យោងតាមការចុះផ្សាយពីប្រភពបរទេស ការលាងអង្ករមុនដាំបាយគឺជាជំហានសំខាន់ក្នុងការសម្អាតធូលីដី និងសំណល់កខ្វក់ដែលអាចជាប់លើគ្រាប់អង្ករ។ ប៉ុន្តែការលាងខ្លាំងពេក ឬត្រាំអង្ករយូរពេក អាចធ្វើឱ្យបាត់បង់សារធាតុចិញ្ចឹមមួយចំនួន។ ដូច្នេះ គួរយល់ដឹងពីវិធីលាងអង្ករឱ្យបានត្រឹមត្រូវ ដើម្បីរក្សាទាំងអនាម័យ និងគុណតម្លៃអាហារូបត្ថម្ភ។
កំហុសទី១. លាងអង្ករខ្លាំង និងច្រើនដងពេក៖ អង្ករមានវីតាមីនក្រុម B និងសារធាតុចិញ្ចឹមមួយចំនួននៅផ្នែកខាងក្រៅនៃគ្រាប់អង្ករ។ ការដុសខាត់ខ្លាំង ឬលាងច្រើនដងអាចធ្វើឱ្យបាត់បង់សារធាតុចិញ្ចឹមទាំងនេះ។ ជាទូទៅ គួរលាងអង្ករថ្នមៗប្រហែល ១ ទៅ ២ ដង ដោយប្រើទឹកស្អាត ដើម្បីកម្ចាត់ធូលី និងសំណល់កខ្វក់។
កំហុសទី២. មិនលាងអង្ករមុនដាំបាយ៖ ទោះបីអង្ករត្រូវបានវេចខ្ចប់យ៉ាងល្អក៏ដោយ ក៏អាចមានធូលី កន្ទក់ ឬសំណល់ផ្សេងៗជាប់នៅលើគ្រាប់អង្ករបានដែរ។ អ្នកជំនាញក៏បានលើកឡើងថា ការលាងអង្ករអាចជួយកាត់បន្ថយសារធាតុអាសេនិចអសរីរាង្គមួយចំនួនដែលអាចមានក្នុងអង្ករផងដែរ។ ដូច្នេះ មិនគួររំលងជំហាននេះឡើយ។
កំហុសទី៣. ត្រាំអង្ករកាន់តែយូរ កាន់តែឆ្ងាញ់៖ ការត្រាំអង្ករយូរពេកអាចធ្វើឱ្យវីតាមីនក្រុម B មួយចំនួនរលាយចូលក្នុងទឹក ហើយការទុកអង្ករក្នុងទឹកយូរដោយគ្មានការគ្រប់គ្រង ក៏អាចបង្កលក្ខខណ្ឌឱ្យមេរោគលូតលាស់ផងដែរ។ សម្រាប់អង្ករធម្មតា មិនចាំបាច់ត្រាំមុនដាំបាយជានិច្ចនោះទេ។
កំហុសទី៤. ប្រើទឹកលាងអង្ករជំនួសទឹកស្អាតសម្រាប់លាងបន្លែ៖ មនុស្សមួយចំនួនជឿថាទឹកលាងអង្ករអាចកម្ចាត់សារធាតុគីមី និងថ្នាំកសិកម្មពីបន្លែផ្លែឈើបាន ប៉ុន្តែមិនទាន់មានភស្តុតាងគ្រប់គ្រាន់បញ្ជាក់ថាវាអាចសម្អាតបានប្រកបដោយសុវត្ថិភាពនោះទេ។ វិធីដែលគួរអនុវត្តគឺលាងបន្លែ និងផ្លែឈើដោយទឹកស្អាតពីក្បាលរ៉ូប៊ីណេ ដោយអាចដុសថ្នមៗលើផ្ទៃបន្លែ ឬផ្លែឈើដែលសមស្រប។
ជារួម ការលាងអង្ករឱ្យបានត្រឹមត្រូវ គឺត្រូវលាងថ្នមៗប្រហែល ១ ទៅ ២ ដង មិនត្រូវរំលងការលាង និងមិនគួរត្រាំយូរដោយមិនចាំបាច់។ ចំណែកទឹកលាងអង្ករ មិនគួរប្រើជំនួសទឹកស្អាតសម្រាប់លាងបន្លែឡើយ។ ការអនុវត្តទម្លាប់តូចៗទាំងនេះ អាចជួយរក្សាអនាម័យអាហារ និងកាត់បន្ថយការបាត់បង់សារធាតុចិញ្ចឹមក្នុងអង្ករបាន៕