យោងតាមការចុះផ្សាយពីប្រភពបរទេស ការប្រើប្រាស់ទូរស័ព្ទជាប្រចាំថ្ងៃអាចប៉ះពាល់ដល់សុខភាព ប្រសិនបើប្រើប្រាស់មិនបានត្រឹមត្រូវ។ ជាពិសេស ទម្លាប់ ៣ យ៉ាងដែលមនុស្សជាច្រើនតែងធ្វើដោយមិនដឹងខ្លួន រួមមាន ការដេកមើលទូរស័ព្ទ ការប្រើទូរស័ព្ទមុនពេលចូលគេង និងការមើលទូរស័ព្ទពេលកំពុងញ៉ាំអាហារ។
ទី១ ការដេកឱនកមើលទូរស័ព្ទ ជាទម្លាប់ដែលអាចធ្វើឱ្យសាច់ដុំក និងស្មាទទួលរងសម្ពាធ ប្រសិនបើធ្វើក្នុងរយៈពេលយូរ។ ជាពិសេស ការដេកផ្អៀង ឬដេកផ្កាប់មុខមើលអេក្រង់ អាចធ្វើឱ្យឈឺក ស្មារឹង និងភ្នែកនឿយហត់។ ដើម្បីកាត់បន្ថយបញ្ហានេះ គួរអង្គុយឱ្យបានត្រឹមត្រូវ រក្សាខ្នងឱ្យត្រង់ និងលើកទូរស័ព្ទឱ្យនៅជិតកម្រិតភ្នែក ដោយចៀសវាងការឱនកយូរពេក។
ទី២ ការប្រើទូរស័ព្ទមុនពេលចូលគេង ជាពិសេសការមើលវីដេអូ និងបណ្តាញសង្គមរហូតដល់យប់ជ្រៅ អាចរំខានដល់ដំណេក។ ពន្លឺពីអេក្រង់ និងព័ត៌មានដែលធ្វើឱ្យអារម្មណ៍រំជើបរំជួល អាចធ្វើឱ្យខួរក្បាលពិបាកសម្រាក និងពន្យារពេលចូលគេង។ ប្រសិនបើកើតឡើងជាប្រចាំ អាចបណ្តាលឱ្យគេងមិនគ្រប់គ្រាន់ អស់កម្លាំង និងបាត់បង់ការផ្តោតអារម្មណ៍នៅថ្ងៃបន្ទាប់។ ដូច្នេះ គួរឈប់ប្រើទូរស័ព្ទប្រមាណ ៣០ ទៅ ៦០ នាទីមុនចូលគេង ហើយជំនួសដោយការអានសៀវភៅ ឬស្តាប់តន្ត្រីស្រាលៗ។
ទី៣ ការមើលទូរស័ព្ទពេលកំពុងញ៉ាំអាហារ អាចធ្វើឱ្យបាត់បង់ការផ្តោតអារម្មណ៍លើការញ៉ាំ និងមិនសូវដឹងពីបរិមាណអាហារដែលខ្លួនបានទទួលទាន។ ទម្លាប់នេះអាចធ្វើឱ្យមនុស្សមួយចំនួនញ៉ាំលឿន ឬញ៉ាំលើសពីតម្រូវការរបស់រាងកាយ។ ចំពោះកុមារ ការញ៉ាំអាហារបណ្តើរមើលទូរស័ព្ទបណ្តើរ ក៏អាចបង្កើតទម្លាប់ពឹងផ្អែកលើអេក្រង់នៅពេលបរិភោគអាហារផងដែរ។ ដូច្នេះ គួរដាក់ទូរស័ព្ទមួយឡែក ហើយផ្តោតលើការញ៉ាំអាហារ និងការសន្ទនាជាមួយក្រុមគ្រួសារ។
ជារួម ការកែប្រែទម្លាប់ប្រើប្រាស់ទូរស័ព្ទទាំង ៣ យ៉ាងនេះ អាចជួយកាត់បន្ថយការឈឺចាប់តាមក ស្មា ការរំខានដល់ដំណេក និងការញ៉ាំអាហារដោយខ្វះការប្រុងប្រយ័ត្ន។ ការប្រើទូរស័ព្ទឱ្យបានត្រឹមត្រូវ ការសម្រាកពីអេក្រង់ និងការផ្តល់ពេលវេលាឱ្យរាងកាយសម្រាក គឺជាទម្លាប់សាមញ្ញដែលគ្រប់គ្នាគួរចាប់ផ្តើមអនុវត្ត ដើម្បីថែរក្សាសុខភាពឱ្យបានល្អ ៕