យោងតាមការចុះផ្សាយពីប្រភពបរទេស ទម្លាប់ញ៉ាំអាហារពេលព្រឹកមួយចំនួន ដូចជា ញ៉ាំច្រើនពេក ទទួលទានជាតិស្ករច្រើន និងខ្វះប្រូតេអ៊ីន ឬជាតិសរសៃ អាចធ្វើឱ្យពិបាកគ្រប់គ្រងទម្ងន់ ជាពិសេសចំពោះអ្នកមានអាយុលើសពី ៤០ ឆ្នាំ។ នៅពេលអាយុកាន់តែច្រើន សាច់ដុំអាចថយចុះ ដែលធ្វើឱ្យរាងកាយប្រើប្រាស់ថាមពលតិចជាងមុន។
ទី១. ញ៉ាំអាហារពេលព្រឹកច្រើនហួសកម្រិត ការញ៉ាំអាហារដែលមានថាមពលខ្ពស់ក្នុងបរិមាណច្រើន អាចធ្វើឱ្យរាងកាយទទួលបានថាមពលលើសតម្រូវការ ជាពិសេសនៅពេលសកម្មភាពរាងកាយថយចុះ។ អាហារដូចជា នំប៉័ង បាយដំណើប គុយទាវ ឬបបរ សុទ្ធតែអាចញ៉ាំបាន ប៉ុន្តែគួរគ្រប់គ្រងបរិមាណ និងកាត់បន្ថយម្ហូបដែលមានខ្លាញ់ច្រើន ព្រមទាំងភេសជ្ជៈផ្អែម។
ទី២. ញ៉ាំអាហារដែលមានជាតិស្ករច្រើន នំផ្អែម ធញ្ញជាតិមានស្ករ នំប៉័ងផ្អែម និងភេសជ្ជៈផ្អែម មានជាតិស្ករច្រើន ប៉ុន្តែខ្វះជាតិសរសៃ និងប្រូតេអ៊ីន។ អាហារទាំងនេះងាយរំលាយ ធ្វើឱ្យឆាប់ឃ្លានវិញ និងអាចបណ្ដាលឱ្យញ៉ាំអាហារសម្រន់បន្ថែមនៅពេលព្រឹក។ ដូច្នេះ គួរជ្រើសរើសអាហារដែលមានប្រូតេអ៊ីន និងជាតិសរសៃច្រើនជាងមុន។
ទី៣. មិនបានទទួលប្រូតេអ៊ីនគ្រប់គ្រាន់ ការញ៉ាំតែនំប៉័ង បបរ ឬធញ្ញជាតិមួយមុខ អាចធ្វើឱ្យអាហារពេលព្រឹកខ្វះប្រូតេអ៊ីន។ សារធាតុចិញ្ចឹមនេះមានសារៈសំខាន់ក្នុងការជួយជួសជុលកោសិកា និងរក្សាសាច់ដុំ។ គួរបន្ថែមស៊ុត ត្រី សាច់មាន់គ្មានខ្លាញ់ សណ្ដែក គ្រាប់ធញ្ញជាតិ ឬផលិតផលពីសណ្ដែកទៅក្នុងអាហារពេលព្រឹក។
ទី៤. ទទួលបានជាតិសរសៃតិចពេក ជាតិសរសៃមាននៅក្នុងបន្លែ ផ្លែឈើ សណ្ដែក គ្រាប់ធញ្ញជាតិ និងធញ្ញជាតិមិនទាន់កែច្នៃខ្លាំង។ វាជួយឱ្យឆ្អែតបានយូរ ខណៈនំផ្អែម និងធញ្ញជាតិដែលកែច្នៃរួចភាគច្រើនមានជាតិសរសៃតិច។ ដូច្នេះ គួរបន្ថែមផ្លែឈើទៅក្នុងយ៉ាអួ ឬបបរធញ្ញជាតិ និងជ្រើសរើសនំប៉័ងធ្វើពីគ្រាប់ធញ្ញជាតិទាំងមូល។
ទី៥. រំលងអាហារពេលព្រឹកញឹកញាប់ពេក ការមិនញ៉ាំអាហារពេលព្រឹក មិនប្រាកដថាជួយគ្រប់គ្រងទម្ងន់បានល្អនោះទេ។ អ្វីដែលសំខាន់គឺបរិមាណថាមពលសរុប និងគុណភាពអាហារដែលទទួលទានពេញមួយថ្ងៃ។ ទោះជាយ៉ាងណា មិនមែនមនុស្សគ្រប់រូបសុទ្ធតែត្រូវញ៉ាំអាហារពេលព្រឹកដើម្បីសម្រកទម្ងន់នោះទេ ព្រោះវាអាស្រ័យលើទម្លាប់រស់នៅ និងតម្រូវការរបស់មនុស្សម្នាក់ៗ។
ជារួម អ្នកមានអាយុលើសពី ៤០ ឆ្នាំ គួរយកចិត្តទុកដាក់លើបរិមាណ និងគុណភាពអាហារពេលព្រឹក ដោយជ្រើសរើសអាហារដែលមានប្រូតេអ៊ីន ជាតិសរសៃ និងសារធាតុចិញ្ចឹមគ្រប់គ្រាន់។ ការញ៉ាំអាហារឱ្យមានតុល្យភាព រួមជាមួយការហាត់ប្រាណជាប្រចាំ អាចជួយរក្សាសាច់ដុំ និងគ្រប់គ្រងទម្ងន់បានល្អ៕