យោងតាមការចុះផ្សាយពីប្រភពបរទេស អាហារពេលព្រឹកមានសារៈសំខាន់ក្នុងការផ្ដល់ថាមពលដល់រាងកាយក្រោយសម្រាកពេញមួយយប់។ ប៉ុន្តែការជ្រើសរើសអាហារមិនត្រឹមត្រូវ អាចធ្វើឱ្យរាងកាយទទួលបានជាតិស្ករ ខ្លាញ់ និងថាមពលលើសតម្រូវការ។ អ្នកជំនាញអាហារូបត្ថម្ភបានលើកឡើងពីអាហារ ៥ ប្រភេទដែលគួរប្រុងប្រយ័ត្ន ប្រសិនបើនិយមយកមកធ្វើជាអាហារពេលព្រឹកជាប្រចាំ។
អាហារទី១ គឺ នំផ្អែម៖ នំផ្អែមជាច្រើនមានជាតិស្ករ ខ្លាញ់ និងថាមពលខ្ពស់ ប៉ុន្តែមានសារធាតុចិញ្ចឹមមិនសូវគ្រប់គ្រាន់។ ការញ៉ាំញឹកញាប់អាចបង្កើនហានិភ័យឡើងទម្ងន់ និងប៉ះពាល់ដល់ការគ្រប់គ្រងជាតិស្ករក្នុងឈាម។ អាហារទី២ គឺ សាច់កែច្នៃ៖ ដូចជា សាច់ក្រក សាច់ជក់ផ្សែង និងហេម ដែលអាចមានអំបិល និងខ្លាញ់ច្រើន។ ការញ៉ាំសាច់កែច្នៃជាប្រចាំត្រូវបានផ្សារភ្ជាប់នឹងហានិភ័យជំងឺមួយចំនួន រួមទាំងមហារីកពោះវៀន ដូច្នេះគួរកាត់បន្ថយ និងជ្រើសរើសស៊ុត ឬសាច់ស្រស់ជំនួសវិញ។
អាហារទី៣ គឺ អាហារបំពង៖ ដូចជា ដំឡូងបំពង នំចៀន និងនំរុំចៀន ដែលអាចមានខ្លាញ់ និងថាមពលខ្ពស់។ ការញ៉ាំញឹកញាប់អាចជំរុញឱ្យឡើងទម្ងន់ និងបង្កើនហានិភ័យបញ្ហាសុខភាពបេះដូង។ គួរជ្រើសរើសអាហារស្ងោរ ចំហុយ ឬដុតដែលប្រើប្រេងតិចជាង។ អាហារទី៤ គឺ ញ៉ាំតែផ្លែឈើជាអាហារពេលព្រឹក៖ ផ្លែឈើមានវីតាមីន និងជាតិសរសៃ ប៉ុន្តែបើញ៉ាំតែផ្លែឈើមួយមុខ អាចខ្វះប្រូតេអ៊ីន និងខ្លាញ់ល្អដែលរាងកាយត្រូវការ ហើយអាចធ្វើឱ្យឃ្លានលឿន។ គួរញ៉ាំរួមជាមួយស៊ុត ទឹកដោះគោជូរគ្មានជាតិស្ករ ឬគ្រាប់ធញ្ញជាតិ។
អាហារទី៥ គឺ អាហារសម្រន់ជំនួសអាហារពេលព្រឹក៖ ដូចជា នំឃុកឃី ដំឡូងបន្ទះ និងសូកូឡា ដែលភាគច្រើនមានជាតិស្ករ ខ្លាញ់ និងអំបិលច្រើន ប៉ុន្តែមិនសូវផ្ដល់ប្រូតេអ៊ីន និងជាតិសរសៃគ្រប់គ្រាន់។ ការញ៉ាំជាប្រចាំអាចធ្វើឱ្យទទួលថាមពលលើស និងមិនសូវទទួលបានសារធាតុចិញ្ចឹមចម្រុះ។ ដូច្នេះ គួរជ្រើសរើសអាហារដែលមានប្រយោជន៍ និងជួយឱ្យរាងកាយមានថាមពលពេញមួយព្រឹក។
ជារួម ដើម្បីឱ្យអាហារពេលព្រឹកមានគុណភាព គួរជ្រើសរើសអាហារឱ្យបានចម្រុះ មានប្រូតេអ៊ីន ជាតិសរសៃ និងសារធាតុចិញ្ចឹមគ្រប់គ្រាន់ កាត់បន្ថយស្ករ អំបិល ខ្លាញ់ និងអាហារកែច្នៃ។ គួរផ្ដល់អាទិភាពដល់ធញ្ញជាតិមិនទាន់កែច្នៃ បន្លែ ផ្លែឈើ ស៊ុត និងអាហារស្ងោរ ឬចំហុយដែលប្រើប្រេងតិច។ ការជ្រើសរើសអាហារឱ្យបានត្រឹមត្រូវរៀងរាល់ព្រឹក គឺជាទម្លាប់សាមញ្ញមួយដែលអាចជួយថែរក្សាសុខភាពក្នុងរយៈពេលវែង៕