យោងតាមការចុះផ្សាយពីប្រភពបរទេស ការកើនឡើងជាតិស្ករក្នុងឈាមក្រោយពេលបរិភោគអាហារ គឺជាដំណើរការធម្មតារបស់រាងកាយ។ ប៉ុន្តែសម្រាប់អ្នកមានជំងឺទឹកនោមផ្អែម អ្នកមានជាតិស្ករក្នុងឈាមខ្ពស់ ឬមានហានិភ័យបញ្ហានេះ ការជ្រើសរើសអាហារ និងការគ្រប់គ្រងបរិមាណដែលញ៉ាំ គឺមានសារៈសំខាន់ខ្លាំង។ អាហារមួយចំនួនដែលមើលទៅហាក់ដូចជាមានប្រយោជន៍ ក៏អាចធ្វើឱ្យជាតិស្ករក្នុងឈាមកើនឡើងលឿន ប្រសិនបើញ៉ាំច្រើន ឬចម្អិនទន់ពេក។
អាហារទី១ គឺ បបរស និងបបរដែលស្ងោរទន់ខ្លាំង ព្រោះវានៅតែមានជាតិកាបូអ៊ីដ្រាតខ្ពស់ ហើយអាចធ្វើឱ្យជាតិស្ករក្នុងឈាមកើនឡើងលឿន ជាពិសេសពេលញ៉ាំពោះទទេ។ អាហារទី២ គឺ បាយដំណើប និងនំធ្វើពីអង្ករដំណើប ដូចជា នំអន្សម និងនំចាក់ចុល។ អាហារទាំងនេះផ្ទុកជាតិម្សៅច្រើន ហើយមួយចំនួនមានបន្ថែមស្ករ សាច់ខ្លាញ់ ឬខ្ទិះដូង ដែលធ្វើឱ្យថាមពលកាន់តែខ្ពស់។ គួរញ៉ាំក្នុងបរិមាណសមរម្យ និងជៀសវាងញ៉ាំរួមជាមួយអាហារមានជាតិម្សៅច្រើនប្រភេទក្នុងពេលតែមួយ។
អាហារទី៣ គឺ បាយស នំប៉័ងស និងផលិតផលធ្វើពីម្សៅចម្រាញ់ ដូចជា មី បង្អែម និងនំឃុកឃី ព្រោះអាហារទាំងនេះជាទូទៅមានជាតិសរសៃតិច និងងាយរលាយជាងធញ្ញជាតិមិនទាន់ចម្រាញ់។ អាហារទី៤ គឺ ដំឡូង ពោត និងបន្លែដែលសម្បូរជាតិម្សៅ ដូចជា ដំឡូងជ្វា ដំឡូងបារាំង ដំឡូងត្រាវ ល្ពៅ និងសណ្ដែកបារាំង។ ទោះបីជាអាហារទាំងនេះមានវីតាមីន និងជាតិសរសៃក៏ដោយ ក៏វានៅតែផ្ដល់ជាតិកាបូអ៊ីដ្រាតដល់រាងកាយ។ ដូច្នេះ បើញ៉ាំរួមជាមួយបាយក្នុងបរិមាណច្រើន អាចធ្វើឱ្យទទួលជាតិម្សៅលើសតម្រូវការ។
អាហារទី៥ គឺ ស៊ុប និងម្ហូបឆាដែលប្រើម្សៅធ្វើឱ្យខាប់ច្រើន ដូចជា ម្សៅពោត និងម្សៅដំឡូងមី ព្រោះវាអាចបន្ថែមជាតិកាបូអ៊ីដ្រាតដោយមិនសូវមានរសជាតិផ្អែមឱ្យដឹង។ អាហារទី៦ គឺ ភេសជ្ជៈដប ទឹកផ្លែឈើ និងទឹកដោះគោមានជាតិស្ករបន្ថែម ដែលអាចផ្ដល់ជាតិស្ករ និងថាមពលច្រើនក្នុងរយៈពេលខ្លី។ ជាពិសេស ទឹកផ្លែឈើមានជាតិសរសៃតិចជាងការញ៉ាំផ្លែឈើទាំងមូល ដូច្នេះគួរជ្រើសរើសញ៉ាំផ្លែឈើស្រស់ក្នុងបរិមាណសមរម្យ ជំនួសការផឹកទឹកផ្លែឈើញឹកញាប់។
ជារួម អ្នកដែលចង់គ្រប់គ្រងជាតិស្ករក្នុងឈាម មិនចាំបាច់បោះបង់បាយ ឬអាហារមានជាតិកាបូអ៊ីដ្រាតទាំងស្រុងនោះទេ ប៉ុន្តែគួរគ្រប់គ្រងបរិមាណ ជ្រើសរើសធញ្ញជាតិមិនទាន់ចម្រាញ់ បរិភោគបន្លែ និងអាហារមានប្រូតេអ៊ីនក្នុងមួយពេល ព្រមទាំងកាត់បន្ថយភេសជ្ជៈមានជាតិស្ករ និងអាហារកែច្នៃ។ អ្នកមានជំងឺទឹកនោមផ្អែមគួរអនុវត្តតាមការណែនាំរបស់គ្រូពេទ្យ និងអ្នកជំនាញអាហារូបត្ថម្ភ មិនគួរតមអាហារ ឬបញ្ឈប់ថ្នាំដោយខ្លួនឯងឡើយ៕