យោងតាមការចុះផ្សាយពីប្រភពបរទេស ការហាត់ប្រាណជាប្រចាំអាចជួយឱ្យរាងកាយមានសុខភាពល្អ និងគាំទ្រដល់ការសម្រកទម្ងន់។ ប៉ុន្តែមានមនុស្សមួយចំនួនហាត់ប្រាណជាយូរមកហើយ នៅតែមិនឃើញទម្ងន់ថយចុះ ដោយសារកត្តាជាច្រើនពាក់ព័ន្ធនឹងការញ៉ាំអាហារ និងទម្លាប់រស់នៅ។
មូលហេតុទី១ គឺទទួលទានកាឡូរីច្រើនជាងថាមពលដែលរាងកាយប្រើប្រាស់ ជាពិសេសអាហារមានជាតិខ្លាញ់ និងស្ករខ្ពស់។ ការផឹកស្រាក៏អាចបន្ថែមកាឡូរី និងធ្វើឱ្យពិបាកគ្រប់គ្រងទម្ងន់ផងដែរ។
មូលហេតុផ្សេងទៀតរួមមាន ការគេងមិនគ្រប់គ្រាន់ ភាពតានតឹង បម្រែបម្រួលអរម៉ូន ដូចជាការថយចុះមុខងារក្រពេញទីរ៉ូអ៊ីត ព្រមទាំងការប្រើថ្នាំមួយចំនួន ដូចជាថ្នាំព្យាបាលជំងឺផ្លូវចិត្ត និងជំងឺទឹកនោមផ្អែម។ លើសពីនេះ អាយុកាន់តែច្រើន និងកត្តាតំណពូជក៏អាចធ្វើឱ្យការសម្រកទម្ងន់កាន់តែពិបាកផងដែរ។
ដើម្បីជួយគ្រប់គ្រងទម្ងន់ គួរកាត់បន្ថយបរិមាណកាឡូរីតាមតម្រូវការរបស់រាងកាយ ជ្រើសរើសបន្លែ ផ្លែឈើ គ្រាប់ធញ្ញជាតិ និងអាហារមានជាតិសរសៃ ព្រមទាំងកាត់បន្ថយអាហារមានខ្លាញ់និងស្ករច្រើន។ គួរផឹកទឹកឱ្យគ្រប់គ្រាន់ គេងឱ្យបានល្អ និងរៀនគ្រប់គ្រងភាពតានតឹង។
សរុបមក ការហាត់ប្រាណតែមួយមុខមិនធានាថាទម្ងន់នឹងថយចុះនោះទេ។ ការសម្រកទម្ងន់ត្រូវការការកែប្រែទាំងរបបអាហារ ការសម្រាក និងទម្លាប់រស់នៅ។ ប្រសិនបើព្យាយាមហើយនៅតែមិនអាចសម្រកទម្ងន់បាន គួរពិគ្រោះជាមួយគ្រូពេទ្យ ឬអ្នកជំនាញអាហារូបត្ថម្ភ ដើម្បីស្វែងរកមូលហេតុ និងរៀបចំផែនការសមស្រប ៕