យោងតាមការចុះផ្សាយពីប្រភពបរទេស ជំងឺខ្លាញ់រុំថ្លើមមិនមែនកើតឡើងតែលើអ្នកលើសទម្ងន់ ឬធាត់ជ្រុលនោះទេ សូម្បីតែមនុស្សមានរាងស្គម និងទម្ងន់ធម្មតាក៏អាចប្រឈមនឹងបញ្ហានេះដែរ។ វេជ្ជបណ្ឌិត លួ ធី មិញយ៉េប អ្នកជំនាញផ្នែកក្រពះ និងថ្លើមនៃមន្ទីរពេទ្យបាក់ម៉ៃ បានពន្យល់ថា ជំងឺនេះកើតឡើងនៅពេលជាតិខ្លាញ់កកកុញក្នុងថ្លើមលើសពី ៥ភាគរយនៃទម្ងន់ថ្លើម ហើយអាចប៉ះពាល់ដល់មុខងាររបស់សរីរាង្គនេះ។
មូលហេតុសំខាន់ៗមាន ៥យ៉ាង រួមមាន៖ ទី១ ទម្លាប់ញ៉ាំអាហារមិនល្អ ដូចជាអាហារមានជាតិស្ករ ខ្លាញ់ខ្ពស់ អាហាររហ័ស និងភេសជ្ជៈមានជាតិអាល់កុល។ ទី២ ការលើសទម្ងន់ និងធាត់ជ្រុល ដែលធ្វើឱ្យជាតិខ្លាញ់អាចកកកុញក្នុងថ្លើម។ ទី៣ ការរស់នៅមិនសូវធ្វើចលនា ឬអង្គុយយូរ និងមិនហាត់ប្រាណ។ ទី៤ ជំងឺពាក់ព័ន្ធនឹងការរំលាយអាហារ ដូចជាជំងឺទឹកនោមផ្អែម និងលើសសម្ពាធឈាម។ ទី៥ កត្តាតំណពូជ ដែលអាចធ្វើឱ្យមនុស្សមួយចំនួនងាយប្រឈមនឹងការកកស្ទះខ្លាញ់ក្នុងថ្លើម ទោះបីមានរាងស្គមក៏ដោយ។
ចំណុចគួរឱ្យបារម្ភ គឺជំងឺខ្លាញ់រុំថ្លើមភាគច្រើនមិនបង្ហាញរោគសញ្ញាច្បាស់លាស់នៅដំណាក់កាលដំបូងទេ។ នៅពេលជំងឺវិវត្តទៅមុខ អ្នកជំងឺអាចមានអាការៈអស់កម្លាំង មិនស្រួលខ្លួន ឈឺ ឬណែនធ្ងន់នៅផ្នែកខាងស្តាំនៃពោះ បាត់បង់ចំណង់អាហារ ចង្អោរ ឬស្រកទម្ងន់ដោយមិនដឹងមូលហេតុ។ ប្រសិនបើការខូចខាតថ្លើមបន្តអូសបន្លាយ វាអាចវិវត្តទៅជាការរលាកថ្លើម ការកករឹងថ្លើម និងក្រិនថ្លើម ដែលអាចធ្វើឱ្យមុខងារថ្លើមចុះខ្សោយ។ ដូច្នេះ អ្នកមានកត្តាប្រឈមគួរពិនិត្យសុខភាព មិនគួររង់ចាំរហូតមានរោគសញ្ញាទើបពិនិត្យនោះទេ។
ដើម្បីកាត់បន្ថយហានិភ័យ គួរបង្កើនការញ៉ាំបន្លែ ផ្លែឈើស្រស់ និងអាហារសម្បូរជាតិសរសៃ ព្រមទាំងកាត់បន្ថយអាហារមានជាតិស្ករ ខ្លាញ់ច្រើន អាហារកែច្នៃ និងគ្រឿងស្រវឹង។ គួរធ្វើសកម្មភាពរាងកាយ និងហាត់ប្រាណជាប្រចាំ។ សម្រាប់អ្នកលើសទម្ងន់ ការសម្រកទម្ងន់បន្តិចម្តងៗអាចជួយកែលម្អស្ថានភាពថ្លើមបាន ដោយការសម្រកទម្ងន់លើសពី ៣ភាគរយអាចជួយកាត់បន្ថយខ្លាញ់ក្នុងថ្លើម ខណៈការសម្រកប្រហែល ៥ ទៅ ៧ភាគរយអាចជួយកែលម្អការរលាកថ្លើម ហើយការសម្រកលើសពី ១០ភាគរយអាចជួយកែលម្អស្ថានភាពកករឹងថ្លើម។
ជារួម មនុស្សស្គមក៏អាចមានជំងឺខ្លាញ់រុំថ្លើមដែរ ដូច្នេះកុំវាយតម្លៃសុខភាពថ្លើមតាមរូបរាង ឬទម្ងន់តែមួយមុខ។ ចំពោះអ្នកស្គមដែលមានបញ្ហានេះ គោលដៅមិនមែនគ្រាន់តែសម្រកទម្ងន់នោះទេ ប៉ុន្តែត្រូវផ្តោតលើការកាត់បន្ថយជាតិខ្លាញ់លើស ការបង្កើនសាច់ដុំ និងការកែលម្អការរំលាយអាហារ។ ការពិនិត្យសុខភាពជាប្រចាំ ការញ៉ាំអាហារមានតុល្យភាព និងការហាត់ប្រាណសមស្រប គឺជាវិធីសំខាន់ក្នុងការរកឃើញបញ្ហាឱ្យបានទាន់ពេល និងកាត់បន្ថយហានិភ័យនៃការវិវត្តទៅជាជំងឺថ្លើមធ្ងន់ធ្ងរ៕