យោងតាមការចុះផ្សាយពីប្រភពបរទេស ផ្លែឈើជាប្រភពវីតាមីន ជាតិរ៉ែ និងជាតិសរសៃដែលមានប្រយោជន៍ចំពោះសុខភាព ប៉ុន្តែផ្លែឈើនីមួយៗមានបរិមាណជាតិស្ករខុសៗគ្នា។ សម្រាប់អ្នកមានជំងឺទឹកនោមផ្អែម ឬអ្នកដែលកំពុងគ្រប់គ្រងជាតិស្ករក្នុងឈាម ការជ្រើសរើសប្រភេទផ្លែឈើ និងបរិមាណដែលញ៉ាំ គឺមានសារៈសំខាន់។ ខាងក្រោមនេះជាផ្លែឈើ ១០ប្រភេទដែលមានជាតិស្ករមិនខ្ពស់ បើប្រៀបធៀបនឹងផ្លែឈើផ្អែមមួយចំនួន។
ផ្លែឈើប្រភេទទី១ គឺផ្លែប័រ ដែលមានជាតិស្ករប្រហែល ១ក្រាមក្នុងមួយផ្លែ និងសម្បូរជាតិខ្លាញ់ល្អ និងជាតិសរសៃ។ ប្រភេទទី២ គឺក្រូចឆ្មារ ដែលមានជាតិស្ករប្រហែល ១ ទៅ ២ក្រាមក្នុងមួយផ្លែ និងមានវីតាមីនសេ។ ចំណែកក្រុមផ្លែប៊ឺរីមាន ៣ប្រភេទ គឺផ្លែរ៉ាសបឺរី មានជាតិស្ករប្រហែល ៥ក្រាមក្នុងមួយពែង ផ្លែស្ត្របឺរីប្រហែល ៧ក្រាមក្នុងមួយពែង និងផ្លែប៊្លែកបឺរីប្រហែល ៧ក្រាមក្នុងមួយពែង។ ផ្លែឈើទាំងនេះមានជាតិសរសៃ និងសារធាតុប្រឆាំងអុកស៊ីតកម្ម ដែលជួយបំពេញបន្ថែមជីវជាតិដល់រាងកាយ។
ផ្លែឈើប្រភេទទី៦ គឺផ្លែគីវី ដែលមានជាតិស្ករប្រហែល ៦,៧ក្រាមក្នុងមួយផ្លែ និងសម្បូរវីតាមីនសេ។ ប្រភេទទី៧ គឺក្រូចហ្គ្រេបហ្វ្រូត ដែលមានជាតិស្ករប្រហែល ១០,៦ក្រាមក្នុងកន្លះផ្លែ។ ប្រភេទទី៨ គឺផ្លែឪឡឹក ដែលមានជាតិស្ករតិចជាង ១០ក្រាមក្នុងមួយពែង ដោយសារមានជាតិទឹកច្រើន។ ប្រភេទទី៩ គឺផ្លែខាន់តាលូប ដែលមានជាតិស្ករតិចជាង ១៣ក្រាមក្នុងមួយពែង និងមានវីតាមីនអា។ ចំណែកប្រភេទទី១០ គឺក្រូចស្រស់ ដែលមានជាតិស្ករប្រហែល ១៤ក្រាមក្នុងមួយផ្លែ ព្រមទាំងផ្តល់វីតាមីនសេ និងប៉ូតាស្យូម។ បរិមាណជាតិស្ករទាំងនេះអាចប្រែប្រួលតាមទំហំផ្លែ និងកម្រិតទុំ។
ដើម្បីជួយគ្រប់គ្រងជាតិស្ករក្នុងឈាម គួរញ៉ាំផ្លែឈើស្រស់ទាំងមូល ជំនួសឱ្យការច្របាច់យកតែទឹក ព្រោះជាតិសរសៃក្នុងសាច់ផ្លែឈើជួយបន្ថយល្បឿននៃការស្រូបយកជាតិស្ករ។ អាចញ៉ាំផ្លែឈើជាមួយអាហារដែលមានប្រូតេអ៊ីន ឬខ្លាញ់ល្អ ដូចជាគ្រាប់អាល់ម៉ុន យ៉ាអួធម្មជាតិ ឬឈីស ក្នុងបរិមាណសមរម្យ។ គួរកាត់បន្ថយផ្លែឈើសម្ងួត និងផ្លែឈើកំប៉ុងដែលមានបន្ថែមស្ករ ព្រោះអាចធ្វើឱ្យទទួលបានជាតិស្ករច្រើនដោយមិនដឹងខ្លួន។
ជារួម មិនចាំបាច់បោះបង់ការញ៉ាំផ្លែឈើដើម្បីគ្រប់គ្រងជាតិស្ករក្នុងឈាមនោះទេ ប៉ុន្តែត្រូវជ្រើសរើសប្រភេទ និងបរិមាណឱ្យបានសមស្រប។ គួរចងចាំថា ផ្លែឈើដែលមានជាតិស្ករទាបក៏អាចធ្វើឱ្យជាតិស្ករក្នុងឈាមកើនឡើងបាន ប្រសិនបើញ៉ាំច្រើនពេក។ អ្នកមានជំងឺទឹកនោមផ្អែមគួរតាមដានជាតិស្ករក្នុងឈាម និងកំណត់បរិមាណផ្លែឈើតាមការណែនាំរបស់គ្រូពេទ្យ ឬអ្នកជំនាញអាហារូបត្ថម្ភ ដើម្បីទទួលបានជីវជាតិគ្រប់គ្រាន់ និងគ្រប់គ្រងសុខភាពឱ្យបានល្អ៕