មនុស្សជាច្រើនតែងតែគិតថា ការគេង គឺជាពេលវេលាដ៏ឥតប្រយោជន៍ ឬជាការខាតបង់ពេលធ្វើការងាររកលុយ ។ ពួកគេសុខចិត្តតស៊ូដាច់យប់ មើលរឿង ឬលេងទូរសព្ទរហូតដល់ម៉ោង ២ ឬម៉ោង ៣ព្រឹក ដោយគិតថាថ្ងៃស្អែកអាចទូទាត់សងវិញបាន ។ ប៉ុន្តែការពិតដ៏ជូរចត់ និងវិទ្យាសាស្ត្របានបញ្ជាក់យ៉ាងច្បាស់ថា៖ ការខ្វះការគេង ឬការគេងមិនលក់រ៉ាំរ៉ៃ គឺជា «ថ្នាំពុលដ៏សាហាវ» ដែលកំពុងបំផ្លាញកោសិកាស្បែក បំផ្លាញខួរក្បាល និងបើកទ្វារស្វាគមន៍ជំងឺកាចសាហាវចូលក្នុងខ្លួនយ៉ាងលឿនបំផុត។
តើហេតុអ្វីបានជាការគេងមិនគ្រប់គ្រាន់ ធ្វើឱ្យអ្នកឆាប់ចាស់ និងធ្លាក់ខ្លួនឈឺធ្ងន់? ខាងក្រោមនេះជារឿងពិតដែលអ្នកត្រូវដឹង៖
១. បំផ្លាញកូឡាជែន និងធ្វើឱ្យស្បែកចាស់មុនអាយុ៖ នៅពេលដែលយើងចូលគេងក្នុងពេលយប់ជ្រៅ និងគេងមិនលក់ស្កប់ស្កល់ រាងកាយនឹងបញ្ចេញអរម៉ូនស្រ្តេស (Cortisol) មកច្រើនហួសប្រមាណ។ អរម៉ូននេះជាការបំផ្លាញប្រូតេអ៊ីនកូឡាជែន (Collagen) ដែលជាខ្នងបង្អែកជួយឱ្យស្បែកតឹងណែន និងក្មេងជាងវ័យ។ លទ្ធផលគឺ ធ្វើឱ្យស្បែកមុខរបស់អ្នកឆាប់ជ្រីវជ្រួញ ស្រអាប់ ធ្លាក់ស្បែក និងឆាប់ចាស់ជាងវ័យយ៉ាងឆាប់រហ័ស។
២. ខួរក្បាលមិនបានសម្អាតកាកសំណល់ : ពេលដែលយើងគេងលក់ស្កប់ស្កល់ ខួរក្បាលប្រើប្រាស់ពេលវេលានេះដើម្បីបើកប្រព័ន្ធសម្អាតជាតិពុល និងកាកសំណល់ប្រូតេអ៊ីនដែលកកស្ទះពេញមួយថ្ងៃចេញ។ ប្រសិនបើអ្នកគេងមិនលក់ កាកសំណល់ពុលទាំងនោះនឹងបន្តកកស្ទះក្នុងខួរក្បាល ដែលជាមូលហេតុធ្វើឱ្យបាត់បង់ការចងចាំ ឆាប់វង្វេងវង្វាន់ និងបង្កើនហានិភ័យខ្ពស់នៃជំងឺវង្វេងវ័យចាស់ (Alzheimer’s)។
៣. បំផ្លាញប្រព័ន្ធការពាររាងកាយ: ការគេងគឺជាពេលដែលរាងកាយផលិតកោសិកាគ្រាប់ឈាមស និងប្រព័ន្ធភាពសុំា ដើម្បីប្រយុទ្ធប្រឆាំងនឹងមេរោគ បាក់តេរី និងកោសិកាមិនប្រក្រតី។ ការគេងមិនបានគ្រប់គ្រាន់ធ្វើឱ្យកងទ័ពការពាររាងកាយចុះខ្សោយ ដែលធ្វើឱ្យអ្នកងាយឆ្លងជំងឺ ផ្តាសាយញឹកញាប់ និងគ្មានកម្លាំងកំហែង។
៤. បង្កើនហានិភ័យនៃជំងឺកាចសាហាវ (បេះដូង): ការខ្វះការគេងរយៈពេលយូរ បង្កឱ្យមានការរលាករ៉ាំរ៉ៃក្នុងរាងកាយ (Chronic Inflammation) ដែលជាកាតាលីករជំរុញឱ្យកោសិកាមិនប្រក្រតីប្រែទៅជា «កោសិកាមហារីក»។ វាក៏ជាមូលហេតុចម្បងដែលនាំឱ្យកើតជំងឺលើសឈាម ជំងឺគាំងបេះដូង ជំងឺដាច់សរសៃឈាមខួរក្បាល (Stroke) និងជំងឺទឹកនោមផ្អែមយ៉ាងងាយបំផុត។
សេចក្ដីសន្និដ្ឋាន៖ ការគេងមិនមែនជាការខ្ជះខ្អយពេលបាត់បង់នោះទេ ប៉ុន្តែវាគឺជា «ឱសថធម្មជាតិ» ដ៏មានតម្លៃបំផុតដែលមិនអាចរកទិញបានដោយលុយកាក់ឡើយ។ ឈប់បន្តធ្វើបាបរាងកាយដោយការដាច់យប់ទៀតទៅ! ចាប់ពីយប់នេះតទៅ សូមចូលគេងឱ្យបានទៀងទាត់ ៧ ទៅ ៨ ម៉ោងក្នុងមួយថ្ងៃ ដើម្បីរក្សាសុខភាព សោភ័ណភាព និងអាយុជីវិតដ៏វែងអន្លាយប្រកបដោយភាពរឹងមាំ!