យោងតាមការចុះផ្សាយពីប្រភពបរទេស ការផ្លាស់ប្តូរលំដាប់នៃការញ៉ាំអាហារ ដោយចាប់ផ្តើមពីបន្លែមុនបាយ ឬអាហារដែលមានជាតិម្សៅ អាចផ្តល់អត្ថប្រយោជន៍ដល់សុខភាព ជាពិសេសការគ្រប់គ្រងជាតិស្ករក្នុងឈាម និងទម្ងន់រាងកាយ។ បន្លែមានកាឡូរីមិនខ្ពស់ និងសម្បូរជាតិសរសៃ ដែលជួយឱ្យឆ្អែតបានយូរ និងកាត់បន្ថយការញ៉ាំអាហារច្រើនលើសតម្រូវការ។
អត្ថប្រយោជន៍ទី១ គឺជួយគ្រប់គ្រងទម្ងន់ ព្រោះការញ៉ាំបន្លែមុនអាចធ្វើឱ្យយើងឆ្អែតលឿន និងញ៉ាំបាយ ឬអាហារផ្សេងៗក្នុងបរិមាណតិចជាងមុន។ អត្ថប្រយោជន៍ទី២ គឺជួយឱ្យរាងកាយទទួលបានជីវជាតិកាន់តែច្រើន ដោយបន្លែសម្បូរទៅដោយវីតាមីន ជាតិរ៉ែ ប៉ូតាស្យូម និងជាតិសរសៃ ដែលមានសារៈសំខាន់ចំពោះប្រព័ន្ធរំលាយអាហារ និងសុខភាពបេះដូង។ ការញ៉ាំបន្លែឱ្យបានច្រើនក៏អាចជួយកាត់បន្ថយការទទួលទានអាហារដែលមានជាតិស្ករ អំបិល និងខ្លាញ់ឆ្អែតច្រើនផងដែរ។
ចំណុចទី៣ គឺជួយកាត់បន្ថយការកើនឡើងជាតិស្ករក្នុងឈាមក្រោយពេលញ៉ាំអាហារ។ ការសិក្សាមួយដែលចុះផ្សាយក្នុងទស្សនាវដ្តីអាហារូបត្ថម្ភ បានប្រៀបធៀបអ្នកដែលញ៉ាំបន្លែមុនបាយ ជាមួយអ្នកដែលញ៉ាំបាយមុនបន្លែ។ លទ្ធផលបង្ហាញថា ការញ៉ាំបន្លែមុនអាហារដែលមានជាតិម្សៅ អាចជួយកាត់បន្ថយការកើនឡើងជាតិស្ករ និងអ័រម៉ូនអាំងស៊ុយលីនក្រោយអាហារបាន។ ជាតិសរសៃក្នុងបន្លែអាចជួយបន្ថយល្បឿននៃការស្រូបយកជាតិស្ករ ប៉ុន្តែផលប្រយោជន៍អាចខុសគ្នាតាមប្រភេទអាហារ និងស្ថានភាពសុខភាពរបស់មនុស្សម្នាក់ៗ។
ដើម្បីអនុវត្តទម្លាប់នេះ គួរចាប់ផ្តើមអាហារដោយញ៉ាំបន្លែស្ងោរ បន្លែឆា ឬសាលាដមួយចំណែកសិន រួចទើបបន្តញ៉ាំសាច់ ត្រី ស៊ុត និងបាយ។ អាចជ្រើសរើសស៊ុបបន្លែជាមុខម្ហូបដំបូង ឬបង្កើនបរិមាណបន្លែឱ្យបានប្រហែលពាក់កណ្តាលចានអាហារ។ ប្រសិនបើបន្លែត្រូវបានចម្អិនជាមួយត្រី ឬសាច់គ្មានខ្លាញ់ ក៏អាចចាប់ផ្តើមញ៉ាំមុខម្ហូបនោះមុនអាហារដែលមានជាតិម្សៅបានដែរ។
ជារួម ការញ៉ាំបន្លែមុនបាយ គឺជាទម្លាប់សាមញ្ញដែលអាចជួយឱ្យទទួលបានជាតិសរសៃកាន់តែច្រើន ឆ្អែតបានយូរ និងជួយគ្រប់គ្រងជាតិស្ករក្នុងឈាមក្រោយអាហារ។ ទោះជាយ៉ាងណា វាមិនមែនជាវិធីព្យាបាលជំងឺទឹកនោមផ្អែម ឬអាចជំនួសថ្នាំព្យាបាលបាននោះទេ។ អ្វីដែលសំខាន់ គឺញ៉ាំអាហារឱ្យមានតុល្យភាព បន្ថែមបន្លែឱ្យបានគ្រប់គ្រាន់ និងរក្សាទម្លាប់រស់នៅដែលមានសុខភាពល្អជាប្រចាំ៕