យោងតាមការចុះផ្សាយពីប្រភពបរទេស ការភ្ញាក់ពីគេងហើយមុខមើលទៅស្រអាប់ មិនស្រស់ថ្លា មានរង្វង់ខ្មៅក្រោមភ្នែក មុខហើម ឬស្បែកស្ងួត ទោះបីគេងបាន ៧ទៅ៨ម៉ោងក៏ដោយ អាចបណ្តាលមកពីកត្តាជាច្រើន មិនមែនតែការគេងមិនគ្រប់គ្រាន់នោះទេ។ ទម្លាប់រស់នៅ អាហារដែលទទួលទាន ការថែរក្សាស្បែក និងបរិយាកាសពេលគេង សុទ្ធតែអាចមានឥទ្ធិពលលើសភាពស្បែកនៅពេលព្រឹក។
មូលហេតុទី១ គឺការទទួលទានអាហារប្រៃខ្លាំងនៅពេលល្ងាច ព្រោះការទទួលទានអំបិលច្រើនអាចធ្វើឱ្យរាងកាយរក្សាទឹកច្រើនជាងធម្មតា និងបណ្តាលឱ្យមនុស្សមួយចំនួនមានមុខហើម ជាពិសេសនៅជុំវិញភ្នែក និងថ្ពាល់។ មូលហេតុទី២ គឺការផឹកទឹកមិនគ្រប់គ្រាន់ក្នុងអំឡុងថ្ងៃ ដែលអាចធ្វើឱ្យស្បែកស្ងួត បាត់បង់ភាពទន់រលោង និងធ្វើឱ្យស្នាមជ្រួញតូចៗមើលឃើញច្បាស់ជាងមុន។ ដូច្នេះ គួរបន្ថយអាហារប្រៃ និងផឹកទឹកឱ្យសមស្របជាប្រចាំ។
មូលហេតុទី៣ គឺការមិនសម្អាតមុខឱ្យបានត្រឹមត្រូវមុនចូលគេង ដែលអាចធ្វើឱ្យសំណល់គ្រឿងសម្អាង ក្រែមការពារកម្តៅថ្ងៃ ជាតិខ្លាញ់ និងធូលីកខ្វក់ជាប់លើស្បែក បង្កើនហានិភ័យនៃការស្ទះរន្ធញើស និងបញ្ហាមុន។ មូលហេតុទី៤ គឺស្រោមខ្នើយ និងសម្ភារៈគេងដែលមិនបានសម្អាតជាប្រចាំ អាចមានសំណល់ញើស ជាតិខ្លាញ់ ស្បែកងាប់ និងធូលី ដែលអាចបង្កការរលាក ឬធ្វើឱ្យបញ្ហាស្បែកកាន់តែធ្ងន់ធ្ងរឡើងចំពោះមនុស្សមួយចំនួន។
មូលហេតុទី៥ គឺគុណភាពនៃការគេងមិនល្អ ទោះបីគេងបាន ៨ម៉ោងក៏ដោយ ប្រសិនបើគេងមិនស្កប់ស្កល់ ភ្ញាក់ញឹកញាប់ពេលយប់ ឬមានបញ្ហាដកដង្ហើមពេលគេង ក៏អាចធ្វើឱ្យភ្នែកមើលទៅស្រអាប់ មុខមើលទៅអស់កម្លាំង និងស្បែកមិនស្រស់ថ្លាផងដែរ។ គួររៀបចំបរិយាកាសបន្ទប់គេងឱ្យសមស្រប កាត់បន្ថយការប្រើទូរសព្ទមុនចូលគេង និងរក្សាម៉ោងគេងឱ្យទៀងទាត់។
ដើម្បីជួយឱ្យមុខមើលទៅស្រស់ថ្លានៅពេលព្រឹក គួរបន្ថយអាហារប្រៃ ផឹកទឹកឱ្យគ្រប់គ្រាន់ សម្អាតមុខមុនចូលគេង ប្រើក្រែមផ្តល់សំណើមឱ្យសមស្រប បោកស្រោមខ្នើយជាប្រចាំ និងយកចិត្តទុកដាក់លើគុណភាពនៃការគេង។ ប្រសិនបើមុខស្លេក ឬស្រអាប់ជាប់រហូត ទោះបានកែប្រែទម្លាប់ហើយក៏ដោយ ហើយមានអាការៈដូចជា ងាយអស់កម្លាំង វិលមុខ បេះដូងលោតញាប់ ស្រកទម្ងន់ដោយមិនដឹងមូលហេតុ ឬភ្នែកនិងស្បែកឡើងលឿង គួរទៅពិគ្រោះជាមួយគ្រូពេទ្យ ដើម្បីស្វែងរកមូលហេតុ ព្រោះអាចពាក់ព័ន្ធនឹងបញ្ហាសុខភាពផ្សេងៗ ដូចជាខ្វះឈាម ឬបញ្ហាថ្លើម ៕