យោងតាមការចុះផ្សាយពីប្រភពបរទេស ការកក់សក់នៅពេលយប់ជាទម្លាប់របស់មនុស្សជាច្រើន ប៉ុន្តែប្រសិនបើធ្វើមិនត្រឹមត្រូវ អាចបង្កផលប៉ះពាល់ដល់សក់ និងស្បែកក្បាល។ ជាពិសេស មានទម្លាប់ ៣ យ៉ាងដែលគួរតែកែប្រែ ដើម្បីជួយថែរក្សាសក់ឱ្យមានសុខភាពល្អ។
ទី១. កក់សក់រួចចូលគេងទាំងសក់សើម សក់នៅពេលសើមមានភាពងាយខូចជាងពេលស្ងួត។ ការគេងទាំងសក់សើមអាចធ្វើឱ្យសក់កកិតនឹងខ្នើយ បណ្ដាលឱ្យសក់រួញជាប់គ្នា បាក់ និងបែកចុង។ ម្យ៉ាងទៀត ការទុកស្បែកក្បាលឱ្យសើមយូរ អាចបង្កលក្ខខណ្ឌអំណោយផលដល់ការរីកលូតលាស់របស់មេរោគមួយចំនួន និងធ្វើឱ្យបញ្ហាអង្គែ ឬរលាកស្បែកក្បាលកាន់តែពិបាកគ្រប់គ្រងចំពោះអ្នកដែលងាយមានបញ្ហាទាំងនេះ។
ទី២. កក់សក់ដោយប្រើទឹកក្តៅខ្លាំងពេក មនុស្សជាច្រើនចូលចិត្តប្រើទឹកក្តៅកក់សក់ក្រោយពីធ្វើការហត់នឿយ ព្រោះមានអារម្មណ៍ធូរស្រាល ប៉ុន្តែការប្រើទឹកក្តៅខ្លាំងជាប្រចាំអាចធ្វើឱ្យសក់ និងស្បែកក្បាលស្ងួត។ ចំពោះអ្នកដែលមានស្បែកក្បាលងាយប្រតិកម្ម មានអង្គែ ឬរលាកស្បែកក្បាល ទឹកក្តៅខ្លាំងអាចធ្វើឱ្យអាការៈកាន់តែធ្ងន់ធ្ងរ។ ដូច្នេះ គួរប្រើទឹកក្ដៅឧណ្ហៗ ឬទឹកត្រជាក់ធម្មតាជំនួសវិញ។
ទី៣. ប្រើក្រចកកោសស្បែកក្បាលខ្លាំងពេលកក់សក់ មនុស្សមួយចំនួនយល់ថា ការប្រើក្រចកកោសខ្លាំងអាចជួយកម្ចាត់អង្គែ ធូលី និងជាតិខ្លាញ់បានល្អ ប៉ុន្តែទម្លាប់នេះអាចធ្វើឱ្យស្បែកក្បាលរបួស និងរលាក។ ប្រសិនបើមានស្នាមដាច់ស្បែក ក៏អាចបង្កើនហានិភ័យនៃការឆ្លងមេរោគផងដែរ។ វិធីត្រឹមត្រូវគឺ លាបសាប៊ូកក់សក់ក្នុងបរិមាណសមរម្យ រួចប្រើសាច់ចុងម្រាមដៃម៉ាស្សាថ្នមៗ និងលាងទឹកឱ្យស្អាត។
ដើម្បីថែរក្សាសក់ គួរកក់សក់ឱ្យបានមុនម៉ោងចូលគេង ដើម្បីមានពេលសម្ងួតសក់ ជាពិសេសតំបន់គល់សក់ និងស្បែកក្បាលឱ្យស្ងួត។ គួរប្រើកន្សែងទន់ជូតថ្នមៗ កុំជូត ឬបោកសក់ខ្លាំង ហើយប្រសិនបើប្រើម៉ាស៊ីនផ្លុំសក់ គួរជ្រើសរើសខ្យល់ត្រជាក់ ឬកម្ដៅទាប។ ប្រសិនបើមានអាការៈរមាស់យូរ ស្បែកក្បាលមានស្រកាច្រើន កើតមុន ឬជ្រុះសក់ខុសធម្មតា គួរទៅពិគ្រោះជាមួយគ្រូពេទ្យជំនាញ ដើម្បីពិនិត្យរកមូលហេតុ និងទទួលការព្យាបាលឱ្យបានត្រឹមត្រូវ៕