យោងតាមការចុះផ្សាយពីប្រភពបរទេស បញ្ហាស្បែកក្លៀកខ្មៅជារឿងដែលមនុស្សជាច្រើនព្រួយបារម្ភ ជាពិសេសនៅពេលស្លៀកពាក់អាវដៃខ្លី ឬលើកដៃ។ ប៉ុន្តែស្បែកក្លៀកប្រែជាខ្មៅមិនមែនសុទ្ធតែបណ្តាលមកពីភាពកខ្វក់នោះទេ ព្រោះអាចពាក់ព័ន្ធនឹងការកកិតស្បែក ការកោររោម និងការរលាកដោយសារផលិតផលដែលប្រើប្រាស់។ ដើម្បីជួយឱ្យស្បែកតំបន់នេះមានពណ៌ស្មើជាងមុន គួរចាប់ផ្តើមពីការថែរក្សាដោយទន់ភ្លន់។
វិធីទី១ គឺកាត់បន្ថយការកកិត ដោយជ្រើសរើសសម្លៀកបំពាក់ដែលមានផាសុកភាព មិនតឹងសង្កត់តំបន់ក្លៀកពេក។ វិធីទី២ គឺកែប្រែរបៀបកោររោមក្លៀក ដោយប្រើឡាមស្អាត មិនកោរដដែលៗខ្លាំងពេក និងមិនសង្កត់ឡាមទៅលើស្បែក។ គួរប្រើផលិតផលជួយឱ្យការកោររលូន និងថែរក្សាស្បែកក្រោយកោរឱ្យបានល្អ ដើម្បីកាត់បន្ថយការរលាក និងស្នាមខ្មៅ។
វិធីទី៣ គឺជ្រើសរើសផលិតផលបំបាត់ក្លិនខ្លួនដែលមានលក្ខណៈទន់ភ្លន់។ ប្រសិនបើប្រើរ៉ូលអនហើយមានអាការៈក្រហាយ រមាស់ ឬក្រហមស្បែក គួរឈប់ប្រើ និងប្តូរទៅផលិតផលដែលសមស្របនឹងស្បែកងាយប្រតិកម្ម។ វិធីទី៤ គឺជៀសវាងការខាត់ ឬដុសស្បែកក្លៀកខ្លាំងៗ ដើម្បីសង្ឃឹមថាអាចធ្វើឱ្យស្បែកសលឿន ព្រោះវាអាចបង្កការរលាក និងធ្វើឱ្យស្នាមខ្មៅកាន់តែច្បាស់។ ក៏មិនគួរយកក្រូចឆ្មារ ឬម្សៅសូដា មកលាបនិងដុសស្បែកក្លៀកដោយខ្លួនឯងដែរ។
វិធីទី៥ គឺផ្តល់សំណើមដល់ស្បែក ដោយប្រើក្រែមផ្តល់សំណើមដែលមានលក្ខណៈទន់ភ្លន់ ជាពិសេសក្រោយពេលងូតទឹក ដើម្បីជួយរក្សាស្រទាប់ការពារស្បែក និងកាត់បន្ថយភាពស្ងួត។ វិធីទី៦ គឺស្វែងរកមូលហេតុ ប្រសិនបើស្បែកក្លៀកប្រែជាខ្មៅខុសធម្មតា ឬមានសភាពក្រាស់ និងរដុបដូចក្រណាត់កាម៉ៃ ព្រមទាំងមានស្បែកខ្មៅនៅតំបន់ក ឬក្រលៀនផងដែរ។ ក្នុងករណីនេះ អាចពាក់ព័ន្ធនឹងបញ្ហាស្បែកមួយចំនួន ដូច្នេះគួរទៅពិគ្រោះជាមួយគ្រូពេទ្យជំនាញ។
ជាចុងក្រោយ ការធ្វើឱ្យស្បែកក្លៀកត្រឡប់មកមានពណ៌ស្មើគ្នា មិនអាចឃើញលទ្ធផលក្នុងរយៈពេលតែប៉ុន្មានថ្ងៃនោះទេ។ ប្រសិនបើបញ្ហាបណ្តាលមកពីការកកិត ឬការរលាក ការឈប់ប្រើអ្វីដែលបង្កប្រតិកម្ម និងថែរក្សាស្បែកជាប្រចាំ អាចជួយឱ្យស្បែកប្រសើរឡើងបន្តិចម្តងៗ។ អ្វីដែលសំខាន់ គឺកុំប្រញាប់ប្រើផលិតផលធ្វើឱ្យស្បែកសខ្លាំងៗ ឬខាត់ស្បែកដោយកម្លាំង ព្រោះអាចធ្វើឱ្យបញ្ហាកាន់តែធ្ងន់ធ្ងរ។ ការថែរក្សាដោយទន់ភ្លន់ និងការស្វែងរកមូលហេតុឱ្យបានត្រឹមត្រូវ គឺជាវិធីសមស្របក្នុងការថែរក្សាស្បែកក្លៀកឱ្យមានសុខភាពល្អ៕