យោងតាមការចុះផ្សាយពីប្រភពបរទេស ក្រាសសិតសក់ជារបស់ប្រើប្រាស់ដែលប៉ះផ្ទាល់នឹងសក់ និងស្បែកក្បាលជារៀងរាល់ថ្ងៃ។ ប៉ុន្តែមនុស្សជាច្រើនគ្រាន់តែយកសក់ដែលជាប់តាមធ្មេញក្រាសចេញ ហើយបន្តប្រើដោយមិនបានលាងសម្អាត ទោះបីជាមានកាកសំណល់កខ្វក់កំពុងកកស្ទះក៏ដោយ។
ក្រៅពីសក់ដែលជ្រុះជាប់ ក្រាសសិតសក់ក៏អាចប្រមូលផ្ដុំជាតិខ្លាញ់ពីស្បែកក្បាល កោសិកាស្បែកដែលរបកចេញ ធូលីដី និងសំណល់សាប៊ូកក់សក់ ឬផលិតផលថែរក្សាសក់ផងដែរ។ នៅពេលកកស្ទះយូរ ក្រាសអាចមានស្នាមកខ្វក់ ស្អិត និងមានក្លិនផ្អួរ។
ការមិនលាងក្រាសសិតសក់មិនមានន័យថានឹងបង្កជំងឺជានិច្ចនោះទេ ប៉ុន្តែសំណល់កខ្វក់អាចត្រឡប់ទៅជាប់សក់វិញ ធ្វើឱ្យក្រាសកខ្វក់ និងពិបាកប្រើប្រាស់។ ជាពិសេស ការប្រើក្រាសសិតសក់រួមគ្នាជាមួយអ្នកដទៃ អាចបង្កើនឱកាសចម្លងបញ្ហាស្បែកក្បាល ឬចៃ ដូច្នេះគួរប្រើក្រាសសិតសក់ផ្ទាល់ខ្លួន។
ដើម្បីរក្សាអនាម័យ គួរយកសក់ដែលជាប់ចេញរាល់ពេលប្រើ និងលាងក្រាសសិតសក់ប្រហែលមួយសប្ដាហ៍ម្ដង ប្រសិនបើប្រើជារៀងរាល់ថ្ងៃ។ វិធីលាងគឺ ដកសក់ចេញឱ្យអស់ ត្រាំក្នុងទឹកក្ដៅឧណ្ហៗលាយជាមួយសាប៊ូប្រហែល ១០ ទៅ ១៥ នាទី រួចប្រើច្រាសទន់ដុសសម្អាត និងលាងទឹកឱ្យស្អាត មុនពេលហាលឱ្យស្ងួតទាំងស្រុង។ ចំពោះក្រាសសិតសក់ធ្វើពីឈើ មិនគួរត្រាំទឹកយូរទេ ព្រោះអាចធ្វើឱ្យឈើប៉ោង ឬប្រេះ។
ទោះបីជាលាងសម្អាតជាប្រចាំក៏ដោយ គួរពិនិត្យក្រាសសិតសក់ និងប្ដូរថ្មី ប្រសិនបើធ្មេញក្រាសបាក់ កោង ចុងធ្មេញមុត មានស្នាមប្រេះ ឬមានកខ្វក់ជាប់ដែលលាងមិនចេញ។ ការយកចិត្តទុកដាក់លើអនាម័យក្រាសសិតសក់ គឺជាទម្លាប់តូចមួយដែលជួយកាត់បន្ថយសំណល់កខ្វក់ និងធ្វើឱ្យការថែរក្សាសក់កាន់តែប្រសើរ៕