យោងតាមការចុះផ្សាយពីប្រភពបរទេស អ្នកដែលចង់ស្រកទម្ងន់មិនចាំបាច់ឈប់ញ៉ាំផ្លែឈើ ឬកាត់បន្ថយអាហារដែលផ្តល់ថាមពលទាំងស្រុងនោះទេ។ ផ្លែឈើមានជាតិសរសៃ វីតាមីន និងសារធាតុចិញ្ចឹមជាច្រើន ដែលអាចជួយឱ្យឆ្អែតបានយូរ និងគាំទ្រដល់សុខភាពរាងកាយ។ ខាងក្រោមនេះជាផ្លែឈើ ៧ មុខដែលគួរបញ្ចូលក្នុងរបបអាហារសម្រាប់អ្នកចង់គ្រប់គ្រងទម្ងន់។
១. ផ្លែរ៉ាសបឺរី ២. ផ្លែសារី និង ៣. ផ្លែប្លូបឺរី៖ ផ្លែឈើទាំងនេះសម្បូរជាតិសរសៃ ដែលជួយឱ្យមានអារម្មណ៍ឆ្អែត និងជួយដល់ការរំលាយអាហារ។ ជាពិសេស រ៉ាសបឺរី និងប្លូបឺរីក៏មានសារធាតុប្រឆាំងអុកស៊ីតកម្ម រីឯផ្លែសារីផ្តល់វីតាមីន C និងប៉ូតាស្យូម ដែលមានប្រយោជន៍ដល់សុខភាពទូទៅ។
៤. ផ្លែក្រូច និង ៥. ផ្លែប៉ោម៖ ផ្លែក្រូចផ្តល់វីតាមីន C ជាតិសរសៃ និងសារធាតុចិញ្ចឹមផ្សេងៗ។ ចំណែកផ្លែប៉ោមមានជាតិសរសៃ និងអាចញ៉ាំជាអាហារសម្រន់បាន។ គួរញ៉ាំផ្លែប៉ោមទាំងសំបក ក្រោយលាងសម្អាតឱ្យបានល្អ ដើម្បីទទួលបានជាតិសរសៃ និងសារធាតុចិញ្ចឹមកាន់តែច្រើន។
៦. ផ្លែស្ត្របឺរី និង ៧. ផ្លែចេក៖ ផ្លែស្ត្របឺរីមានជាតិសរសៃ និងវីតាមីន C ព្រមទាំងអាចជាជម្រើសជំនួសបង្អែមផ្អែមៗបាន។ ចំណែកផ្លែចេកផ្តល់ជាតិសរសៃ ប៉ូតាស្យូម និងម្សៅដែលរំលាយយឺតមួយចំនួន ជួយផ្តល់ថាមពល និងគាំទ្រដល់សុខភាពពោះវៀន។ ទោះជាយ៉ាងណា ផ្លែឈើទាំងពីរមិនមែនជាអាហារដែលធ្វើឱ្យស្រកទម្ងន់ដោយស្វ័យប្រវត្តិនោះទេ។
ដើម្បីគ្រប់គ្រងទម្ងន់ឱ្យមានប្រសិទ្ធភាព គួរញ៉ាំផ្លែឈើក្នុងបរិមាណសមស្រប និងជ្រើសរើសផ្លែឈើស្រស់ជំនួសបង្អែម ឬភេសជ្ជៈដែលមានជាតិស្ករច្រើន។ ជាមួយគ្នានេះ គួរញ៉ាំអាហារមានតុល្យភាព គ្រប់គ្រងបរិមាណអាហារ ធ្វើចលនារាងកាយជាប្រចាំ និងគេងឱ្យបានគ្រប់គ្រាន់។ ការរក្សាទម្លាប់ល្អជាបន្តបន្ទាប់ ទើបជួយឱ្យការស្រកទម្ងន់មាននិរន្តរភាព និងល្អចំពោះសុខភាពរយៈពេលវែង៕