យោងតាមការចុះផ្សាយពីប្រភពបរទេស ការងូតទឹកក្តៅឧណ្ហៗអាចជួយឱ្យរាងកាយមានអារម្មណ៍ធូរស្រាល ប៉ុន្តែការងូតទឹកក្តៅពេក ឬយូរពេក អាចធ្វើឱ្យស្បែកស្ងួត តឹងណែន និងរមាស់ក្រោយងូតទឹករួច។ បញ្ហានេះមិនមែនសុទ្ធតែបណ្តាលមកពីការអាលែកហ្ស៊ីនឹងទឹកនោះទេ ប៉ុន្តែអាចកើតឡើងដោយសារស្បែកបាត់បង់សំណើម និងជាតិខ្លាញ់ធម្មជាតិដែលជួយការពារស្បែក។
មូលហេតុសំខាន់គឺ ទឹកក្តៅអាចជម្រុះជាតិខ្លាញ់ធម្មជាតិចេញពីផ្ទៃស្បែក ដែលជួយរក្សាសំណើម និងការពារស្បែកពីការរលាក។ នៅពេលស្រទាប់ការពារនេះថយចុះ ស្បែកងាយបាត់បង់សំណើម បណ្តាលឱ្យស្ងួត តឹង របក និងរមាស់។ ក្រៅពីនេះ ការប្រើសាប៊ូមានសារធាតុលាងសម្អាតខ្លាំង ឬមានក្លិនក្រអូប ការដុសស្បែកខ្លាំងៗ និងជំងឺស្បែកមួយចំនួន ក៏អាចធ្វើឱ្យបញ្ហាកាន់តែធ្ងន់ធ្ងរផងដែរ។
ដើម្បីកាត់បន្ថយបញ្ហានេះ គួរប្រើទឹកក្តៅឧណ្ហៗ មិនក្តៅខ្លាំង និងកំណត់ពេលងូតទឹកប្រហែល ៥ ទៅ ១០នាទី។ គួរជ្រើសរើសសាប៊ូ ឬផលិតផលងូតទឹកដែលមានភាពទន់ភ្លន់ និងជៀសវាងការដុសខាត់ស្បែកខ្លាំងៗ។ បន្ទាប់ពីងូតទឹករួច គួរប្រើកន្សែងជូតខ្លួនថ្នមៗ រួចលាបក្រែមផ្តល់សំណើមនៅពេលស្បែកនៅសើមបន្តិច ដើម្បីជួយរក្សាសំណើម និងកាត់បន្ថយការស្ងួត។
គួរបញ្ជាក់ថា មនុស្សមួយចំនួនអាចមានអាការៈរមាស់ក្រោយប៉ះទឹក ទោះជាទឹកមានសីតុណ្ហភាពធម្មតាក៏ដោយ និងពេលខ្លះមិនមានកន្ទួលលើស្បែកនោះទេ។ ស្ថានភាពនេះអាចពាក់ព័ន្ធនឹងបញ្ហាសុខភាពមួយចំនួនដែលត្រូវការការពិនិត្យបន្ថែម។ ប្រសិនបើរមាស់ជាញឹកញាប់ រមាស់ខ្លាំងដល់រំខានដល់ដំណេក មានកន្ទួល ការហើម ស្បែកប្រេះ ឬរមាស់ពេញខ្លួនដោយមិនដឹងមូលហេតុ គួរទៅពិគ្រោះជាមួយគ្រូពេទ្យ។
ជារួម ការងូតទឹកក្តៅយូរពេកអាចធ្វើឱ្យស្បែកបាត់បង់ជាតិខ្លាញ់ធម្មជាតិ បណ្តាលឱ្យស្ងួត និងរមាស់ដោយមិនដឹងខ្លួន។ ការបន្ថយកម្ដៅទឹក កាត់បន្ថយរយៈពេលងូតទឹក ជ្រើសរើសសាប៊ូដែលទន់ភ្លន់ និងលាបក្រែមផ្តល់សំណើមក្រោយងូតទឹក គឺជាវិធីងាយៗដែលអាចជួយថែរក្សាស្បែកឱ្យមានសុខភាពល្អ និងកាត់បន្ថយការរមាស់បាន៕