យោងតាមការចុះផ្សាយពីប្រភពបរទេស ការហាត់ប្រាណមិនចាំបាច់តែជាការរត់ ហែលទឹក ឬជិះកង់នោះទេ ព្រោះលំហាត់សាមញ្ញមួយដែលអាចធ្វើនៅផ្ទះ ដោយគ្រាន់តែផ្អែកខ្នងនឹងជញ្ជាំង កំពុងត្រូវបានសិក្សាឃើញថា អាចជួយបន្ថយសម្ពាធឈាមបានយ៉ាងគួរឱ្យចាប់អារម្មណ៍។
លំហាត់នេះជាការប្រើកម្លាំងសាច់ដុំដោយរក្សាខ្លួននៅក្នុងទីតាំងដដែល ដោយមិនចាំបាច់ធ្វើចលនាច្រើន។ អ្នកហាត់ត្រូវផ្អែកខ្នងនឹងជញ្ជាំង បត់ជង្គង់ដូចជាកំពុងអង្គុយលើកៅអី ហើយទប់ខ្លួននៅក្នុងទីតាំងនោះមួយរយៈ ដើម្បីឱ្យសាច់ដុំធ្វើការ។
តាមការវិភាគលើការសិក្សាស្រាវជ្រាវចំនួន ២៧០ ដែលមានអ្នកចូលរួមសរុប ១៥.៨២៧នាក់ និងចុះផ្សាយក្នុងឆ្នាំ២០២៣ ការហាត់ប្រាណដោយទប់សាច់ដុំនៅទីតាំងដដែល បានបង្ហាញលទ្ធផលបន្ថយសម្ពាធឈាមជាមធ្យមខ្ពស់ជាងលំហាត់ប្រភេទផ្សេងៗដែលបានប្រៀបធៀប។ សម្ពាធឈាមខាងលើថយចុះជាមធ្យម ៨,២៤ មីល្លីម៉ែត្របារត និងសម្ពាធឈាមខាងក្រោមថយចុះ ៤ មីល្លីម៉ែត្របារត។ លទ្ធផលនេះជាតួលេខមធ្យមនៃលំហាត់ទប់សាច់ដុំ មិនមែនជាការធានាថាមនុស្សគ្រប់រូបនឹងទទួលបានលទ្ធផលដូចគ្នានោះទេ។
អ្នកជំនាញពន្យល់ថា នៅពេលសាច់ដុំត្រូវបានទប់ឱ្យនៅតែតឹង លំហូរឈាមទៅកាន់តំបន់សាច់ដុំនោះអាចថយចុះជាបណ្តោះអាសន្ន។ បន្ទាប់ពីបន្ធូរសាច់ដុំ ឈាមនឹងហូរត្រឡប់មកវិញ ហើយអាចជួយឱ្យសរសៃឈាមសម្រាក និងរីកធំបានល្អប្រសើរឡើង។ ប្រភពក៏បានលើកឡើងថា ការហាត់លំហាត់នេះ ៣ដងក្នុងមួយសប្តាហ៍ អាចជួយកែលម្អសម្ពាធឈាមបាន។
ក្រៅពីការជួយគ្រប់គ្រងសម្ពាធឈាម លំហាត់នេះក៏អាចជួយពង្រឹងសាច់ដុំ និងសាច់ដុំជុំវិញសន្លាក់ ព្រមទាំងជួយរក្សាកម្លាំងរាងកាយនៅពេលវ័យកាន់តែច្រើន។ ទោះជាយ៉ាងណា មិនទាន់មានភស្តុតាងគ្រប់គ្រាន់បញ្ជាក់ថា លំហាត់នេះអាចធ្វើឱ្យមនុស្សរស់នៅបានយូរឆ្នាំដោយផ្ទាល់នោះទេ។ អ្នកជំនាញណែនាំឱ្យរួមបញ្ចូលលំហាត់នេះជាមួយការដើរ រត់ ជិះកង់ ឬលំហាត់ពង្រឹងសាច់ដុំផ្សេងៗ ដើម្បីថែរក្សាសុខភាពទូទៅឱ្យបានល្អ។ ៕