យោងតាមការចុះផ្សាយពីប្រភពបរទេស តម្រងនោមមានតួនាទីសំខាន់ក្នុងការចម្រោះឈាម បញ្ចេញកាកសំណល់ និងរក្សាតុល្យភាពជាតិទឹកក្នុងរាងកាយ។ ប៉ុន្តែមនុស្សជាច្រើនកំពុងមានទម្លាប់ប្រចាំថ្ងៃមួយចំនួន ដែលអាចបង្កើនហានិភ័យប៉ះពាល់ដល់តម្រងនោមដោយមិនដឹងខ្លួន។ ក្រៅពីការផឹកស្រាបៀរ និងគ្រឿងស្រវឹងច្រើន ទម្លាប់ ៤ យ៉ាងខាងក្រោមក៏គួរយកចិត្តទុកដាក់ផងដែរ។
ទម្លាប់ទី១ គឺ ទប់ទឹកនោមញឹកញាប់ ជាពិសេសអ្នកដែលរវល់ការងារ ឬធ្វើដំណើរយូរ។ ការទប់ទឹកនោមក្នុងប្លោកនោមយូរពេក អាចបង្កើនឱកាសឱ្យមេរោគកើនឡើង និងបង្កការឆ្លងមេរោគផ្លូវទឹកនោម។ ក្នុងករណីខ្លះ មេរោគអាចរាលដាលឡើងទៅដល់តម្រងនោម និងបង្កការរលាក។ ទម្លាប់ទី២ គឺ គេងយប់ជ្រៅ និងគេងមិនគ្រប់គ្រាន់ជាប្រចាំ។ ការគេងមិនគ្រប់អាចធ្វើឱ្យរាងកាយមិនបានសម្រាក និងស្តារកម្លាំងបានល្អ។ ទោះជាយ៉ាងណា ការគេងយប់ជ្រៅមិនមែនជាមូលហេតុផ្ទាល់ដែលបញ្ជាក់ថាបណ្ដាលឱ្យខូចតម្រងនោមនោះទេ ដូច្នេះគួររក្សាពេលវេលាគេងឱ្យទៀងទាត់ និងសម្រាកឱ្យបានគ្រប់គ្រាន់។
ទម្លាប់ទី៣ គឺ ប្រើថ្នាំដោយខ្លួនឯង និងប្រើថ្នាំយូរពេក។ ថ្នាំមួយចំនួនអាចប៉ះពាល់ដល់តម្រងនោម ប្រសិនបើប្រើមិនត្រឹមត្រូវ ឬប្រើលើសកម្រិត។ ជាពិសេស ថ្នាំបំបាត់ការឈឺចាប់មួយចំនួន ថ្នាំផ្សះ និងឱសថបុរាណដែលមិនស្គាល់ប្រភពច្បាស់លាស់ អាចបង្កគ្រោះថ្នាក់ដល់សុខភាព។ ដូច្នេះ មិនគួរទិញថ្នាំមកប្រើយូរដោយខ្លួនឯង បង្កើនកម្រិតថ្នាំ ឬប្រើឱសថបំប៉នដោយគ្មានការណែនាំពីគ្រូពេទ្យឡើយ។
ទម្លាប់ទី៤ គឺ ញ៉ាំអាហារសមុទ្រច្រើន ជាពិសេសពេលផឹកស្រាបៀរ។ អាហារសមុទ្រមួយចំនួនមានសារធាតុដែលនៅពេលរាងកាយរំលាយរួច នឹងបង្កើតជាសារធាតុអាស៊ីតដែលតម្រងនោមត្រូវបញ្ចេញចេញ។ ការញ៉ាំច្រើនជាប្រចាំ និងផឹកស្រាបៀរច្រើន អាចធ្វើឱ្យកម្រិតអាស៊ីតក្នុងឈាមកើនឡើង និងបង្កហានិភ័យកើតជំងឺរលាកសន្លាក់ហ្គោដ ជាពិសេសអ្នកដែលមានបញ្ហានេះស្រាប់។ ការញ៉ាំសាច់អាំង និងអាហារពេលយប់ច្រើនពេក ក៏គួរត្រូវបានកាត់បន្ថយផងដែរ។
ជារួម ដើម្បីថែរក្សាតម្រងនោម គួរចៀសវាងការទប់ទឹកនោម គេងឱ្យបានគ្រប់គ្រាន់ ប្រើថ្នាំតាមការណែនាំរបស់គ្រូពេទ្យ និងកាត់បន្ថយការញ៉ាំអាហារសមុទ្រច្រើនជាមួយស្រាបៀរ។ ជាពិសេស មិនគួរទិញឱសថបំប៉នដែលអះអាងថាជួយប៉ូវតម្រងនោមមកប្រើដោយខ្លួនឯងឡើយ ព្រោះការអស់កម្លាំង ឬជ្រុះសក់មិនមែនជាភស្តុតាងថាតម្រងនោមខ្សោយនោះទេ។ ប្រសិនបើមានអាការៈមិនប្រក្រតី គួរទៅពិនិត្យសុខភាព ដើម្បីរកមូលហេតុ និងទទួលការថែទាំឱ្យបានត្រឹមត្រូវ៕