យោងតាមការចុះផ្សាយពីប្រភពបរទេស បន្លែដែលយើងទិញមកចម្អិនជាអាហារប្រចាំថ្ងៃ អាចមានសំណល់ថ្នាំកសិកម្ម ដី ភាពកខ្វក់ និងមេរោគជាប់នៅលើផ្ទៃស្លឹក ឬសម្បក។ ប្រសិនបើមិនបានលាងសម្អាតឱ្យបានត្រឹមត្រូវ សារធាតុមួយចំនួនអាចចូលទៅក្នុងរាងកាយតាមរយៈការទទួលទាន។ ដូច្នេះ ការលាងបន្លែឱ្យបានត្រឹមត្រូវមុនចម្អិន ឬបរិភោគ គឺជាវិធីសាមញ្ញមួយដែលអាចជួយកាត់បន្ថយសំណល់សារធាតុកខ្វក់ និងហានិភ័យសុខភាពបាន។
គន្លឹះទី១ គឺដកស្លឹកខាងក្រៅដែលចាស់ រលួយ ឬមានស្នាមខូចចេញជាមុន ជាពិសេសបន្លែដូចជាស្ពៃក្តោប និងសាឡាដ។ គន្លឹះទី២ គឺលាងបន្លែក្រោមទឹកស្អាតដែលកំពុងហូរ ដោយប្រើដៃត្រដុសថ្នមៗលើផ្ទៃស្លឹក និងផ្លែ ដើម្បីជួយយកដី សំណល់ និងសារធាតុកខ្វក់ដែលជាប់លើផ្ទៃចេញ។ ចំពោះបន្លែដែលមានសម្បករឹង ដូចជាត្រសក់ និងដំឡូង អាចប្រើច្រាសស្អាតសម្រាប់ដុសផ្ទៃបាន។
គន្លឹះទី៣ គឺបំបែកស្លឹកបន្លែជាបន្ទះៗ ហើយលាងម្តងមួយៗ ដើម្បីឱ្យទឹកអាចប៉ះដល់គ្រប់ផ្ទៃ ជាពិសេសផ្នែកដែលមានដី ឬកខ្វក់ជាប់។ គន្លឹះទី៤ គឺលាងបន្លែមុនពេលកាត់ ឬបកសម្បក ព្រោះការកាត់បន្លែដែលមិនទាន់លាងអាចធ្វើឱ្យដី និងមេរោគពីសម្បកជ្រាបចូលទៅក្នុងផ្នែកខាងក្នុង។ បន្ទាប់ពីលាងរួច អាចប្រើក្រណាត់ស្អាត ឬក្រដាសស្អាតជូតឱ្យស្ងួតមុនយកទៅចម្អិន។ មិនគួរត្រាំបន្លែក្នុងទឹករយៈពេលយូរពេកទេ ព្រោះអាចធ្វើឱ្យបាត់បង់វីតាមីនមួយចំនួនដែលរលាយក្នុងទឹក។
គន្លឹះទី៥ គឺជៀសវាងប្រើសាប៊ូលាងចាន ម្សៅសាប៊ូ ទឹកអំបិលខាប់ ឬសារធាតុសម្អាតផ្សេងៗមកលាងបន្លែ ព្រោះសារធាតុទាំងនេះអាចបន្សល់ទុកលើអាហារ និងបង្កគ្រោះថ្នាក់នៅពេលទទួលទាន។ ការលាងដោយទឹកស្អាតកំពុងហូរ និងដុសថ្នមៗ អាចជួយកាត់បន្ថយសំណល់ថ្នាំកសិកម្មមួយចំនួននៅលើផ្ទៃបន្លែ ប៉ុន្តែមិនអាចកម្ចាត់សារធាតុទាំងអស់បានទេ។ គួរលាងដៃឱ្យស្អាតមុនរៀបចំម្ហូប និងប្រើកន្លែងលាងបន្លែដែលស្អាតផងដែរ។
ជារួម ការលាងបន្លែបានត្រឹមត្រូវអាចជួយកាត់បន្ថយដី មេរោគ និងសំណល់សារធាតុគីមីមួយចំនួនដែលជាប់នៅលើផ្ទៃ ប៉ុន្តែមិនអាចកម្ចាត់សារធាតុពុលគ្រប់ប្រភេទបាននោះទេ។ ជាពិសេស សារធាតុអាសេនិចដែលរុក្ខជាតិស្រូបយកពីដី និងទឹកកខ្វក់ អាចស្ថិតនៅក្នុងផ្នែកខាងក្នុងរបស់រុក្ខជាតិ ហើយមិនអាចយកចេញបានដោយការលាងធម្មតាឡើយ។ ដូច្នេះ គួរជ្រើសរើសបន្លែពីប្រភពដែលទុកចិត្តបាន ប្រើទឹកស្អាតក្នុងការលាង និងចម្អិនអាហារ ព្រមទាំងបរិភោគបន្លែឱ្យបានចម្រុះ ដើម្បីកាត់បន្ថយការប្រឈមនឹងសារធាតុបំពុល និងថែរក្សាសុខភាពគ្រួសារឱ្យបានល្អ៕