យោងតាមការចុះផ្សាយពីប្រភពបរទេស ការជ្រើសរើសផ្លែឈើឱ្យបានត្រឹមត្រូវ និងញ៉ាំក្នុងបរិមាណសមរម្យ គឺជាផ្នែកមួយនៃការថែរក្សាសុខភាព និងគ្រប់គ្រងទម្ងន់។ សម្រាប់បុរសដែលចង់កាត់បន្ថយខ្លាញ់ក្បាលពោះ គួរយល់ដឹងពីសន្ទស្សន៍ជាតិស្ករព្រោះផ្លែឈើប្រភេទនេះអាចធ្វើឱ្យជាតិស្ករក្នុងឈាមកើនឡើងយឺតជាងផ្លែឈើដែលមានសន្ទស្សន៍ជាតិស្ករខ្ពស់។
វិធីទី១ គឺ ជ្រើសរើសផ្លែឈើដែលមានសន្ទស្សន៍ជាតិស្ករទាប ដូចជា ស្ត្របឺរី ប្លូបឺរី ផ្លែប៉ោមបៃតង គីវី និងផ្លែជម្ពូរ។ វិធីទី២ គឺ ញ៉ាំផ្លែឈើស្រស់ទាំងមូលជំនួសទឹកផ្លែឈើ ព្រោះផ្លែឈើទាំងមូលមានជាតិសរសៃច្រើនជាង ដែលជួយបន្ថយល្បឿននៃការស្រូបយកជាតិស្ករ និងជួយឱ្យឆ្អែតបានយូរ។
វិធីទី៣ គឺ ជ្រើសរើសផ្លែឈើដែលទុំល្មម មិនទុំជ្រុលពេក ព្រោះកម្រិតទុំនៃផ្លែឈើមួយចំនួនអាចប៉ះពាល់ដល់បរិមាណជាតិស្ករ និងសន្ទស្សន៍ជាតិស្កររបស់វា។ វិធីទី៤ គឺ ញ៉ាំផ្លែឈើជាមួយប្រូតេអ៊ីន ឬខ្លាញ់ល្អ ដូចជា ផ្លែប៉ោមជាមួយប័រសណ្តែកដី ឬយ៉ាអួធម្មជាតិជាមួយផ្លែប៊ឺរី ដើម្បីជួយពន្យឺតការរំលាយអាហារ និងរក្សាអារម្មណ៍ឆ្អែតបានយូរ។
វិធីទី៥ គឺ ញ៉ាំផ្លែឈើជាមួយអាហារចម្បង ឬក្រោយពេលញ៉ាំអាហារ ដោយបន្ថែមជាមួយបន្លែ និងប្រភពប្រូតេអ៊ីន ដើម្បីជួយសម្របសម្រួលការកើនឡើងនៃជាតិស្ករក្នុងឈាម។ វិធីទី៦ គឺ កំណត់បរិមាណផ្លែឈើឱ្យបានសមរម្យ ដោយអាចយកបរិមាណប្រហែលមួយក្តាប់ដៃជាគោលការណ៍សម្រាប់មួយពេល និងជ្រើសរើសផ្លែឈើចម្រុះប្រភេទ ដើម្បីទទួលបានវីតាមីន និងសារធាតុរ៉ែផ្សេងៗ។
សរុបមក បុរសដែលចង់ថែរក្សារាង និងគ្រប់គ្រងទម្ងន់ គួរជ្រើសរើសផ្លែឈើដែលមានសារធាតុចិញ្ចឹមច្រើន ញ៉ាំទាំងមូល និងកំណត់បរិមាណឱ្យសមស្រប។ ទោះជាយ៉ាងណា ការញ៉ាំផ្លែឈើតែមួយមុខមិនអាចធានាថានឹងកាត់បន្ថយខ្លាញ់ក្បាលពោះបានទេ។ គួររួមបញ្ចូលជាមួយរបបអាហារមានតុល្យភាព ការហាត់ប្រាណទៀងទាត់ និងការគេងឱ្យបានគ្រប់គ្រាន់ ដើម្បីជួយរក្សាសុខភាព និងទម្ងន់ឱ្យបានល្អ៕