យោងតាមការចុះផ្សាយពីប្រភពបរទេស ការដែលប្តីជួយលាងចានក្រោយពេលបរិភោគអាហារ គឺជាទម្លាប់ល្អដែលបង្ហាញពីការចែករំលែកការងារផ្ទះ និងការយកចិត្តទុកដាក់ចំពោះគ្រួសារ។ ប៉ុន្តែប្រសិនបើលាងចានមិនបានត្រឹមត្រូវ ចានឆ្នាំងអាចនៅមានសំណល់អាហារ និងមេរោគដែលអាចប៉ះពាល់ដល់សុខភាព។ ដូច្នេះ សមាជិកគ្រួសារគួរយកចិត្តទុកដាក់ចំពោះកំហុស ៥ យ៉ាងដែលតែងកើតមានពេលលាងចាន។
កំហុសទី១ គឺ មិនពាក់ស្រោមដៃពេលលាងចាន។ ការប៉ះពាល់ទឹកលាងចានជាញឹកញាប់អាចធ្វើឱ្យស្បែកដៃស្ងួត រមាស់ និងប្រេះ ជាពិសេសអ្នកដែលមានស្បែកងាយប្រតិកម្ម។ គួរពាក់ស្រោមដៃដើម្បីការពារស្បែកដៃ។ កំហុសទី២ គឺ ប្រើទឹកលាងចានច្រើនហួសកម្រិត។ ការប្រើសារធាតុលាងចានច្រើនពេកអាចធ្វើឱ្យពិបាកលាងសម្អាតឱ្យអស់ពីចាន និងឆ្នាំង។ គួរប្រើតាមបរិមាណដែលបានណែនាំ និងលាងជម្រះជាមួយទឹកស្អាតឱ្យបានហ្មត់ចត់។
កំហុសទី៣ គឺ លាងចានមិនបានស្អាត និងគ្រប់គ្រាន់។ ការមើលឃើញថាមិនមានពពុះសាប៊ូ មិនមានន័យថាចានស្អាតទាំងស្រុងនោះទេ។ គួរលាងក្រោមទឹកស្អាត និងជូតសម្អាតកន្លែងដែលមានស្នាមខ្លាញ់ ឬសំណល់អាហារឱ្យបានល្អ។ កំហុសទី៤ គឺ មិនសម្អាតអេប៉ុងលាងចាន និងអាងលាងចានក្រោយប្រើប្រាស់។ អេប៉ុងដែលសើម និងមានសំណល់អាហារជាប់ អាចក្លាយជាកន្លែងបង្កើនមេរោគ។ ដូច្នេះ គួរលាងអេប៉ុងឱ្យស្អាត ច្របាច់ទឹកចេញ និងទុកនៅកន្លែងស្ងួត ព្រមទាំងសម្អាតអាងលាងចានជាប្រចាំ។
កំហុសទី៥ គឺ ដាក់ចានជង់លើគ្នា ខណៈពេលនៅសើម។ ការដាក់ចានសើមជាប់គ្នា ឬដាក់ទុកក្នុងទូដែលបិទជិត អាចធ្វើឱ្យទឹកមិនងាយស្ងួត និងបង្កើនឱកាសកើតផ្សិត ឬមេរោគ។ គួរដាក់ចានលើធ្នើដែលមានខ្យល់ចេញចូល និងទុកឱ្យស្ងួតសិន មុនពេលយកទៅរក្សាទុកក្នុងទូ។ ចំណែកអេប៉ុង និងកន្សែងលាងចាន គួរបោកសម្អាត និងប្តូរថ្មីនៅពេលចាស់ ឬមានក្លិនមិនល្អ។
ជារួម ការលាងចានឱ្យស្អាតមិនមែនអាស្រ័យលើបុរស ឬស្ត្រីនោះទេ ប៉ុន្តែអាស្រ័យលើការយកចិត្តទុកដាក់ និងវិធីសម្អាតឱ្យបានត្រឹមត្រូវ។ សមាជិកគ្រួសារទាំងអស់គួរចេះប្រើសារធាតុលាងចានក្នុងបរិមាណសមស្រប សម្អាតឧបករណ៍លាងចាន និងទុកចានឱ្យស្ងួតល្អមុនប្រើប្រាស់ម្តងទៀត។ ទម្លាប់តូចៗទាំងនេះអាចជួយរក្សាអនាម័យអាហារ កាត់បន្ថយមេរោគ និងការពារសុខភាពគ្រួសារបានល្អប្រសើរ៕