យោងតាមការចុះផ្សាយពីប្រភពបរទេស ការទុកម្ហូបឱ្យត្រជាក់នៅខាងក្រៅយូរ មុនដាក់ក្នុងទូទឹកកក អាចបង្កើនហានិភ័យនៃការកើនឡើងបាក់តេរី។ អ្នកជំនាញណែនាំថា អាហារដែលចម្អិនរួចគួររក្សាទុកក្នុងទូទឹកកកឱ្យបានឆាប់ មិនចាំបាច់រង់ចាំឱ្យត្រជាក់ទាំងស្រុងនោះទេ។
មូលហេតុគឺបាក់តេរីអាចកើនឡើងយ៉ាងលឿនក្នុងសីតុណ្ហភាពចន្លោះពី ៤ ទៅ ៦០អង្សាសេ។ ប្រសិនបើទុកម្ហូបនៅសីតុណ្ហភាពបន្ទប់យូរ ហានិភ័យនៃការបំពុលអាហារអាចកើនឡើង។ ជាទូទៅ មិនគួរទុកអាហារចម្អិនរួចនៅខាងក្រៅលើសពី ២ម៉ោង ឬលើសពី ១ម៉ោង នៅពេលសីតុណ្ហភាពខាងក្រៅលើស ៣២អង្សាសេឡើយ។
ដើម្បីរក្សាអាហារឱ្យបានត្រឹមត្រូវ គួរចែកម្ហូបក្តៅដាក់ក្នុងប្រអប់តូចៗដែលមានជម្រៅមិនលើសពី ៥សង់ទីម៉ែត្រ ជាជាងដាក់ឆ្នាំងធំទាំងមូលក្នុងទូទឹកកក ព្រោះអាហារបរិមាណច្រើនអាចរក្សាកម្ដៅយូរ។ ការបែងចែកជាចំណែកតូចៗជួយឱ្យអាហារត្រជាក់លឿន និងកាត់បន្ថយហានិភ័យនៃការកើនបាក់តេរី។
ប្រសិនបើម្ហូបនៅក្តៅ អាចបិទគម្របប្រអប់មិនជិតបន្តិចក្នុងដំណាក់កាលដំបូង ដើម្បីឱ្យចំហាយទឹកចេញ ហើយបិទឱ្យជិតនៅពេលអាហារត្រជាក់។ គួរទុកចន្លោះរវាងប្រអប់ ដើម្បីឱ្យខ្យល់ត្រជាក់ចរាចរបានល្អ។ មិនគួរដាក់ប្រអប់ចង្អៀតៗ ឬដាក់អាហារក្តៅច្រើនក្នុងឆ្នាំងធំតែមួយឡើយ។
ជារួម ការដាក់ម្ហូបក្តៅក្នុងទូទឹកកកឱ្យបានឆាប់ និងការបែងចែកជាចំណែកតូចៗ អាចជួយកាត់បន្ថយហានិភ័យនៃការពុលអាហារ។ ប្រភពណែនាំឱ្យរក្សាបន្លែឆ្អិនក្នុងទូទឹកកកមិនលើសពី ២៤ម៉ោង និងសាច់ឆ្អិនមិនលើសពី ២ថ្ងៃ។ សូមចងចាំថា ការដាក់ទូទឹកកកអាចបន្ថយការកើនឡើងរបស់បាក់តេរី ប៉ុន្តែមិនអាចកម្ចាត់បាក់តេរីទាំងអស់បានទេ ដូច្នេះការរក្សាទុកអាហារឱ្យបានត្រឹមត្រូវគឺជារឿងសំខាន់៕