យោងតាមការចុះផ្សាយពីប្រភពបរទេស ភេសជ្ជៈមួយចំនួនដែលមនុស្សនិយមផឹកជាប្រចាំ អាចជះឥទ្ធិពលមិនល្អដល់សុខភាពខួរក្បាល ប្រសិនបើទទួលទានច្រើន ឬយូរអង្វែង។ ភេសជ្ជៈទាំងនោះរួមមាន ភេសជ្ជៈផ្អែម ស្រា កាហ្វេដាក់ស្ករច្រើន និងភេសជ្ជៈប៉ូវកម្លាំង។
ទី១. ភេសជ្ជៈផ្អែម ដូចជាទឹកក្រូចកំប៉ុង និងភេសជ្ជៈមានជាតិស្ករខ្ពស់ ជាទូទៅមានជាតិស្ករបន្ថែមច្រើន ប៉ុន្តែផ្ដល់សារធាតុចិញ្ចឹមតិច។ ការផឹកជាប្រចាំអាចប៉ះពាល់ដល់ការគ្រប់គ្រងជាតិស្ករ និងសុខភាពរាងកាយ ដែលអាចជះឥទ្ធិពលដល់ខួរក្បាល។ ចំណែក ស្រា ការផឹកច្រើន ឬជាប្រចាំអាចប៉ះពាល់ដល់ប្រព័ន្ធប្រសាទ និងខួរក្បាល ព្រមទាំងជាប់ទាក់ទងនឹងការថយចុះសមត្ថភាពគិត និងចងចាំ។
ទី២. កាហ្វេដាក់ស្ករ និងទឹកដោះគោខាប់ច្រើន ការផឹកកាហ្វេធម្មតាដែលមិនដាក់ស្ករ ក្នុងកម្រិតសមរម្យ ត្រូវបានការសិក្សាមួយចំនួនរកឃើញថា មានទំនាក់ទំនងនឹងហានិភ័យទាបនៃជំងឺភ្លេចភ្លាំង និងជំងឺពាក់ព័ន្ធនឹងខួរក្បាលមួយចំនួន។ ប៉ុន្តែការដាក់ស្ករ ទឹកដោះគោខាប់ ស៊ីរ៉ូ ឬក្រែមច្រើន អាចធ្វើឱ្យរាងកាយទទួលបានជាតិស្ករ និងថាមពលលើសតម្រូវការ។ ដូច្នេះ គួរជ្រើសរើសកាហ្វេដែលមានស្ករតិច ឬមិនដាក់ស្ករ។
ទី៣. ភេសជ្ជៈប៉ូវកម្លាំង ជាទូទៅមានជាតិកាហ្វេអ៊ីន និងស្ករ។ ជាតិកាហ្វេអ៊ីនអាចជួយឱ្យមានអារម្មណ៍ភ្ញាក់ និងផ្ដោតអារម្មណ៍បានក្នុងរយៈពេលខ្លី ប៉ុន្តែមិនមានន័យថា ការផឹកភេសជ្ជៈប្រភេទនេះជាប្រចាំអាចជួយថែរក្សាសុខភាពខួរក្បាលរយៈពេលវែងនោះទេ។ ដូច្នេះ មិនគួរប្រើភេសជ្ជៈប៉ូវកម្លាំងច្រើនពេក ដើម្បីបំបាត់ភាពងងុយគេង ឬរក្សាកម្លាំងឡើយ។
ដើម្បីថែរក្សាសុខភាពខួរក្បាល គួរកាត់បន្ថយភេសជ្ជៈដែលមានជាតិស្ករខ្ពស់ និងជាតិអាល់កុល ព្រមទាំងកុំផឹកភេសជ្ជៈប៉ូវកម្លាំងច្រើនហួសកម្រិត។ គួរផឹកទឹកស្អាតឱ្យបានគ្រប់គ្រាន់ និងជ្រើសរើសតែ ឬកាហ្វេដែលមានជាតិស្ករតិច ឬមិនដាក់ស្ករ ដើម្បីជួយថែរក្សាសុខភាពទូទៅ និងខួរក្បាល៕