នាពេលបច្ចុប្បន្ន និន្នាការនៃជំងឺកាចសាហាវផ្សេងៗ ដូចជា ជំងឺមហារីក ជំងឺបេះដូង ជំងឺលើសឈាម និងជំងឺទឹកនោមផ្អែម បាននិងកំពុងវាយលុកលើក្រុមមនុស្សវ័យក្មេង (អាយុចាប់ពី ២០ ដល់ ៤០ ឆ្នាំ) កាន់តែច្រើនឡើងៗ។ ការរស់នៅប្រញាប់ប្រញាល់ ការញ៉ាំអាហារកែច្នៃ ស្រ្តេសពីការងារ ការខ្វះការហាត់ប្រាណ និងការគេងមិនគ្រប់គ្រាន់ គឺជាដើមហេតុចម្បងដែលដុតរំលាយសុខភាពពីខាងក្នុងដោយមិនដឹងខ្លួន។
មនុស្សជាច្រើនតែងយល់ច្រឡំថា «ខ្លួននៅក្មេង កម្លាំងនៅខ្លាំង មិនចាំបាច់ពិនិត្យសុខភាពទេ» ប៉ុន្តែនៅពេលសញ្ញាជំងឺចេញមកក្រៅ វាតែងតែស្ថិតក្នុងដំណាក់កាលធ្ងន់ធ្ងរទៅហើយ។ ការពិនិត្យស្រាវជ្រាវស្វែងរកជំងឺតាំងពីដំបូង (Early Screening) គឺជាអាវុធដ៏មានឥទ្ធិពលបំផុតក្នុងការការពារជីវិតរបស់អ្នក!
វិធីសាស្ត្រពិនិត្យសុខភាពសំខាន់ៗដែលមនុស្សវ័យក្មេងមិនគួររំលង៖
១. ការពិនិត្យឈាមទូទៅ
ការពិនិត្យឈាម គឺជាបង្អួចដែលឆ្លុះបញ្ចាំងពីសុខភាពខាងក្នុងរាងកាយបានយ៉ាងច្បាស់៖
កម្រិតស្ករក្នុងឈាម ៖ ស្រាវជ្រាវរកជំងឺទឹកនោមផ្អែមតាំងពីដំណាក់កាលដំបូង។
កម្រិតខ្លាញ់ក្នុងឈាម ៖ ពិនិត្យខ្លាញ់អាក្រក់ (LDL) និងទ្រីគ្លីសេរីដ ដែលជាដើមហេតុនៃការស្ទះសរសៃឈាមបេះដូង និងខួរក្បាល។
មុខងារថ្លើម និងតម្រងនោម ៖ វាយតម្លៃសមត្ថភាពចោះ និងបញ្ចេញជាតិពុលពីរាងកាយ។
២. ការពិនិត្យសម្ពាធឈាម និងបេះដូង (Blood Pressure & ECG)
សម្ពាធឈាម៖ ជំងឺលើសឈាមត្រូវគេប្រសិទ្ធនាមថាជា «ឃាតករស្ងៀមស្ងាត់» ព្រោះវាមិនសូវបង្ហាញរោគសញ្ញាឡើយ ប៉ុន្តែវាអាចបណ្តាលឱ្យដាច់សរសៃឈាមខួរក្បាល (Stroke) បានគ្រប់ពេល។
ខ្សែកោសល្យបេះដូង (ECG)៖ ពិនិត្យមើលចង្វាក់បេះដូង និងសញ្ញានៃការខ្វះឈាមទៅចិញ្ចឹមបេះដូង។
៣. ការពិនិត្យស្រាវជ្រាវរកជំងឺមហារីក (Early Cancer Screening)
+សម្រាប់ស្ត្រី៖
Pap Smear / HPV Test៖ ពិនិត្យស្រាវជ្រាវរកជំងឺមហារីកមាត់ស្បូន (គួរធ្វើចាប់ពីអាយុ ២១ ឆ្នាំឡើងទៅ)។
ការពិនិត្យដោះដោយខ្លួនឯង និង Eco/Mammogram៖ ពិនិត្យរកដុំពកសង្ស័យនៅសុដន់។
+សម្រាប់បុរស និងស្ត្រី៖
អ៊ុលត្រាសោនពោះ (Abdominal Ultrasound)៖ ពិនិត្យមើលថ្លើម តម្រងនោម ប្រមាត់ និងលំពែង ក្រែងមានដុំសាច់ ឬក្រួស។
ការឆ្លុះពោះវៀន (Colonoscopy)៖ ប្រសិនបើមានប្រវត្តិគ្រួសារធ្លាប់កើតមហារីកពោះវៀនធំ។
៤. ការពិនិត្យវីរុសរលាកថ្លើម
វីរុសរលាកថ្លើម B និង C គឺជាមូលហេតុចម្បង ៨០% នៃជំងឺក្រិនថ្លើម និងមហារីកថ្លើមនៅកម្ពុជា។ ការពិនិត្យដឹងមុន ជួយឱ្យយើងអាចចាក់វ៉ាក់សាំងការពារ (ចំពោះប្រភេទ B) ឬព្យាបាលជាសះស្បើយទាន់ពេលវេលា (ចំពោះប្រភេទ C)។
+ទម្លាប់នៃការថែទាំខ្លួន៖ តើបង្កើតកាលវិភាគពិនិត្យយ៉ាងដូចម្តេច?
អាយុ ២០ – ៣០ ឆ្នាំ៖ គួរពិនិត្យសុខភាពទូទៅ (General Check-up) យ៉ាងហោចណាស់ ១ ដង ក្នុង ១-២ ឆ្នាំ។
អាយុ ៣០ ឆ្នាំឡើងទៅ៖ គួរពិនិត្យសុខភាពឱ្យបានទៀងទាត់ ១ ឆ្នាំ ១ ដង ដោយបន្ថែមការពិនិត្យស្រាវជ្រាវរកមហារីក និងកម្រិតអ័រម៉ូន។