុកសារធាតុជួយកាត់បន្ថយហានិភ័យនៃជំងឺដាច់សសៃឈាមខួរក្បាលដែរ៕