យោងតាមការចុះផ្សាយពីប្រភពបរទេស ការឆ្លងកាត់ជំងឺធ្ងន់ធ្ងរ ការវះកាត់ធំ ឬការឆ្លងមេរោគធ្ងន់ធ្ងរ អាចធ្វើឱ្យរាងកាយចុះខ្សោយ អស់កម្លាំង និងបាត់បង់ទំនុកចិត្តក្នុងការរស់នៅប្រចាំថ្ងៃ។ ដើម្បីជួយស្ដារកម្លាំង និងសុខភាពឱ្យប្រសើរឡើងវិញ គួរចាប់ផ្ដើមពីការពិគ្រោះជាមួយគ្រូពេទ្យ និងអ្នកជំនាញ ដើម្បីរៀបចំផែនការថែទាំ និងហាត់ប្រាណឱ្យសមស្របតាមស្ថានភាពរាងកាយ។
ចំណុចសំខាន់បន្ទាប់គឺ ការទទួលទានអាហារមានតុល្យភាព និងផឹកទឹកឱ្យបានគ្រប់គ្រាន់។ គួរជ្រើសរើសអាហារសម្បូរប្រូតេអ៊ីន ដូចជា សាច់មាន់ ត្រី ស៊ុត និងតៅហ៊ូ ដើម្បីជួយជួសជុលជាលិការាងកាយ ព្រមទាំងបរិភោគបន្លែ ផ្លែឈើ និងអាហារដែលផ្ដល់ថាមពល។ ចំពោះការហាត់ប្រាណ គួរចាប់ផ្ដើមពីការដើរយឺតៗ ឬលាតសន្ធឹងសាច់ដុំ ហើយបង្កើនសកម្មភាពបន្តិចម្ដងៗតាមការណែនាំរបស់អ្នកជំនាញ ដោយមិនគួរបង្ខំរាងកាយខ្លាំងពេកឡើយ។
ការគេងឱ្យបានគ្រប់គ្រាន់ និងថែរក្សាសុខភាពផ្លូវចិត្ត ក៏មានសារៈសំខាន់ក្នុងដំណើរការស្ដាររាងកាយផងដែរ។ គួរគេងប្រហែល ៧ ទៅ ៩ ម៉ោងក្នុងមួយយប់ បង្កើតបរិយាកាសស្ងប់ស្ងាត់សម្រាប់ការសម្រាក និងព្យាយាមកាត់បន្ថយភាពតានតឹងតាមរយៈការដកដង្ហើមយឺតៗ សមាធិ ឬធ្វើសកម្មភាពដែលខ្លួនចូលចិត្ត។ ប្រសិនបើមានអារម្មណ៍តានតឹង ឬពិបាកចិត្តខ្លាំង គួរពិភាក្សាជាមួយអ្នកជំនាញសុខភាពផ្លូវចិត្ត។
ម្យ៉ាងទៀត គួរត្រឡប់ទៅជួបជុំគ្រួសារ មិត្តភក្តិ និងចូលរួមសកម្មភាពសង្គមបន្តិចម្ដងៗ ដើម្បីបង្កើនកម្លាំងចិត្ត និងកាត់បន្ថយអារម្មណ៍ឯកោ។ ក្រោយពេលសុខភាពចាប់ផ្ដើមប្រសើរឡើង គួរបោះបង់ទម្លាប់ដែលប៉ះពាល់ដល់សុខភាព ដូចជា ការជក់បារី ការផឹកគ្រឿងស្រវឹងច្រើន និងការញ៉ាំអាហារកែច្នៃច្រើន។ ការកំណត់គោលដៅតូចៗដែលអាចសម្រេចបានក្នុងមួយថ្ងៃ ឬមួយសប្ដាហ៍ ក៏ជួយបង្កើនទឹកចិត្តក្នុងការស្ដារសុខភាពផងដែរ។
ជារួម ការស្ដារកម្លាំងរាងកាយក្រោយជំងឺធ្ងន់ធ្ងរត្រូវការពេលវេលា ការអត់ធ្មត់ និងការថែទាំជាបន្តបន្ទាប់។ គួររៀនសង្កេតសញ្ញារបស់រាងកាយ ប្រសិនបើមានអាការៈអស់កម្លាំង ឈឺចាប់ ឬមិនប្រក្រតី ត្រូវសម្រាក និងពិគ្រោះជាមួយគ្រូពេទ្យ ជៀសវាងការបង្ខំខ្លួនឯងឱ្យធ្វើសកម្មភាពលើសសមត្ថភាព។ ការថែរក្សាសុខភាពទាំងរាងកាយ និងផ្លូវចិត្ត គឺជាគន្លឹះសំខាន់ក្នុងការត្រឡប់ទៅរស់នៅប្រចាំថ្ងៃប្រកបដោយភាពរឹងមាំ និងមានគុណភាព៕