យោងតាមការចុះផ្សាយពីប្រភពបរទេស សម្ពាធឈាមខ្ពស់គឺជាបញ្ហាសុខភាពដែលបុរសវ័យ ៤០ឆ្នាំឡើងគួរយកចិត្តទុកដាក់ ព្រោះជំងឺនេះអាចវិវត្តដោយមិនបង្ហាញរោគសញ្ញាច្បាស់លាស់។ ប្រសិនបើមិនបានរកឃើញ និងគ្រប់គ្រងទាន់ពេល វាអាចបង្កើនហានិភ័យជំងឺបេះដូង ដាច់សរសៃឈាមខួរក្បាល និងជំងឺតម្រងនោម។ ទោះជាយ៉ាងណា មានសញ្ញា និងបញ្ហា ៥យ៉ាងដែលគួរយកចិត្តទុកដាក់ និងពិចារណាទៅពិនិត្យសុខភាព។
ចំណុចទី១ គឺការឈឺក្បាលញឹកញាប់ ឬឈឺក្បាលខ្លាំងដោយមិនដឹងមូលហេតុ។ ចំណុចទី២ គឺការគេងមិនស្កប់ស្កល់ ស្រមុកខ្លាំង ឬមានអាការៈផ្អាកដកដង្ហើមពេលគេង។ បញ្ហាផ្អាកដកដង្ហើមពេលគេងអាចមានទំនាក់ទំនងនឹងសម្ពាធឈាមខ្ពស់ ហើយគួរទៅពិនិត្យ ប្រសិនបើមានសញ្ញាដូចជាភ្ញាក់ដង្ហក់ ឬងងុយគេងខ្លាំងនៅពេលថ្ងៃ។
ចំណុចទី៣ គឺងាយនឿយហត់ ឬដកដង្ហើមមិនស្រួល សូម្បីតែធ្វើសកម្មភាពដែលធ្លាប់ធ្វើបានធម្មតា។ ចំណុចទី៤ គឺហូរឈាមតាមច្រមុះញឹកញាប់ដោយមិនដឹងមូលហេតុ។ អាការៈទាំងនេះអាចពាក់ព័ន្ធនឹងបញ្ហាសុខភាពជាច្រើន ហើយមិនអាចសន្និដ្ឋានថាបណ្តាលមកពីសម្ពាធឈាមខ្ពស់តែមួយមុខបានឡើយ។ ប្រសិនបើកើតឡើងជាបន្តបន្ទាប់ គួរទៅពិនិត្យដើម្បីស្វែងរកមូលហេតុ។
ចំណុចទី៥ គឺវិលមុខ ឬងងឹតមុខនៅពេលក្រោកឈរពីគ្រែ ឬពីកៅអី។ អាការៈនេះអាចពាក់ព័ន្ធនឹងការធ្លាក់ចុះសម្ពាធឈាមពេលផ្លាស់ប្តូរឥរិយាបថ ការខ្វះជាតិទឹក ឬឥទ្ធិពលថ្នាំមួយចំនួន។ ដូច្នេះ មិនគួរចាត់ទុកការវិលមុខជាសញ្ញាបញ្ជាក់ថាមានសម្ពាធឈាមខ្ពស់នោះទេ។ គួរវាស់សម្ពាធឈាមជាក់ស្តែង ដើម្បីដឹងពីស្ថានភាពសុខភាព។
ជារួម បុរសវ័យ ៤០ឆ្នាំឡើងមិនគួររង់ចាំរហូតមានរោគសញ្ញាទើបវាស់សម្ពាធឈាមនោះទេ ព្រោះមនុស្សភាគច្រើនដែលមានសម្ពាធឈាមខ្ពស់មិនមានអាការៈឱ្យសម្គាល់ឡើយ។ គួរវាស់សម្ពាធឈាមជាប្រចាំ កាត់បន្ថយការទទួលទានអំបិល ហាត់ប្រាណ រក្សាទម្ងន់ឱ្យសមស្រប និងជៀសវាងការជក់បារី។ ប្រសិនបើសម្ពាធឈាមឡើងដល់ ១៨០/១២០ មិល្លីម៉ែត្របារត ឬខ្ពស់ជាងនេះ ហើយមានឈឺទ្រូង ដកដង្ហើមពិបាក ឈឺក្បាលខ្លាំង ឬការប្រែប្រួលចក្ខុវិស័យ ត្រូវស្វែងរកជំនួយវេជ្ជសាស្ត្របន្ទាន់៕