យោងតាមការចុះផ្សាយពីប្រភពបរទេស ការភ្ញាក់ពីគេងនៅពាក់កណ្តាលយប់ជាញឹកញាប់ ហើយពិបាកគេងលក់វិញ អាចធ្វើឱ្យមនុស្សមួយចំនួនមានការព្រួយបារម្ភពីសុខភាព។ ជាការពិត អ្នកដែលមានជំងឺថ្លើមរ៉ាំរ៉ៃ ជាពិសេសជំងឺក្រិនថ្លើម អាចមានបញ្ហាគេងមិនលក់ ភ្ញាក់ញឹកញាប់ពេលយប់ ឬងងុយគេងខ្លាំងនៅពេលថ្ងៃ។ ប៉ុន្តែការភ្ញាក់នៅម៉ោង ១–៣ ឬ ៣–៥ ព្រឹក មិនមែនជាសញ្ញាជាក់លាក់ដែលអាចបញ្ជាក់ថាថ្លើមកំពុងមានជំងឺនោះទេ។
ការរំខានដល់ដំណេកអាចពាក់ព័ន្ធនឹងបញ្ហាសុខភាពថ្លើម និងការប្រែប្រួលម៉ោងជីវសាស្ត្ររបស់រាងកាយ។ ទោះជាយ៉ាងណា ការភ្ញាក់នៅម៉ោងជាក់លាក់ណាមួយ ក៏អាចបណ្តាលមកពីភាពតានតឹង ការថប់បារម្ភ សំឡេងរំខាន បរិយាកាសគេងមិនស្រួល ឬទម្លាប់ប្រើភេសជ្ជៈមានជាតិកាហ្វេអ៊ីននៅពេលល្ងាចផងដែរ។ ដូច្នេះ មិនគួរយកម៉ោងដែលភ្ញាក់ពីគេងតែមួយមុខមកសន្និដ្ឋានថាមានបញ្ហាថ្លើមឡើយ។
ក្រៅពីបញ្ហាដំណេក មានសញ្ញាសំខាន់ៗចំនួន៤ ដែលគួរយកចិត្តទុកដាក់ រួមមាន៖ ទី១ ស្បែក និងភ្នែកឡើងលឿង។ ទី២ ទឹកនោមមានពណ៌លឿងចាស់ខ្លាំង ឬពណ៌ត្នោតដូចតែខាប់ ទោះបានផឹកទឹកគ្រប់គ្រាន់ក៏ដោយ។ ទី៣ មានអារម្មណ៍ឈឺចុក ឬធ្ងន់ត្រង់ផ្នែកខាងស្តាំនៃពោះក្រោមឆ្អឹងជំនី។ ទី៤ រមាស់ស្បែកជាបន្តបន្ទាប់ដោយមិនដឹងមូលហេតុ ជាពិសេសបើមិនមានស្នាមកន្ទួល ឬប្រតិកម្មអាលែកហ្ស៊ីច្បាស់លាស់។ សញ្ញាទាំងនេះអាចពាក់ព័ន្ធនឹងបញ្ហាថ្លើម ឬផ្លូវទឹកប្រមាត់ ហើយគួរទៅពិនិត្យសុខភាព។
ដើម្បីថែរក្សាសុខភាព និងគុណភាពដំណេក គួរកំណត់ម៉ោងចូលគេងឱ្យបានទៀងទាត់ ជៀសវាងផឹកកាហ្វេ ឬភេសជ្ជៈដែលមានជាតិកាហ្វេអ៊ីននៅពេលល្ងាច កាត់បន្ថយគ្រឿងស្រវឹង និងរក្សាបរិយាកាសបន្ទប់គេងឱ្យស្ងប់ស្ងាត់។ ប្រសិនបើភ្ញាក់ពីគេងញឹកញាប់ជាបន្តបន្ទាប់ ឬមានសញ្ញាដូចជាស្បែកឡើងលឿង ទឹកនោមពណ៌ចាស់ និងរមាស់ស្បែកមិនបាត់ គួរទៅជួបគ្រូពេទ្យ ដើម្បីពិនិត្យឈាម និងវាយតម្លៃសុខភាពថ្លើមតាមភាពចាំបាច់។
ជារួម ការភ្ញាក់នៅម៉ោង ១–៣ ឬ ៣–៥ ព្រឹក មិនមានន័យថាថ្លើមកំពុងមានជំងឺនោះទេ ប៉ុន្តែការភ្ញាក់ញឹកញាប់ដែលប៉ះពាល់ដល់ដំណេក ក៏មិនគួរមើលរំលងដែរ។ ប្រសិនបើមានសញ្ញាព្រមានផ្សេងៗរួមជាមួយ គួរទៅពិនិត្យឱ្យបានឆាប់។ ជាពិសេស បើមានភ្នែកឡើងលឿង រួមជាមួយការច្របូកច្របល់ ឈឺពោះខ្លាំង ឬក្អួតឈាម ត្រូវស្វែងរកជំនួយសង្គ្រោះបន្ទាន់ភ្លាមៗ៕